ႁဵတ်းဝၢတ်ႈ 2
2
တၢင်းလူႇမၢၵ်ႇၶဝ်ႈႁူင်းၶဝ်ႈ
1“မိူဝ်ႈဢၼ်သေၵေႃႉၵေႃႉႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈတီႈထႃႇဝရႃႉၽြႃး၊ၸိုင်၊တၢင်းလူႇမၼ်းၼၼ်ႉတၵ်းလႆႈပဵၼ်ၽွင်ၶဝ်ႈၵျုင်ႇဢေႃႈ။ မၼ်းတၵ်းလႆႈဢဝ်ၼမ်ႉမၼ်းသၢၼ်ႇလုၼ်ႇႁူတ်းလေႃႇလႄႈသမ်ႉဢဝ်လေႃႇပၢၼ်ႇၽွၵ်းသႂ်ႇၵႃႈၼိူဝ်ၽွင်ၶဝ်ႈၵျုင်ႇၼၼ်ႉသေယဝ်ႉ၊- 2ဢဝ်မႃးၵႃႈတီႈလုၵ်ႈၸၢႆးဢႃႇရုၼ်ႇ၊ၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈၼၼ်ႉဢေႃႈ။ ယဵၸ်ႈပရေႃးႁဵၵ်ႈ#2:2 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈၵေႃႉဢၼ်တူၵ်းတႃႇဝုၼ်ႇၼၼ်ႉတၵ်းလႆႈဢဝ်ၽွင်ၶဝ်ႈၵျုင်ႇဢၼ်လေႃးၼမ်ႉမၼ်းဝၵ်ႉၼိုင်ႈဢိၵ်ႇတင်းလေႃႇပၢၼ်ႇၵႃႈမီးၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းလူႇပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈဢေႃႈ။ ပဵၼ်တၢင်းလူႇဢၼ်တုတ်ႇၽႆးဢၢႆႁွမ်ဢၢႆႁူၺ်းမၼ်းဢၼ်ထုၵ်ႇၸႂ်မႅၼ်ႈၸႂ်ထႃႇဝရႃႉၽြႃး၊ၼၼ်ႉဢေႃႈ။- 3တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ၵိုတ်းဢၼ်ၵျၢၼ်ႇၼၼ်ႉပဵၼ်ပုၼ်ႈယဵၸ်ႈပရေႃးႁဵၵ်ႈတင်းလၢႆလႄႈ၊ပဵၼ်ဢၼ်မူတ်းၸၢင်ႇၼႃႇလူင်လၢင်ၵွပ်ႈပိူဝ်ႈဢၼ်ဢဝ်ဢွၵ်ႇသေၵႃႈၼႂ်းမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇတီႈထႃႇဝရႃႉၽြႃး၊ၼၼ်ႉဢေႃႈ။
4“ပေႃးတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉပဵၼ်ၶဝ်ႈမုၼ်းဢၼ်ၽဝ်ၼႂ်းတဝ်ႈၽႆးၸိုင်၊မၼ်းတေဢမ်ႇလႆႈသႂ်ႇၸိူဝ်ႉပႅင်ႈ။ တၵ်းလႆႈပဵၼ်ၶဝ်ႈမုၼ်းၶႅပ်းၼႃၼႃဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇ၊ဢမ်ႇၼၼ်ၶဝ်ႈမုၼ်းၶွပ်ႈဢၼ်တႃးၼမ်ႉမၼ်းသၢၼ်ႇလုၼ်ႇၼၼ်ႉဢေႃႈ။
5“ပေႃးတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉ ပဵၼ်ၶဝ်ႈမုၼ်းၶူဝ်ႈဢၼ်ၶူဝ်ႈၼိူဝ်ၶႅပ်းလဵၵ်းၸိုင်၊တၵ်းလႆႈပဵၼ်ၽွင်ၶဝ်ႈၵျုင်ႇဢၼ်ဢမ်ႇသႂ်ႇၸိူဝ်ႉပႅင်ႈဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇဢေႃႈ။- 6တၵ်းလႆႈဝိတ်းယွႆႈသေယဝ်ႉ၊ဢဝ်ၼမ်ႉမၼ်းႁူတ်းသေလႄႈသၢၵ်ႈလူႇႁႂ်ႈပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈဢေႃႈ။
7“ပေႃးတၢင်းလူႇၼၼ်ႉပဵၼ်ၶဝ်ႈမုၼ်းၶူဝ်ႈဢၼ်ၶူဝ်ႈၼႂ်းမေႃႈၶၢင်ၸိုင်၊တၵ်းလႆႈပဵၼ်ၽွင်ၶဝ်ႈၵျုင်ႇဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇၼၼ်ႉဢေႃႈ။- 8တၵ်းလႆႈဢဝ်တၢင်းလူႇမၢၵ်ႇၶဝ်ႈႁူင်းၶဝ်ႈမဵဝ်းလႂ်သေဢမ်ႇဝႃႈမႃးတီႈထႃႇဝရႃႉၽြႃး၊သေလႄႈပၼ်ၵႃႈတီႈယဵၸ်ႈပရေႃးႁဵၵ်ႈ၊#2:8 “ယဵၸ်ႈပရေႃးႁဵၵ်ႈ” ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈ ႁႂ်ႈမၼ်းဢဝ်ၵႂႃႇၵႃႈတီႈၶဵင်ႇတၢင်းလူႇဢေႃႈ။- 