တမၢၼ်ႇ 16

တိမေႃးသေႇၵႂႃႇၸွမ်းသြႃႇပေႃးလုတင်းသီႇလႃႉ

1သြႃႇပေႃးလု၊ၵႂႃႇႁွတ်ႈၵႃႈတီႈဝဵင်းတေႇရပေႇ၊ဢိၵ်ႇတင်းဝဵင်းလုတ်ႉတရႃႉ၊ဢေႃႈ။ တီႈၼၼ်ႈ၊မီးၶရိၸ်ႈယၢၼ်ႇၵေႃႉၼိုင်ႈဢၼ်လႆႈၸိုဝ်ႈတိမေႃးသေႇ၊ဢေႃႈ။ မႄႈမၼ်းပဵၼ်ၶရိၸ်ႈယၢၼ်ႇၵူၼ်းမဵဝ်းၵျူး၊ဢေႃႈ။ ပေႃႈမၼ်းၸမ်ႉ၊ပဵၼ်ၵူၼ်းမဵဝ်းၵရိၵ်ႉ၊ဢေႃႈ။- 2မၼ်းၼၼ်ႉ၊ပဵၼ်ၵူၼ်းဢၼ်မီးသရေႇၼႂ်းၵႄႈတပႄးၸဝ်ႈ၊ဝဵင်းလုတ်ႉတရႃႉ၊ဢိၵ်ႇတင်းဝဵင်းဢိၵေႃးၼိ၊ၸိူဝ်းၼၼ်ႉဢေႃႈ။- 3သြႃႇပေႃးလု၊ၶႂ်ႈႁွင်ႉဢဝ်မၼ်းၸွမ်းၵႂႃႇလႄႈၸင်ႇႁဵတ်းမၢင်ႇၵလႃႇတၢင်းဢၼ်ပၢတ်ႇပၢႆၼင်တီႈမၼ်းဢေႃႈ။ သြႃႇပေႃးလု၊ႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈၵူၼ်းမဵဝ်းၵျူး၊ဢၼ်မီးတီႈၼၼ်ႈ၊ႁုလွင်ႈဢၼ်ပေႃႈတိမေႃးသေႇ၊ၶဝ်ပဵၼ်ၵူၼ်းမဵဝ်းၵရိၵ်ႉ၊ၼၼ်ႉဢေႃႈ။- 4ၼႂ်းမိူဝ်ႈဢၼ်ၶဝ်လႄႇၵႂႃႇၵႃႈတီႈဝဵင်းၸိူဝ်းၼၼ်ႉၸိုင်၊ၶဝ်ဢဝ်ပိင်းၺၢပ်ႈၸိူဝ်းဢၼ်တမၢၼ်ႇၸဝ်ႈ၊ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢၼ်ယူႇတီႈဝဵင်းယေႇရုသလႅမ်ႇ၊ၶိုင်ပွင်ဝႆႉၼၼ်ႉ၊မွၵ်ႇလၢတ်ႈပၼ်ႁႂ်ႈၸိူဝ်းၸဝ်ႈၵမ်ၵျၢင်ႉၸွမ်းဢေႃႈ။- 5ပိူဝ်ႈၼႆလႄႈၸိူဝ်းၸဝ်ႈတင်းလၢႆၼၼ်ႉ၊တၢင်းယုမ်ႇမၢတ်ႈၶဝ်တႄႇဝႆႉမၼ်ႈၶိူင်ႇယူႇလႄႈၵူၼ်းၶဝ်ႈမႃးၵေႃႈယဵင်ႈၶႅၼ်းၼမ်မႃးၵိုၼ်းမႃးၵူႈဝၼ်းယူႇဢေႃႈ။

