ဢွၵ်ႇၵႂႃႇ 13

တၢင်းဢၼ်ဢဝ်လုၵ်ႈတူၼ်ႈသၢၵ်ႈၵၢပ်ႈ

1 ထႃႇဝရႃႉၽြႃး၊မီးဢမိင်ႉတီႈမူဝ်းသေႇ၊လႄႈဝႃႈ၊- 2“ဢဝ်လုၵ်ႈၸၢႆးတူၼ်ႈၵႃႈမီးတင်းသဵင်ႈတင်းလူင်သၢၵ်ႈၵၢပ်ႈၵဝ်တႃႉ။ လွင်ႈမၼ်းၸမ်ႉ၊ၼႂ်းၵူၼ်းမဵဝ်းဢိသရေး၊ၸိူဝ်းၼၼ်ႉၵႃႈဢၼ်ပဵၼ်လုၵ်ႈတူၼ်ႈၵူၼ်းၸၢႆး၊ဢိၵ်ႇတင်းလုၵ်ႈတူၼ်ႈတူဝ်ပေႃႈၼႂ်းတရိၵ်ႈသၢၼ်ႇပဵၼ်ဢုၵ်ႉၸႃႇၵဝ်တင်းမူတ်းဢေႃႈ၊” ဝႃႈၼင်ႇၼႆဢေႃႈ။

ပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈ

3 မူဝ်းသေႇ၊လၢတ်ႈတီႈၵူၼ်းတင်းလၢႆလႄႈဝႃႈ၊ “ဢွၼ်ၵၼ်ၶုၵ်းၸႂ်လႆႈဝၼ်းဢၼ်သူလႆႈဢွၵ်ႇမိူင်းဢေးၵျိပ်ႉ၊တီႈဢၼ်သူလႆႈၶၢမ်ႇပဵၼ်ၶႃႈမႃးၼၼ်ႉတႃႉ။ ဝၼ်းၼႆႉပဵၼ်ဝၼ်းဢၼ်ထႃႇဝရႃႉၽြႃး၊ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်သူဢွၵ်ႇမႃးယဝ်ႉ။ သူဢမ်ႇလႆႈၵိၼ်ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉ။- 4သူဢွၵ်ႇမႃးၼႂ်းလိူၼ်ဢပိပႃႉ#“လိူၼ်ဢပိပႃႉ” ပဵၼ်ၸိုဝ်ႈလိူၼ်ၵူၼ်းမဵဝ်းႁေႇပြႄးလႄႈ ပဵၼ်လိူၼ်ဢၼ်မီးၵႃႈၼႂ်းဝူင်ႈၵၢင်လိူၼ်သီႇတင်းလိူၼ်ႁႃႈတႆးၼႂ်းဝၼ်းၼႆႉယဝ်ႉ။- 5ထႃႇဝရႃႉၽြႃး၊ႁဵတ်းၵတိသဵတ်ႈၸႃႇတီႈပူႇမွၼ်ႇသူဝႆႉ၊ႁႂ်ႈလႆႈဢဝ်မိူင်းဢၼ်ၵူၼ်းမဵဝ်းၶႃႇၼၼိ၊ၵူၼ်းမဵဝ်းႁိတ်ႉတိ၊ၵူၼ်းမဵဝ်းဢႃႇမေႃးရိ၊ၵူၼ်းမဵဝ်းႁိဝိ၊ၵူၼ်းမဵဝ်းယေႇပုသိ၊ၶဝ်ပိူင်ႇၼၼ်ႉပၼ်သူဢေႃႈ။ မိူဝ်ႈဢၼ်မၼ်းၸဝ်ႈဢဝ်သူသူင်ႇထိုင်၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ#13:5 “မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ” ၵႃႈၼႂ်းၵျၢမ်းမူႇၶူႇသျိင်ႇႁွင်ႉဝႃႈ၊ “မိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆ”ၼၼ်ႉၵႂႃႇယဝ်ႉၸိုင်၊သူတၵ်းလႆႈႁဵတ်းပွႆးၼႆႉၼႂ်းငဝ်ႈလိူၼ်ၼႆႉၵူႈပီၵူႈပီဢေႃႈ။- 6ၼႂ်းၸူဝ်ႈၸဵတ်းဝၼ်းၼႆႉသူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈလႄႈ၊ၼႂ်းဝၼ်းတီႈၸဵတ်းၼၼ်ႉသူသမ်ႉတၵ်းလႆႈႁဵတ်းပွႆးပုၼ်ႈထႃႇဝရႃႉၽြႃး၊ဢေႃႈ။- 7တၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈတင်းၸဵတ်းဝၼ်းဢေႃႈ။ တီႈသူတေဢမ်ႇလႆႈမီးၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉလႃးလႃး။ တီႈဢၼ်သူယူႇၵူႈတီႈၵူႈလႅၼ်ၼၼ်ႉၵေႃႈ ဢမ်ႇလႆႈမီးၸိူဝ်ႉပႅင်ႈလႃးလႃး။- 8ၼႂ်းဝၼ်းၼၼ်ႉသူတၵ်းလႆႈမွၵ်ႇလၢတ်ႈၼႄလုၵ်ႈလၢၼ်သူလႄႈဝႃႈ၊ ‘ဢၼ်ၼႆႉၸမ်ႉ၊ပဵၼ်ၵွပ်ႈပိူဝ်ႈၵျေးၸူးဢၼ်ထႃႇဝရႃႉၽြႃး၊ႁဵတ်းပုၼ်ႈႁဝ်းၼႂ်းမိူဝ်ႈဢၼ်ႁဝ်းဢွၵ်ႇမိူင်းဢေးၵျိပ်ႉ၊မႃးၼၼ်ႉဢေႃႈ။- 9ဢၼ်ၼႆႉတၵ်းလႆႈပဵၼ်လၢၵ်ႈၶၼႃႇဢၼ်ပဵၼ်ၸိူဝ်ႉၼင်ႇသၢၵ်ႈသေႇသေမဵဝ်းမဵဝ်းမတ်ႉၸပ်းတီႈၶႅၼ်ဝႆႉ၊ဢမ်ႇၼၼ်ၵေႃႈတီႈၼႃႈၽၢၵ်ႇဝႆႉလႄႈသူတၵ်းလႆႈလၢတ်ႈတြႃးၽြႃးပဵၼ်ၸဝ်ႈယူႇသေႇသေႇဢေႃႈ။ လွင်ႈမၼ်းၸမ်ႉ၊ထႃႇဝရႃႉၽြႃး၊ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်သူဢွၵ်ႇသေမိူင်းဢေးၵျိပ်ႉ၊မႃးၼၼ်ႉဢေႃႈ။- 10ပိူဝ်ႈၼႆလႄႈ၊မိူဝ်ႈဢၼ်ၶွပ်ႈၶူပ်ႇထိုင်ၶိင်ႇမၼ်းၸိုင်၊သူတၵ်းလႆႈႁဵတ်းၸွမ်းထုင်းၽိင်ႈတြႃးၼႆႉၵူႈပီၵူႈပီဢေႃႈ။-

