1 Biturusu 3

Uteku u na va kuyaꞋan a̱ ubuta̱ u yolo

1A̱ɗa̱ a̱ma̱ci, i tono ali a̱ ɗa̱, uteku u na yi o kutono Maguɓi ma̱ ɗa̱. Vali vi yoku vi iwan baci kushuku n Arabali a Singai, wuma u singai u vuka wa wi ta̱ a kufuɗa wo rono vali vu nan lo ali u laꞋa kadanshi ka na u kuyaꞋanka yi. 2Ali a i ta̱ a kuyaꞋan nannai adama a na e ene ta̱ uye u singai u na wi derere a̱ ubuta̱ u wuma u ɗa̱.

3Ka̱ta̱ i gbagbala adama a na yo okpo n tsuloboi a̱ a̱shi a uma o yoku koci ba. Ka̱ta̱ vu takacika ka̱ci ka̱ nu n kucaꞋa ku ka̱nji, ko ili yi ikebe ka̱u ba, ko a̱kumbula̱. 4Ta nannai koci ba. U laꞋa ta̱ n kugaꞋan e yeve wu n tsuloboi tsu na tsu uta̱i punu a̱ ka̱ɗu ka̱ nu. UgaꞋin u nam pa wa u tsu uta̱ ta̱ a̱ ubuta̱ u vuza na wi m ma̱riki n ka̱ɗu ka babu a̱ra̱ɗi n ka̱bini. Ili yu ugaꞋin i ɗa ka̱u a̱ ubuta̱ u Ka̱shile i ɗa kpamu yi o kukotso ba. 5Nannai ɗa uteku u na a̱ma̱ci a ciɗa a cau a zuwai ka̱ci ke le o okpoi n tsuloboi. A̱ ushuku ta̱ n Ka̱shile ɗa kpamu a̱ ushuki n kadanshi ka ali e le. 6Agisana, Saratu† u panaka ta̱ vali vi ni, Ibrahim, ana u ɗekei ni vuzagbayin vi ni. A̱ɗa̱ nkere n ni n ɗa yi, yi baci a kuyaꞋan ili i na yi derere, babu ili i na i kuzuwa ɗa̱ i pana wovon.

7Ta feu nannai, a̱ɗa̱ ali i indanai uteku u na yi o kuyongo n a̱ma̱ci a̱ ɗa̱. Yongoi n ele n kuyeve a ayin a na yi o kuyongo koɓolo. Ciɓa a na vu laꞋi ni n utsura. Ciɓa a̱yi feu wi isa ta̱ kuneꞋe ku Ka̱shile ku singai ku wuma. YaꞋan nannai adama a na ili i yoku i kpada avasa a̱ ɗa̱ ba.

Da̱sa̱ngi mayin n aza a̱ ɗa̱

8Gogo na, yongoi mayin a̱ ka̱tsuma̱ ki itoku i ɗa̱ ra̱ka̱, panai asuvayali a itoku i ɗa̱, ili i ciya̱ baci vuza te a̱ ka̱tsuma̱ ka̱ ɗa̱, i ciganai tsu na i ci ciganai vuza n vangu vi ni. Yo okpo uma a singai m babu a̱ra̱ɗi. 9Vuza u yaꞋanka ɗa̱ baci kagbani-gbani, ka̱ta̱ i tsupa yi n kagbani-gbani ba. Ko vuza u shika ɗa̱ baci, ka̱ta̱ i tsupa yi n ishikushi ba. Ili i na nan lo i yaꞋan baci nannai, zuwakai le una̱singai. YaꞋin nannai adama a na Ka̱shile ke ɗeke ta̱ i zuwaka uma una̱singai. Tsu nan lo feu, Ka̱shile ki ta̱ a kuzuwaka ɗa̱ una̱singai. 10Kadanshi ka̱ Ka̱shile ka danai:

“Vuza na baci wi a kuciga wuma u ma̱za̱nga̱ n ayin a singai,

mayun sai u sa̱nka̱ kelentsu ka̱ ni kudansa kadanshi ka gbani-gbani,

ka̱ta̱ kpamu u ka̱na̱ kaꞋa a̱ ubuta̱ u kudansa kadanshi ka aꞋuwa.

11Mayun ɗa u ka̱sa̱kpa̱ kuyaꞋan ili i gbani-gbani amma u yaꞋan i singai.