ၼႂ်းဝဵင်းထရေႃးသြႃႇပေႃးလုလႆႈပျႃႇတိၵ်ႈ

6ၶဝ်လႄႇၵႂႃႇၼႂ်းမိူင်းၽရုၵိ၊ဢိၵ်ႇတင်းၼႂ်းမိူင်းၵလႃႇတိ၊ၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈဢမ်ႇပၼ်ဢၶႂၢင်ႉ၊ႁႂ်ႈၶဝ်ႁေႃးတြႃးၸဝ်ႈၵႃႈၼႂ်းမိူင်းဢႃႇသိ၊ၼၼ်ႉဢေႃႈ။- 7မိူဝ်ႈဢၼ်ၶဝ်ႁွတ်ႈထိုင်ၵႃႈတီႈလႅၼ်လိၼ်မိူင်းမုသိယႃႉ၊လႄႈၶဝ်ဢၢင်ႈတၵ်းၵႂႃႇၵႃႈတီႈမိူင်းပိသုၼိ၊ၼၼ်ႉၸိုင်၊ဝိၺိၺ်ႇၸဝ်ႈယေႇသု၊ဢမ်ႇပၼ်ဢၶႂၢင်ႉတီႈၶဝ်။- 8ပိူဝ်ႈၼႆၸင်ႇ၊ၶဝ်ဝႄႈပႅတ်ႈ ဝဵင်းမုသိယႃႉ၊လူင်းၵႂႃႇၵႃႈတီႈဝဵင်းထရေႃး၊သေဢေႃႈ။- 9ၶိုၼ်းၼၼ်ႉ၊သြႃႇပေႃးလု၊လႆႈပျႃႇတိၵ်ႈၼိမိၵ်ႈဢၼ်ႁၼ်ၵူၼ်းမိူင်းမႃႇၵေႇတေႃးၼိ၊ၵေႃႉၼိုင်ႈ၊ၸုၵ်းယူႇသေလႄႈတွင်းပၢၼ်ႇမၼ်းလႄႈဝႃႈ၊ “ၶၢမ်ႈမႃးၵႃႈတီႈမိူင်းမႃႇၵေႇတေႃးၼိ၊ၼႆႉလႄႈၸွႆႈထႅမ်ႁဝ်းၶႃႈသေၵမ်း၊” ဝႃႈၼင်ႇၼႆၼၼ်ႉဢေႃႈ။- 10မိူဝ်ႈဢၼ်သြႃႇပေႃးလု၊လႆႈႁၼ်ပျႃႇတိၵ်ႈၼိမိၵ်ႈၼၼ်ႉ၊ပိူဝ်ႈဢၼ်ႁဝ်းပွင်ႇၸႂ် ဝႃႈ၊ၽြႃးပဵၼ်ၸဝ်ႈႁွင်ႉဢဝ်ႁဝ်း၊ႁႂ်ႈလႆႈႁေႃးၶၢဝ်ႇတြႃးသိူဝ်းပျေႃႇၸဝ်ႈၵႃႈတီႈၼၼ်ႈ၊ၼၼ်ႉလႄႈ ႁဝ်းႁႅၼ်းႁႂ်ႈလႆႈဢွၵ်ႇၵႂႃႇၸူးမိူင်းမႃႇၵေႇတေႃးၼိ၊ၵမ်းလဵဝ်ဢေႃႈ။