9ယဵၸ်ႈပရေႃးႁဵၵ်ႈၼၼ်ႉတၵ်းဢဝ်ပုၼ်ႈၼိုင်ႈသေလႄႈတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းဢၼ်သၢၵ်ႈၵၢပ်ႈတီႈထႃႇဝရႃႉၽြႃး၊ဢေႃႈ။ ပဵၼ်တၢင်းလူႇဢၼ်တုတ်ႇၽႆးလႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ်ထႃႇဝရႃႉၽြႃး၊ဢေႃႈ။- 10ဢၼ်ၵိုတ်းဢၼ်ၵျၢၼ်ႇၼႂ်းတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉပဵၼ်ပုၼ်ႈယဵၸ်ႈပရေႃးႁဵၵ်ႈ#2:10 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈတင်းလၢႆလႄႈပဵၼ်ဢၼ်မူတ်းၸၢင်ႇၼႃႇလူင်လၢင်ၵွပ်ႈပိူဝ်ႈဢၼ်ဢဝ်ဢွၵ်ႇသေၵႃႈၼႂ်းမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇတီႈထႃႇဝရႃႉၽြႃး၊ၼၼ်ႉဢေႃႈ။
11“ၵႃႈၼႂ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သူသၢၵ်ႈလူႇတီႈထႃႇဝရႃႉၽြႃး၊ၼၼ်ႉဢမ်ႇလႆႈသႂ်ႇၸိူဝ်ႉပႅင်ႈ။ ၼႂ်းၵႃႈဢၼ်ပဵၼ်တၢင်းၵိၼ်တၢင်းၶူပ်းဢၼ်သၢၵ်ႈလူႇတီႈထႃႇဝရႃႉၽြႃး၊ၼၼ်ႉဢမ်ႇလႆႈသႂ်ႇၸိူဝ်ႉပႅင်ႈသေလႄႈတုတ်ႇၽႆး။ ၼမ်ႉၽိုင်ႈၵေႃႈ၊ဢမ်ႇလႆႈတုတ်ႇၽႆးလႃးလႃး။- 12ပေႃးဢဝ်ၸိူဝ်ႉပႅင်ႈတင်းၼမ်ႉၽိုင်ႈသွင်မဵဝ်းၼႆႉႁႂ်ႈပဵၼ်မိူၼ်ၸိူဝ်ႉၼင်ႇမၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼၼ်ႉၵေႃႈတၵ်းလႆႈဢဝ်မႃးတီႈထႃႇဝရႃႉၽြႃး၊ဢေႃႈ။ ၵူၺ်းၵႃႈ၊တၵ်းဢမ်ႇလႆႈဢဝ်တၢင်းလူႇၼၼ်ႉတုတ်ႇၽႆးၵႃႈတီႈၼိူဝ်ၶဵင်ႇတၢင်းလူႇ။- 13ၵႃႈတီႈတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉတၵ်းလႆႈသႂ်ႇၵိူဝ်ဢေႃႈ။ လွင်ႈမၼ်းၸမ်ႉ၊ၵိူဝ်ပဵၼ်ၸိူဝ်ႉၼင်ႇပတိၺိၺ်ႇဢၼ်ဝႆႉဝူင်ႈၵၢင်မႂ်းတင်းၽြႃးပဵၼ်ၸဝ်ႈဢေႃႈ။ ပိူဝ်ႈၼႆလႄႈၵႃႈဢၼ်ပဵၼ်တၢင်းလူႇမႂ်းတင်းသဵင်ႈတင်းလူင်ၼၼ်ႉတၵ်းလႆႈသႂ်ႇၵိူဝ်ဢေႃႈ။
14“ပေႃးမႂ်းဢဝ်မၢၵ်ႇဢဝ်ႁူင်းဢၼ်မၢၵ်ႇဢွၼ်တၢင်းၼၼ်ႉႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈလႄႈသၢၵ်ႈလူႇတီႈထႃႇဝရႃႉၽြႃး၊ၸိုင်၊မႂ်းတၵ်းလႆႈဢဝ်ႁူင်းၶဝ်ႈလိပ်းၶဝ်ႈၶဵဝ်ၼၼ်ႉႁၢင်းၽႆးလႄႈၼူတ်ႈဢဝ်မဵတ်ႉမၼ်းၼၼ်ႉႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇမၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼၼ်ႉဢေႃႈ။- 15မႂ်းတၵ်းလႆႈဢဝ်ၼမ်ႉမၼ်းသၢၼ်ႇလုၼ်ႇႁူတ်းသႂ်ႇလႄႈဢဝ်လေႃႇပၢၼ်ႇသႂ်ႇပႃးဢေႃႈ။ ဢၼ်ၼၼ်ႉပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈဢေႃႈ။- 16ယဵၸ်ႈပရေႃးႁဵၵ်ႈတၵ်းလႆႈဢဝ်မဵတ်ႉၶဝ်ႈဢၼ်ၼူတ်ႈဢဝ်ၼၼ်ႉပုၼ်ႈၼိုင်ႈတင်းၼမ်ႉမၼ်းၵမ်ႈၽွင်ႈဢိၵ်ႇတင်းလေႃႇပၢၼ်ႇၵႃႈမီးၼၼ်ႉတုတ်ႇၽႆးပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈဢေႃႈ။ ပဵၼ်တၢင်းလူႇဢၼ်ဢဝ်တင်းၽႆးသၢၵ်ႈလူႇတီႈထႃႇဝရႃႉၽြႃး၊ဢေႃႈ။
Currently Selected:
ႁဵတ်းဝၢတ်ႈ 2: SHNCL
Highlight
Share
Copy
Want to have your highlights saved across all your devices? Sign up or sign in
