ရူဝ်းမႃႉ ၵႂၢမ်းၼမ်း
ၵႂၢမ်းၼမ်း
လိၵ်ႈတြႃးပုၼ်ႈၵူၼ်းဝဵင်းရူဝ်းမႃႉ၊ၼႆႉၵေႃႉတႅမ်ႈမၼ်းပဵၼ်သြႃႇပေႃးလု၊ဢၼ်ပဵၼ်တမၢၼ်ႇၸဝ်ႈၼၼ်ႉလႄႈတႅမ်ႈမိူဝ်ႈပီၸဝ်ႈၶရိၸ်ႈ၊57-58 (A.D. 57-58) ၵႃႈတီႈဝဵင်းၵေႃးရိၼ်ႇထု၊ဢေႃႈ။ သြႃႇပေႃးလု၊တႅမ်ႈပၼ်ၵႂႃႇပုၼ်ႈတၵ်းလႆႈမႄးႁႅၼ်းသဵၼ်ႈတၢင်းဢၼ်မၼ်းဢၢင်ႈတၵ်းၵႂႃႇလႄႇထိုင်ၸိူဝ်းၸဝ်ႈဝဵင်းရူဝ်းမႃႉ၊ဢေႃႈ။ မၼ်းဢၢင်ႈဢၢၼ်းၵႂႃႇပွင်ၼႃႈၵၢၼ်သႃႇသၼႃႇၶရိၸ်ႈယၢၼ်ႇ၊ၵႃႈတီႈၼၼ်ႈၸူဝ်ႈၼိုင်ႈၶၢဝ်းၼိုင်ႈသေယဝ်ႉ၊ဢၢင်ႈယွၼ်းတၢင်းၸွႆႈထႅမ်ၵႃႈတီႈၶဝ်သေလႄႈဢၢၼ်းသိုပ်ႇၶၢဝ်းတၢင်းၵႂႃႇၸူးမိူင်းသပဵၼ်ႇ၊ပုၼ်ႉဢေႃႈ။ မၼ်းတႅမ်ႈမွၵ်ႇလၢတ်ႈၼႄလွင်ႈတြႃးတၢင်းဢၼ်ယုမ်ႇမၢတ်ႈၸဝ်ႈၶရိၸ်ႈ၊ဢိၵ်ႇတင်းလွင်ႈတၢင်းဢၼ်ၶရိၸ်ႈယၢၼ်ႇ၊ထုၵ်ႇလီၵမ်ၵျၢင်ႉၸိူဝ်ႉၼင်ႇႁိုဝ်ၼၼ်ႉဢေႃႈ။ ၵႃႈၼႂ်းၽိုၼ်လိၵ်ႈတြႃးၼၼ်ႉလၢတ်ႈလွင်ႈဢၼ်သြႃႇပေႃးလု၊ႁေႃးလၢတ်ႈၼုၵ်ႈၵပၢတ်ႈၸဝ်ႈၸေးၸေးၸုမ်ႇၸုမ်ႇဢေႃႈ။
ဝၢႆးသေဢၼ်တၵ်ႉလၢတ်ႈၸိူဝ်းၸဝ်ႈသေယဝ်ႉ၊မွၵ်ႇလၢတ်ႈလွင်ႈဢၼ်မၼ်းသူးတွင်းပုၼ်ႈၶဝ်ၼၼ်ႉယဝ်ႉၸိုင်၊သြႃႇပေႃးလု၊တၢင်ႇပျႃးလၢတ်ႈၼႄလွင်ႈႁူဝ်ႁုပ်ႈၽိုၼ်လိၵ်ႈဢၼ်ဝႃႈ၊ “ၶၢဝ်ႇငၢဝ်းတြႃးသိူဝ်းပျေႃႇၸဝ်ႈၽုၺ်ႇပျႃးလၢတ်ႈၼႄလွင်ႈဢၼ်ၽြႃးပဵၼ်ၸဝ်ႈႁဵတ်းႁႂ်ႈၵူၼ်းႁွတ်ႈထိုင်တၢင်းဢၼ်သိုဝ်ႈတေႃႇ၊ဢၼ်တႄႇၼိူဝ်တၢင်းဢၼ်ယုမ်ႇမၢတ်ႈၸဵမ်တီႈၸႃႉတေႃႇတီႈသုတ်း၊” ၼၼ်ႉဢေႃႈ။ (1:17)