ၼႂ်းဝဵင်းၽိလိပ်ႉပိ၊လုတိလႆႈယုမ်ႇမၢတ်ႈ

11ႁဝ်းဢွၵ်ႇသေၵႃႈတီႈဝဵင်းထရေႃး၊ၶီႇႁိူဝ်းသၢင်းၽေႃးၶၢမ်ႈၵႂႃႇၸူးၵုၼ်သမေႃးထရိတ်ႉ၊လႄႈၼႂ်းဝၼ်းမိူဝ်ႈၽုၵ်ႈသမ်ႉၵႂႃႇၸူးတီႈဝဵင်းၼႃႇပေႃးလိ၊ဢေႃႈ။- 12လုၵ်ႉသေၵႃႈတီႈၼၼ်ႈသမ်ႉၵႂႃႇၵႃႈၼႂ်းမိူင်းလႄႈႁွတ်ႈထိုင်ၵႂႃႇၼႂ်းဝဵင်းၽိလိပ်ႉပိ၊ဢၼ်ပဵၼ်ဝဵင်းလူင်တီႈဢိူင်ႇၼိုင်ႈ၊ၼႂ်းမိူင်းမႃႇၵေႇတေႃးၼိ၊လႄႈသမ်ႉပဵၼ်ဝဵင်းဢၼ်ရူဝ်းမႃႉ၊ၶဝ်ဢုပ်ႉပိူင်ႇၼၼ်ႉသေယဝ်ႉ၊ယူႇၵႃႈတီႈၼၼ်ႈႁိုင်တၢၼ်ႇတၢၼ်ႇဢေႃႈ။- 13ၼႂ်းဝၼ်းၵမ်သိၼ်ႁဝ်းဢွၵ်ႇဝဵင်းၵႂႃႇၸူးၵႃႈတီႈ၊ႁိမ်းၽင်ႇၼမ်ႉႁွင်ႈတီႈဢၼ်ႁဝ်းထၢင်ႇတၵ်းမီးၵူၼ်းမဵဝ်းၵျူး၊ၶဝ်ၸုတုမ်လႄႈႁဵတ်းသူးတွင်းပထၼႃႇၼၼ်ႉဢေႃႈ။- 14ႁဝ်းၼင်ႈလႄႈဢုပ်ႇၵုမ်မႄႈယိင်းၸိူဝ်းဢၼ်ၸုတုမ်ယူႇတီႈၼၼ်ႈလႄႈၵႃႈၼႂ်းၶဝ်ၸိူဝ်းဢၼ်ထွမ်ႇဢဝ်ႁဝ်းၼၼ်ႉ၊မီးလုတိ၊မႄႈယိင်းဝဵင်းသွႃႇတီႇရေႇ၊ၵႃႉၶၢႆၶူဝ်းလဵင်းဢၼ်လႅင်ၵမ်ႇယူႇလႄႈပဵၼ်ၵေႃႉဢၼ်ၵူဝ်းၵႂၢႆႇၽြႃးပဵၼ်ၸဝ်ႈယူႇၼၼ်ႉသေယဝ်ႉ၊ၽြႃးပဵၼ်ၸဝ်ႈၽုၺ်ႇပိုတ်ႇႁူဝ်ၸႂ်မၼ်းႁႂ်ႈမၼ်းပႃးၸႂ်ပႃးၶေႃးထွမ်ႇဢဝ်တြႃးဢၼ်သြႃႇပေႃးလု၊ႁေႃးလၢတ်ႈၼၼ်ႉဢေႃႈ။- 15ဝၢႆးသေမၼ်း၊ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ#16:15 “ပပ်ႉတိၸမ်ႇ” - မၢင်ႇၵလႃႇတၢင်းၸူမ်ၼမ်ႉယဝ်ႉၼၼ်ႉၸိုင်၊မၼ်းႁွင်ႉပၢင်းႁဝ်းလႄႈဝႃႈ၊ “ပေႃးသူၸဝ်ႈမၢတ်ႈၵဝ်ၶႃႈပဵၼ်ၵေႃႉဢၼ်ယုမ်ႇမၢတ်ႈၸဝ်ႈၽြႃးဢမၢၼ်ႇၶၼ်ပဵၼ်ၸိုင်၊မႃးယူႇသဝ်းၵႃႈၼႂ်းႁိူၼ်းၵဝ်ၶႃႈသေၵမ်းၶႃႈ၊” ဝႃႈၼင်ႇၼႆၸူဝ်းဢဝ်ႁဝ်းဢေႃႈ။