Mayun ɗa u dakaka adama a na u yongo m ma̱ta̱na̱ n uma o yoku.

12Vuzavaguɗu wi ta̱ a kinda aza a na a ci yaꞋan kasingai,

atsuvu a̱ ni i ta̱ lo a kupana avasa e le ko wanai.

Amma Vuzavaguɗu u tsu shirikpa̱ka̱ ta̱ aza a na a ci yaꞋan kagbani-gbani kucina̱.”#Ishp. 34:12-16.

13-14Vuza wi ta̱ a kuyaꞋanka wu kagbani-gbani, vu foɓuso baci kuyaꞋanka yi kasingai? A̱Ꞌa̱, ta nannai ba. Amma ko a takacika ɗa̱ baci adama a kuyaꞋan kasingai, ka̱ta̱ i pana wovon ko kpamu i ɓa̱la̱ ka̱tsuma̱ ba. Ka̱shile ki ta̱ a kuyaꞋanka ɗa̱ katsupu adama a kuyaꞋan kasingai. 15A na i kuɓa̱la̱ ka̱tsuma̱, i kucikpa i cikpa Kishi an Vuzagbayin n a̱ɗu a̱ ɗa̱. Mayun ɗa i yongo ufoɓushi adama a na yu ushuku yaba dem vu na we ecei ɗa̱, i neke yi kadanshi a̱ ubuta̱ wa̱ a̱pa̱Ꞌa̱ a na yi n a ɗa. 16Mayun ɗa kpamu i yaꞋan ili i nam pa n ka̱ɗu ka̱ ma̱riki a uye u na u yotsoi. Yongoi n a̱ɗu a ciɗa. Uma a dansa baci kawuya adama a̱ ɗa̱, o okpo n wono e ene baci wuma u singai u na yi a kuyaꞋan adama a na a̱ɗa̱ aza a Kishi a ɗa.

17Ciɓai, u la ta̱ n kugaꞋan i yaꞋan kasingai ka̱ta̱ i soꞋo atakaci, ta baci Ka̱shile ka cigai nannai, a na yo soꞋo atakaci adama a kagbani-gbani. 18Kishi feu u soꞋo ta̱ atakaci ana u kuwa̱i adama a unushi u tsu, wo kudoku kpamu wa yaꞋan nannai ba. U nusa ba, amma ɗa u kuwa̱i adama a aza a unushi, u ciya̱ u bonoko tsu u Ka̱shile. Ikyamba i ni i kuwa̱ ta̱, amma ɗa o bonokoi ni n wuma kpamu a̱ ubuta̱ wu utsura wa Ayinviki a̱ Ka̱shile.

19Ɗa Kishi u yaꞋankai a̱kpisa̱ a na i ugbashi kadanshi ka̱ Ka̱shile n utsura wa Ayinviki a̱ Ka̱shile. 20Uma a nam pa a a nusaka ta̱ Ka̱shile a ayin a na Nuhu wi e kusheꞋwe kpantsu. Amma Ka̱shile ke reme ta̱ ka̱ɗu n ele ali sai ayin a na Nuhu u kotsoi kusheꞋwe kpantsu ka. Uma kunla̱i a uwai punu a kpantsu ku nan lo, ɗa Ka̱shile ki isai le a̱ ubuta̱ u mini ma na ma lyaꞋi aduniyan.

21Mini ma na ma lyaꞋi aduniyan a mo okpo ta̱ an kusumbu ka akucina ku na ki isai ɗa̱ gogo na. Amma kusumbu ka akucina ukuna u kutakpa ka̱ a̱shinda̱ a ikyamba a̱ ɗa̱ a ɗa ba. Amma ɗaɗa kubono u Ka̱shile n ka̱ɗu ka ciɗa, adama a na a̱ ɗengusa̱ ta̱ Yesu Kirisiti Kishi a kasaun. 22Kishi gogo na wi ta̱ ɗe gaɗi, a̱ ubuta̱ u na wi a̱ ida̱shi e kukiye ku usingai ku Ka̱shile. Alingata ra̱ka̱ n icuꞋu i wunla̱i i gbani-gbani e neke yi ta̱ tsugbayin.

Currently Selected:

1 Biturusu 3: asgNT

Highlight

Copy

Compare