1 Biturusu 2

1Adama a nannai, sai i loko ili i gbani-gbani i na i yaꞋin ra̱ka̱. Ka̱sa̱kpa̱i kudoro uma. Ka̱sa̱kpa̱i kudana uma a̱ɗa̱ i suɓa̱ ta̱ ashe i suɓa̱ ta na ba. Ka̱ta̱ i yaꞋan cisheꞋe ko i dansa ili i na i kula̱nga̱sa̱ uma a̱ɗu ba. 2-3U gaꞋan ta̱ i yaꞋan n ucigi wu utsura u na i kapa mani ma kadanshi ka̱ Ka̱shile uteku u na mereɓu ma̱ ci shika̱ adama a mani. YaꞋin nannai adama a na i peɗe ta̱ ɗe ugaꞋin u Vuzagbayin. Ili i nan lo ya yi ta̱ a kuzuwa ɗa̱ i gbonguro punu a̱ ubuta̱ u na a isai ɗa̱.

Kenene ka wuma

4Vuzagbayin Yesu a̱yi ɗa Kenene ka katali ka wuma. Uma a iwan yi ta̱, amma Ka̱shile ka zagba yi ta̱ ɗa kpamu u cigai ni ka̱u. 5A̱ɗa̱ yi ta̱ ci ni, atali a wuma a ɗa yi a na Ka̱shile ki a kuyaꞋanka ulinga a̱ ubuta̱ u kumaꞋa kpaꞋa ku tsugono ci ni. A̱ɗa̱ feu ka̱kuma̱ ka anan ganu vi ciɗa ɗa, a̱ɗa̱ ɗa i kuyaꞋan alyuka a singai o tsugono tsu Ka̱shile a na Ka̱shile ka kupana uyoꞋo a̱ ubuta̱ u Yesu Kishi. 6Kadanshi ka̱ Ka̱shile ka dana tsu ta̱ ili i nam pa:

“Indanai! Mi ta̱ a kuzuwa kenene ka katali ke mere ka Sihiyona†

ka na n zagbai ɗa kpamu n cigai.

Vuza na dem u kuneke ka̱ɗu u vuza nan lo va

u kudana uneki u ka̱ɗu u ni u nan lo u kuneke yi wono ba.”#Ish. 28:16.

7A̱yi macigi ma̱ nu maꞋa, avu vu na vi nekei ka̱ɗu ka̱ nu wa̱ ni. Amma aza o yoku i ta̱ a kuꞋiwan yi.

“Kenene ka katali ka na amaꞋi a iwain

ka ɗaɗa ko bonoi kenene ke mere.”#Ishp. 118:22.

8Kadanshi ka̱ Ka̱shile ka kpamu ka danai,

“A̱yi ɗa kenene ke mere ka na ka tsu zuwa uma a̱ ta̱ɗa̱tsa̱,

katali ka na ka kuzuwa le a̱ yikpa̱.”#Ish. 8:14.

A̱ tsu ta̱ɗa̱tsa̱ ta̱ adama a na a tsu pana kadanshi ka̱ Ka̱shile ko o tono kaꞋa ba, ka̱ta̱ ta na a cina ili i na Ka̱shile ka zuwakai le kelime.

9Amma a̱ɗa̱ yi tsu uma a nan lo ba, a̱ɗa̱ umaci u ɗa u na Ka̱shile ka zagbai. A̱ɗa̱ ka̱kuma̱ ka anan ganu kaꞋa ka na ki a kucikpa Ka̱shile an Mogono, a̱ɗa̱ kpamu iɗika i ciɗa i ɗa, a̱ɗa̱ kpamu uma a̱ Ka̱shile a ɗa. Ka̱shile ku uta̱ka̱ ɗa̱ ta̱ a̱ ubuta̱ u ka̱yimbi ɗa u bonokoi ɗa̱ a̱ ubuta̱ u kutashi u ni. Gogo na wo okpo ta̱ mayun i dana ili i mereve i na u yaꞋin. Kadanshi ka̱ Ka̱shile ka danai:

10“N ci cau, a̱ɗa̱ yi ishi n umaci u ka̱ci ka̱ ɗa̱ ba,

amma gogo na a̱ɗa̱ umaci u Ka̱shile u ɗa yi.

N ci cau yi ishi yi isa asuvayali a̱ Ka̱shile ba;

gogo na yi isa ta̱ asuvayali a̱ ni.”#Hos. 1:6-9; 2:23.