လႆႈတူၵ်းထွင်ႇၼႂ်းဝဵင်းၽိလိပ်ႉပိ

16ဝၼ်းၼိုင်ႈ၊မိူဝ်ႈဢၼ်ႁဝ်းယင်းတိုၵ်ႉၵႂႃႇၸူးတီႈဢၼ်ႁဵတ်းသူးတွင်းပထၼႃႇယူႇၼၼ်ႉၸိုင်၊ၶႃႈမႄႈယိင်းဢွၼ်ႇၼၼ်ႉၵေႃႉၼိုင်ႈၽီၶဝ်ႈလႄႈၸၢင်ႈႁေႃးလွင်ႈဢၼ်တၵ်းပဵၼ်မႃးၼႂ်းဝၼ်းမိူဝ်းၼႃႈၼၼ်ႉသေလႄႈႁႂ်ႈၸဝ်ႈမၼ်းတင်းလၢႆလႆႈငိုၼ်းၼမ်ၼႃႇၼၼ်ႉ၊ႁႄႉႁပ်ႉႁူဝ်တၢင်းႁဝ်းဢေႃႈ။- 17မၼ်းၸွမ်းလင်သြႃႇပေႃးလု၊တင်းႁဝ်းလႄႈႁွင်ႉပၢဝ်ႇႁွင်ႉသေႃႇလႄႈဝႃႈ၊ “ၵူၼ်းၸိူဝ်းၼႆႉပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈ၊ဢၼ်သုင်ၼႃႇသေပိူၼ်ႈၼၼ်ႉလႄႈႁေႃးလၢတ်ႈသဵၼ်ႈတၢင်းတြႃးဢၼ်ၵႄႇၶျွတ်ႈတီႈသူဢေႃႈ၊” ဝႃႈၼင်ႇၼႆဢေႃႈ။- 18မၼ်းႁဵတ်းၸိူဝ်ႉၼင်ႇၼၼ်မိုဝ်ႉဝၼ်းၼမ်ၼႃႇတေႃႇထိုင်ႁွတ်ႈသြႃႇပေႃးလု၊မီးၸႂ်ဢၼ်သုၵ်ႉသၢၵ်ႉလႄႈ ၸင်ႇဝၢႆႇၼႃႈလႄႈလၢတ်ႈတီႈၽီၼၼ်ႉဝႃႈ၊ “ၵဝ်ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈယေႇသုၶရိၸ်ႈ၊လႄႈမီးဢမိင်ႉတီႈမႂ်းႁႂ်ႈဢွၵ်ႇသေၵႃႈၼႂ်းမၼ်းၵႂႃႇတႃႉ၊” ဝႃႈၼင်ႇၼႆလႄႈၽီၼၼ်ႉဢွၵ်ႇၵႂႃႇၵမ်းလဵဝ်ဢေႃႈ။- 19ၸဝ်ႈမၼ်းၸိူဝ်းၼၼ်ႉ၊မိူဝ်ႈဢၼ်ႁုႁၼ်လွင်ႈဢၼ်ၶဝ်ဢမ်ႇၸၢင်ႈတေႁဵတ်းႁႂ်ႈလႆႈၵိၼ်ၸွမ်းမၼ်းထႅင်ႈၼၼ်ႉၸိုင်၊ၶဝ်တိဢဝ်သြႃႇပေႃးလု၊တင်းသီႇလႃႉ၊လႄႈတိုတ်ႉၸၼ်ၵႂႃႇၸူးတီႈၶုၼ်ဢႃႇၼႃႇတင်းလၢႆၵႃႈတီႈပၢင်တုမ်ၵူၼ်းဝဵင်းဢေႃႈ။- 20ၶဝ်ႁွတ်ႈၵႂႃႇၵႃႈတီႈၶုၼ်တႅပ်းတတ်းတြႃးၶဝ်လႄႈလဝ်ႈလၢတ်ႈလႄႈဝႃႈ၊ “ၵူၼ်းၸိူဝ်းၼႆႉပဵၼ်ၵူၼ်းမဵဝ်းၵျူး၊လႄႈၸၢင်ႈယႃႉယုၵ်ႉဝဵင်းႁဝ်းၼႆႉၶႃႈဢေႃႈ။- 21ၶဝ်သွၼ်ပၼ်ထုင်းၸၢမ်ႇဢၼ်ၶတ်းၵၼ်တင်းထုင်းဢုပတေႇႁဝ်းဢေႃႈ။ ႁဝ်းၼႆႉပဵၼ်ၵူၼ်းမိူင်းရူဝ်းမႃႉ၊လႄႈထုင်းၸၢမ်ႇၶဝ်ၼၼ်ႉ၊ႁဝ်းဢမ်ႇၶၢမ်ႇဢမ်ႇဢဝ်လႆႈဢမ်ႇၵမ်ၵျၢင်ႉၸွမ်းလႆႈၶႃႈ၊” ဝႃႈၼင်ႇၼႆဢေႃႈ။- 22မူႇၵူၼ်းတင်းလၢႆၽွမ်ႉၸႂ်ၵၼ်လုၵ်ႉၽိုၼ်ႉတေႃႇသြႃႇပေႃးလု၊ဢိၵ်ႇတင်းသီႇလႃႉ၊ဢေႃႈ။