လွင်ႈလုၵ်ႈတူၼ်ႈ

11“ထႃႇဝရႃႉၽြႃး၊တၵ်းဢွၼ်သူင်ႇသူၶဝ်ႈၼႂ်းမိူင်းၵူၼ်းမဵဝ်းၶႃႇၼၼိ၊မႅၼ်ႈၸွမ်းၵႃႈၼင်ႇဢၼ်မၼ်းၸဝ်ႈႁဵတ်းၵတိသဵတ်ႈၸႃႇတီႈသူ၊ဢိၵ်ႇတင်းတီႈပူႇမွၼ်ႇသူပုၼ်ႉဢေႃႈ။ မိူဝ်ႈဢၼ်ဢဝ်မိူင်းၼၼ်ႉပၼ်တီႈသူယဝ်ႉၼၼ်ႉၸိုင်၊- 12သူတၵ်းလႆႈၽႄဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ဢိၵ်ႇတင်းလုၵ်ႈတူၼ်ႈတူဝ်တရိၵ်ႈသၢၼ်ႇဢၼ်မီးတီႈသူတင်းသဵင်ႈတင်းလူင်ၼၼ်ႉဢဝ်ၸတ်းၽႄဝႆႉၶေႃၶေႃ၊ပုၼ်ႈထႃႇဝရႃႉၽြႃး၊ဢေႃႈ။ ၵႃႈဢၼ်ပဵၼ်လုၵ်ႈတူၼ်ႈတူဝ်ပေႃႈတင်းသဵင်ႈတၵ်းလႆႈပဵၼ်ဢုၵ်ႉၸႃႇထႃႇဝရႃႉၽြႃး၊ဢေႃႈ။- 13လုၵ်ႈတူၼ်ႈတူဝ်ပေႃႈဢၼ်ၵိူတ်ႇလဵင်ႉမႃးၵႃႈတီႈလီႈမႄႈၼၼ်ႉၸိုင်၊တၵ်းလႆႈဢဝ်သူဝ်းဢွၼ်ႇထုတ်ႇဢဝ်ဢေႃႈ။ ပေႃးဢမ်ႇၶႂ်ႈထုတ်ႇဢဝ်ၸိုင်၊ႁၵ်းၶေႃးလီႈဢွၼ်ႇၼၼ်ႉပႅတ်ႈတႃႉ။ ၵႃႈဢၼ်ပဵၼ်လုၵ်ႈတူၼ်ႈၵူၼ်းၵႃႈၼႂ်းလုၵ်ႈၸၢႆးသူတင်းလၢႆၸိုင်၊သူတၵ်းလႆႈၶိုၼ်းထုတ်ႇဢဝ်ၵူႈၵေႃႉဢေႃႈ။- 14ဝၢႆးလိုၼ်းမိူဝ်းၼႃႈမႃးပေႃးလုၵ်ႈလၢၼ်သူထၢမ်လွင်ႈဢၼ်ပႂ်ႉထိင်းထုင်းၽိင်ႈတြႃးၼႆႉပဵၼ်လွင်ႈသင်ဝႃႈၼႆၸိုင်၊သူတၵ်းလႆႈၶိုၼ်းလၢတ်ႈၼႄလႄႈဝႃႈ၊ ‘ထႃႇဝရႃႉၽြႃး၊ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်ႁဝ်းဢွၵ်ႇမိူင်းဢေးၵျိပ်ႉ၊တီႈဢၼ်ႁဝ်းလႆႈၶၢမ်ႇပဵၼ်ၶႃႈမႃးၼၼ်ႉဢေႃႈ။- 15မိူဝ်ႈဢၼ်ၶုၼ်ႁေႃၶမ်းဢမ်ႇပွႆႇႁဝ်းငၢႆႈငၢႆႈၸိုင်၊ထႃႇဝရႃႉၽြႃး၊ဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ၸႃႉၸဵမ်လုၵ်ႈတူၼ်ႈၵူၼ်းလႄႈလုၵ်ႈတူၼ်ႈတရိၵ်ႈသၢၼ်ႇဢၼ်မီးၵႃႈၼႂ်းမိူင်းဢေးၵျိပ်ႉ၊ၸိူဝ်းၼၼ်ႉတၢႆပႅတ်ႈဢေႃႈ။ ပိူဝ်ႈၼႆလႄႈႁဝ်းလႆႈဢဝ်လုၵ်ႈတူၼ်ႈတူဝ်ပေႃႈသတ်းတရိၵ်ႈသၢၼ်ႇတင်းသဵင်ႈတင်းလူင်သၢၵ်ႈလူႇတီႈထႃႇဝရႃႉၽြႃး၊ယဝ်ႉဢေႃႈ။ ၵူၺ်းၵႃႈ၊ႁဝ်းတၵ်းလႆႈၶိုၼ်းထုတ်ႇဢဝ်လုၵ်ႈတူၼ်ႈႁဝ်းတင်းလၢႆဢေႃႈ။- 16ဢၼ်ၼႆႉၸင်ႇလႆႈပဵၼ်လၢၵ်ႈၶၼႃႇဢၼ်ပဵၼ်ၼင်ႇသၢၵ်ႈသေႇသေမဵဝ်းမဵဝ်းဢၼ်မတ်ႉၸပ်းတီႈၶႅၼ်၊ဢမ်ႇၼၼ်ၵေႃႈတီႈၼႃႈၽၢၵ်ႇဝႆႉဢေႃႈ။ တၢင်းဢၼ်ပႂ်ႉထိင်းထုင်းၽိင်ႈတြႃးၼႆႉပဵၼ်တၢင်းဢၼ်ၶုၵ်းၸႂ်လႆႈလွင်ႈဢၼ်ထႃႇဝရႃႉၽြႃး၊ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်ႁဝ်းဢွၵ်ႇမိူင်းဢေးၵျိပ်ႉ၊မႃးၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။

သဝ်မွၵ်ႇၵုမ်ႈလႄႈသဝ်ၽႆး

17မိူဝ်ႈဢၼ်ၶုၼ်ႁေႃၶမ်းပွႆႇၵူၼ်းၸိူဝ်းၼၼ်ႉၵႂႃႇယဝ်ႉၼၼ်ႉ၊ထႃႇဝရႃႉၽြႃး၊ယင်းဢမ်ႇဢဝ်ၶဝ်ၵႂႃႇၸွမ်းသဵၼ်ႈတၢင်းဢၼ်လတ်းၶဝ်ႈမိူင်းၽိလိတ်ႉတိ၊ၼၼ်ႉ။ ပိၵ်ႉသမ်ႉမၼ်းပဵၼ်တၢင်းလတ်းသေၵေႃႈထႃႇဝရႃႉၽြႃး၊ထၢင်ႇၼႂ်းၸႂ်ဝႃႈ၊ “ၵူၼ်းၸိူဝ်းၼၼ်ႉပေႃးၶဝ်ထူပ်းၼႃႈသိုၵ်းၸိုင်၊ၶဝ်တၵ်းၸႂ်လုလႄႈ၊ၵူဝ်ၶဝ်ၶိုၼ်းပွၵ်ႈမိူဝ်းမိူင်းဢေးၵျိပ်ႉ၊ၵႂႃႇဢေႃႈ၊” ဝႃႈၼင်ႇၼႆဢေႃႈ။- 18ပိူဝ်ႈၼႆလႄႈၽြႃးပဵၼ်ၸဝ်ႈဢွၼ်ၶဝ်လဵပ်ႈၵႂႃႇၼႂ်းတၢင်းထိူၼ်ႇလႅင်ႉ ၸွမ်းႁိမ်းပၢင်ႇလၢႆႇလႅင်၊ဢေႃႈ။ ၵူၼ်းမဵဝ်းဢိသရေး၊ၸိူဝ်းၼၼ်ႉႁၢင်ႈႁႅၼ်းႁဵတ်းပဵၼ်တပ်ႉပဵၼ်ငႃးသေလႄႈဢွၵ်ႇၵႂႃႇဢေႃႈ။