11Uma a̱ va̱, a̱ɗa̱ omoci a ɗa n aza a pulai a̱ ubuta̱ u na yi na. Adama a nan lo mi ta̱ a kuɓarangu ɗa̱ i ka̱sa̱kpa̱ kuciga ili i gbani-gbani adama a na i ɗa yi ta̱ a̱ vishili vu mayun n wuma u ɗa̱. 12Yongoi n ugboji a̱ ka̱tsuma̱ ka uma a̱ ɗa̱ a na i aza o Kutoni ba. Ko a dana baci i yaꞋan ta̱ kagbani-gbani, i ta̱ e kene ili i mayun i na yi punu a̱ ɗa̱, ka̱ta̱ ele o bono a̱ ushuku e neke Ka̱shile tsugbayin a ayin a na baci wi a kuyaꞋanka aduniyan afada.

Panakai aza e kelime a̱ ɗa̱

13Vuzavaguɗu u ciga ta̱ i panaka tsugono tsu uma ra̱ka̱. Panakai mogono ma uma ma na ma laꞋi m mgbayin, 14n azagbagbaꞋin a na u tsu suku feu. YaꞋin nannai adama a na mogono ma ma̱ suku le ta̱ a takacika aza a na a nusai ra̱ka̱, ɗa kpamu u suki le a cikpa aza a na a yaꞋin ili i singai.

15Ka̱shile ka ciga ta̱ i yaꞋan ili i singai, i yaꞋan baci kpamu nannai, yi ta̱ a kuzuwa uma a na i kuyaꞋansa nsata n ɗa̱ a namba ili i kudansa. 16A̱ɗa̱ a agbashi a ɗa yi ba; yi ta̱ ba̱ri. Amma ida̱shi i ba̱ri i ɗa̱ i neke ɗa̱ ka̱ba̱nga̱ ka kuyaꞋan ili i kavama ba. Yi ta̱ ba̱ri adama a na i yongo an agbashi a̱ Ka̱shile. 17Nekei yaba dem tsugbayin ka̱ta̱ i yotsongu uma a̱ Ka̱shile ucigi u na u yotsoi. Nekei Ka̱shile tsugbayin ka̱ta̱ i panaka mogono.

18Agbashi, mayun ɗa i panaka azagbagbaꞋin a̱ ɗa̱ ka̱ta̱ i tono kadanshi ke le ayin tutu. YaꞋin nannai wa aza a na i m ma̱riki n kusheshe ku singai kpamu, amma i yaꞋan feu nannai wa aza a na i n asuvu a̱ usuɗukpi. 19Ka̱shile ka tsu pana ta̱ uyoꞋo ayin a na baci vuza u gbamai asuvu a̱ ubuta̱ u kusoꞋo atakaci a babu unushi adama a na u yeve ta̱ Ka̱shile. 20I yaꞋan baci unushi ɗa a lapai ɗa̱ i kuciya̱ katsupu ba. Amma Ka̱shile ki ta̱ a kuzuwaka ɗa̱ una̱singai yi baci o kusoꞋo atakaci adama a kuyaꞋan kasingai. 21Kirisiti Kishi a̱yi ɗa agisana a̱ ɗa̱, ɗa u soꞋi atakaci adama a̱ ɗa̱. I tono yi tsu nam pa tsa. Atakaci i ta̱ punu a̱ ubuta̱ wi ili i na Ka̱shile ka zuwai nu vi yaꞋan. Kadanshi ka̱ Ka̱shile ka danai:

22“Kishi u yaꞋan unushi ba,

u doro vuza ba.”#Ish. 53:9.

23Ana uma a shikai ni, wu ushuku le n kadanshi ko yoku ba. Ana uma a takacikai ni, u dana sai o soꞋo atakaci feu ba. U zuwai kaci ka̱ ni e ekiye a̱ Ka̱shile vuza na u kuyaꞋan afada a mayun ayin tutu. 24A̱yi a̱ ka̱ci ka̱ ni u ɗika ta̱ unushi u tsu a ikyamba i ni a maɗanga ma atakaci, adama a na tsu kuwa̱ a̱ ubuta̱ wu unushi ka̱ta̱ ci ciya̱ ci yaꞋan wuma a̱ ubuta̱ wi ili i mayun ka̱ta̱ ci yongo a kuyaꞋan kasingai. I potso ta̱ adama a̱ untsu a̱ ni! 25N ayin a ɗe, yi ta̱ vishuwi ana nlala n na m puwa̱nka̱i. Amma gogo na i bono ta̱ a̱ ubuta̱ u Maguɓi ma̱ ɗa̱, vuza na wi a kinda wuma u ɗa̱.

Currently Selected:

1 Biturusu 2: asgNT

Highlight

Copy

Compare