ၶုၼ်ၸိူဝ်းၼၼ်ႉ၊ထွတ်ႇပႅတ်ႈၶူဝ်းၼုင်ႈသြႃႇပေႃးလု၊ဢိၵ်ႇတင်းသီႇလႃႉ၊လႄႈသိၵ်ႇပႅတ်ႈသေယဝ်ႉ၊ပၼ်ဢမိင်ႉႁႂ်ႈဢဝ်ၶွၼ်ႉပေႃႉယႅၼ်ႉဢေႃႈ။- 23ဝၢႆးသေပေႃႉယႅၼ်ႉၼမ်ၼႃႇလူင်လၢင်ယဝ်ႉၸင်ႇ၊ၶင်ၶဝ်ဝႆႉၵႃႈၼႂ်းထွင်ႇလႄႈပၼ်ဢမိင်ႉတီႈထွင်ႇမူးႁႂ်ႈၶတ်းၽၵ်းတူဝႆႉၼႅၼ်ႈၼႅၼ်ႈဢေႃႈ။- 24ၵႃႈၼင်ႇဢၼ်လႆႈၶၢမ်ႇဢဝ်ဢမိင်ႉၼၼ်ႉ၊ထွင်ႇမူးၵေႃႈဢဝ်ၶဝ်ၶင်ဝႆႉၵႃႈၼႂ်းႁွင်ႈတၢင်းၼႂ်းလႄႈသႂ်ႇထၢင်ႇတိၼ်ဝႆႉသေဢေႃႈ။

25မိူဝ်ႈထိုင်ၶိင်ႇတဵင်ႈၶိုၼ်းၸိုင်၊သြႃႇပေႃးလု၊တင်းသီႇလႃႉ၊သူးတွင်းႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈယူႇလႄႈၵူၼ်းထွင်ႇတင်းလၢႆဢွၼ်ၵၼ်ထွမ်ႇၶဝ်ယူႇဢေႃႈ။- 26မိူဝ်ႈၼၼ်ႉ၊ၵိုင်ႉၵၢင်ႉဢိင်ႇသၼ်ႇပဵၼ်မႃးႁႅင်းၼႃႇလႄႈတိၼ်ထွင်ႇၵေႃႈသၼ်ႇၶွၼ်းဝႆဢေႃႈ။ ၽၵ်းတူထွင်ႇၵႃႈမီးၵေႃႈၽုၺ်ႇပိုတ်ႇၵႂႃႇၵမ်းလဵဝ်လႄႈၸိူၵ်ႈလဵၵ်းလုတ်ႈတူၵ်းသေၵႃႈတီႈၵူၼ်းထွင်ႇတင်းသဵင်ႈတင်းမူတ်းၵႂႃႇဢေႃႈ။- 27ထွင်ႇမူးၼၼ်ႉတိုၼ်ႇမႃးလႄႈ မိူဝ်ႈဢၼ်ႁၼ်ၽၵ်းတူထွင်ႇၽုၺ်ႇပိုတ်ႇဝႆႉယူႇၼၼ်ႉၸိုင်၊ထၢင်ႇဝႃႈ၊ၵူၼ်းထွင်ႇၸိူဝ်းၼၼ်ႉဢွၵ်ႇပၢႆႈၵႂႃႇမူတ်းယဝ်ႉဝႃႈၼႆလႄႈထွတ်ႇလၢပ်ႇဢၢင်ႈတၵ်းတႅင်းတူဝ်ၸဝ်ႈၵဝ်ႇတၢႆဢေႃႈ။- 28ပေႃးလု၊ၸင်ႇၵိဝ်သဵင်ယႂ်ႇၼႃႇလႄႈဝႃႈ၊ “ယႃႇပေႁဵတ်းဢၼ်ဢမ်ႇလီတီႈတူဝ်ၸဝ်ႈၵဝ်ႇသေၵမ်း။ ႁဝ်းတင်းသဵင်ႈတင်းလူင်မီးယူႇၵႃႈတီႈၼႆႈဢေႃႈ၊” ဝႃႈၼင်ႇၼႆဢေႃႈ။