19 မူဝ်းသေႇ၊ဢဝ်လုပ်ႇယူဝ်းသႅပ်ႈ၊ပႃးၸွမ်းမၼ်းၵႂႃႇ၊ၵွပ်ႈပိူဝ်ႈယူဝ်းသႅပ်ႈ၊ႁႂ်ႈၵူၼ်းမဵဝ်းဢိသရေး၊တင်းလၢႆတိူင်ႇၵၢဝ်ႇဝႆႉတိတႄႉတႄႉဝႃႈဝႃႈလႄႈဝႃႈ၊ “ၼႂ်းမိူဝ်ႈဢၼ်ၽြႃးပဵၼ်ၸဝ်ႈၵႄႇၼုၵ်ႈဢဝ်ၶဝ်ဢွၵ်ႇၵႂႃႇၸိုင်၊ၶဝ်တၵ်းလႆႈဢဝ်ပႃးလုပ်ႇမၼ်းဢွၵ်ႇသေၵႃႈတီႈၼႆႈၵႂႃႇၸွမ်းၶဝ်ၼၼ်ႉဢေႃႈ၊” ဝႃႈၼင်ႇၼႆဝႆႉၼၼ်ႉဢေႃႈ။

20ၵူၼ်းမဵဝ်းဢိသရေး၊ၸိူဝ်းၼၼ်ႉဢွၵ်ႇသေၵႃႈတီႈဢိူင်ႇသုၵုတ်ႉ၊ၵႂႃႇလႄႈၶျႃးပၢင်ၵႃႈတီႈဝဵင်းဢေးႀမ်ႇ၊ၵႃႈႁိမ်းလႅၼ်လိၼ်ထိူၼ်ႇလႅင်ႉဢေႃႈ။- 21ထႃႇဝရႃႉၽြႃး၊ၵေႃႈ၊ၼႂ်းၶိင်ႇၵၢင်ဝၼ်းၸိုင်၊ဢဝ်သဝ်မွၵ်ႇၵုမ်ႈၵႂႃႇပႃႈၼႃႈၶဝ်၊ပုၼ်ႈဢၼ်တၵ်းၼႄတၢင်းၶဝ်ဢေႃႈ။ ၼႂ်းၶိင်ႇၵၢင်ၶိုၼ်းၸမ်ႉ၊ဢဝ်သဝ်ၽႆးၵႂႃႇပႃႈၼႃႈၶဝ်၊ပုၼ်ႈဢၼ်တၵ်းပၼ်ဢၼ်လႅင်းၶဝ်ဢေႃႈ။ ပိူဝ်ႈၼႆလႄႈၶဝ်ၸၢင်ႈၵႂႃႇၼႂ်းၶိင်ႇၵၢင်ဝၼ်းဢိၵ်ႇတင်းၼႂ်းၶိင်ႇၵၢင်ၶိုၼ်းဢေႃႈ။- 22သဝ်မွၵ်ႇၵုမ်ႈဢွၼ်ႁူဝ်ၼႄတၢင်းၶဝ်ၼႂ်းၶိင်ႇၵၢင်ဝၼ်းလႄႈ၊သဝ်ၽႆးသမ်ႉဢွၼ်ႁူဝ်ၼႄတၢင်းၶဝ်ၼႂ်းၶိင်ႇၵၢင်ၶိုၼ်းၸိူဝ်ႉၼင်ႇၼႆဢမ်ႇထၢတ်ႇဢမ်ႇသဝ်းသေၵႃႈတီႈၵူၼ်းၸိူဝ်းၼၼ်ႉသေပွၵ်ႈဢေႃႈ။

Currently Selected:

ဢွၵ်ႇၵႂႃႇ 13: SHNCL

Highlight

Copy