သြႃႇပေႃးလု၊လၢတ်ႈသမ်ႉထႅင်ႈလွင်ႈႁူဝ်ႁုပ်ႈၽိုၼ်လိၵ်ႈဢၼ်ဝႃႈ၊ၵူၼ်းမဵဝ်းတင်းသဵင်ႈတင်းလူင်ၸႃႉၸဵမ်ၵူၼ်းမဵဝ်းၵျူး၊လႄႈၵူၼ်းတၢင်ႇၸိူဝ်ႉတၢင်ႇၶိူဝ်းလူဝ်ႇပဵၼ်ၵူၼ်းသိုဝ်ႈတေႃႇ၊ၵွပ်ႈပိူဝ်ႈၵူၼ်းတင်းလၢႆမီးတႂ်ႈဢႃႇၼႃႇဢပျတ်ႈမိူၼ်မိူၼ်ၵၼ်ၼၼ်ႉဢေႃႈ။ ၵူၼ်းတင်းလၢႆလႆႈပဵၼ်ၵူၼ်းသိုဝ်ႈတေႃႇမႃးၵႃႈၼႂ်းတၢင်းဢၼ်ယုမ်ႇမၢတ်ႈၸဝ်ႈယေႇသုၶရိၸ်ႈ၊ဢေႃႈ။ သြႃႇပေႃးလု၊သမ်ႉမွၵ်ႇလၢတ်ႈၼႄထႅင်ႈလွင်ႈၸူဝ်ႈတႃႇဢသၢၵ်ႈဢၼ်မႂ်ႇဢၼ်လႆႈပဵၼ်ၵူၼ်းသိုဝ်ႈတေႃႇၼႂ်းၸဝ်ႈၶရိၸ်ႈ၊လႄႈလႆႈၶၢမ်ႇဢဝ်ဢၵျူဝ်းတြႃးမိၵ်ႈသႁႃႇယႃႉဢၼ်မႂ်ႇၼႂ်းၽြႃးပဵၼ်ၸဝ်ႈၼၼ်ႉဢေႃႈ။ ၵူၼ်းၸိူဝ်းယုမ်ႇမၢတ်ႈတင်းလၢႆလႆႈယူႇၼိမ်လီၼႂ်းၽြႃးပဵၼ်ၸဝ်ႈ၊ဢိၵ်ႇတင်းလႆႈလွတ်ႈသေတၼ်းၶူဝ်းဢပျတ်ႈတင်းတြႃးတၢင်းတၢႆၵွပ်ႈပိူဝ်ႈဝိၺိၺ်ႇၽြႃးပဵၼ်ၸဝ်ႈဢေႃႈ။ ၵႃႈၼႂ်းဢၶၢၼ်းလူင် 5 တေႃႇ 8 ၼၼ်ႉသြႃႇပေႃးလု၊ယင်းၽုၺ်ႇၼႄၼႄးဢုပတေႇၽြႃးပဵၼ်ၸဝ်ႈ၊ဢိၵ်ႇတင်းတၼ်းၶူဝ်းဝိၺိၺ်ႇၽြႃးပဵၼ်ၸဝ်ႈပွင်ႁဵတ်းပွင်မႄးၵႃႈၼႂ်းၸူဝ်ႈတႃႇဢသၢၵ်ႈၵူၼ်းၸိူဝ်းယုမ်ႇမၢတ်ႈၼၼ်ႉဢေႃႈ။ မိူဝ်ႈၼၼ်ႉသြႃႇပေႃးလု၊သမ်ႉသပ်းလႅင်းလွင်ႈဢၼ်ၵူၼ်းမဵဝ်းၵျူး၊ၶဝ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းထိူၵ်ႈၶၢမ်ႇဢဝ်ဢၵျူဝ်းတၢင်းဢၼ်ၽြႃးပဵၼ်ၸဝ်ႈၶိုင်ပွင်ပုၼ်ႈၵူၼ်းလေႃးၵီႇတင်းလၢႆၼၼ်ႉဢေႃႈ။ မၼ်းၸဵၼ်းၸႃးထိုင်ဝႃႈၽြႃးပဵၼ်ၸဝ်ႈမီးဢၵျၢမ်ႇဢဝ်တၢင်းဢၼ်ၵူၼ်းမဵဝ်းၵျူး၊ၶဝ်ပႄႇပႅတ်ႈၸဝ်ႈယေႇသု၊ၼၼ်ႉႁႂ်ႈမဵဝ်းၵူၼ်းတင်းသဵင်ႈတင်းလူင်ႁပ်ႉၶၢမ်ႇၵျေးၸူးၽြႃးပဵၼ်ၸဝ်ႈၼႂ်းၸဝ်ႈၶရိၸ်ႈ၊လႄႈၶဝ်တၵ်းပႄႇပႅတ်ႈသေႇသေႇဢမ်ႇၸႂ်ႈၼၼ်ႉဢေႃႈ။ တီႈသုတ်းတီႈၵွႆမၼ်းတႅမ်ႈလွင်ႈၶရိၸ်ႈယၢၼ်ႇ၊တၵ်းလႆႈႁဵတ်းၸိူဝ်ႉႁိုဝ်ၼႂ်းတၢင်းဢၼ်ႁဵတ်းဝၢတ်ႈၽြႃး၊ဢိၵ်ႇတင်းဝူတ်ႈတြႃးၶရိၸ်ႈယၢၼ်ႇ၊ၼင်ႇၵၼ်ၵၼ်၊တင်းလွင်ႈၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉဢေႃႈ။ မၼ်းဢဝ်တင်းၵႂၢမ်းဢၼ်တၵ်ႉလၢတ်ႈတီႈၵေႃႉလႂ်ၵေႃႉၼၼ်ႉလႂ်တင်းတၢင်းဢၼ်ယွင်ႈယေႃးၵျေးၸူးၽြႃးပဵၼ်ၸဝ်ႈၼၼ်ႉလူပ်းၶေႃႈၵႂၢမ်းမၼ်းဢေႃႈ။
ႁူဝ်ၶေႃႈဢၼ်ၶဝ်ႈပႃးၸမ်ႉ
ၵႂၢမ်းၼမ်းဢိၵ်ႇတင်းႁူဝ်ႁုပ်ႈၽိုၼ်လိၵ်ႈ 1:1-17
ၵူၼ်းလူဝ်ႇတြႃးတၢင်းဢၼ်ၵႄႇၶျွတ်ႈဢဝ် 1:18-3:20
သဵၼ်ႈတၢင်းတြႃးတၢင်းဢၼ်ၵႄႇၶျွတ်ႈဢဝ် 3:21-4:25
ၸူဝ်ႈတႃႇဢသၢၵ်ႈဢၼ်မႂ်ႇၼႂ်းၸဝ်ႈၶရိၸ်ႈ 5:1-8:39
ၵူၼ်းမဵဝ်းဢိသရေး၊ၼႂ်းဢလူဝ်ႇၽြႃးပဵၼ်ၸဝ်ႈ 9:1-11:36
ဝုတ်ႈတြႃးၶရိၸ်ႈယၢၼ်ႇလႂ် 12:1-15:13
လူပ်းၶေႃႈၵႂၢမ်းတင်းၵႂၢမ်းတူင်ႉတၵ်ႉ 15:14-16:27
Currently Selected:
ရူဝ်းမႃႉ ၵႂၢမ်းၼမ်း: SHNCL
Highlight
Share
Compare
Copy
Want to have your highlights saved across all your devices? Sign up or sign in