29ထွင်ႇမူးၼၼ်ႉ၊ၸင်ႇႁႂ်ႈၵူၼ်းဢဝ်ၽႆးၵၢၼ်ႈၶႄႈမႃးသေယဝ်ႉ၊လႅၼ်ႈၶဝ်ႈၵႂႃႇသၼ်ႇသၼ်ႇသၢႆသၢႆယူႇသေလႄႈၶုပ်ႉမူပ်ႇၵႃႈတီႈႁိမ်းတိၼ်သြႃႇပေႃးလု၊တင်းသီႇလႃႉ၊ဢေႃႈ။- 30ႁဵတ်းၼၼ်လႄႈမၼ်းဢဝ်ၶဝ်သွင်ၵေႃႉၼၼ်ႉ၊ဢွၵ်ႇမႃးသေယဝ်ႉထၢမ်ဝႃႈ၊ “ၸဝ်ႈၶဝ်႟။ ၼင်ႇႁိုဝ်ၵဝ်ၶႃႈတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၸိုင်၊တၵ်းလႆႈႁဵတ်းၸိူဝ်ႉႁိုဝ်ၶႃႈ၊” ဝႃႈၼင်ႇၼႆဢေႃႈ။

31ၶဝ်ၵေႃႈလၢတ်ႈလႄႈဝႃႈ၊ “ယုမ်ႇမၢတ်ႈၸဝ်ႈယေႇသုၶရိၸ်ႈ၊တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်း၊တၵ်းႁွတ်ႈထိုင်တၢင်းဢၼ်ၵႄႇၶျွတ်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။- 32မိူဝ်ႈၼၼ်ႉ၊ၶဝ်ႁေႃးလၢတ်ႈၼုၵ်ႈၵပၢတ်ႈၸဝ်ႈၽြႃးတီႈမၼ်း၊ဢိၵ်ႇတင်းၵူၼ်းၵႃႈဢၼ်မီးယူႇၵႃႈၼႂ်းႁိူၼ်းမၼ်းသေလႄႈ၊- 33ၼႂ်းၶိင်ႇၼႃႇရီႇၶိုၼ်းၼၼ်ႉ၊ထွင်ႇမူးသုၵ်ႈပၼ်ႁွႆးၸဵပ်းၶဝ်သေယဝ်ႉ၊မၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ#16:33 “ပပ်ႉတိၸမ်ႇ” - မၢင်ႇၵလႃႇတၢင်းၸူမ်ၼမ်ႉၵမ်းလဵဝ်ဢေႃႈ။- 34ၵမ်းၼၼ်ႉ၊မၼ်းပၢင်းဢဝ်သြႃႇပေႃးလု၊တင်းသီႇလႃႉ၊ၵႂႃႇၵႃႈတီႈႁိူၼ်းမၼ်းသေလႄႈႁဵတ်းလဵင်ႉႁဵတ်းလူဢေႃႈ။ ပိူဝ်ႈဢၼ်တေႃႈလဵဝ်ၼႆႉ၊ယုမ်ႇမၢတ်ႈၽြႃးပဵၼ်ၸဝ်ႈယဝ်ႉလႄႈမၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆၸူမ်းသိူဝ်းၼႃႇလူင်လၢင်ဢေႃႈ။

35မိူဝ်ႈဢၼ်မိူင်းလႅင်းယဝ်ႉၼၼ်ႉ၊ၶုၼ်ဢၼ်တႅပ်းတတ်းတြႃးၶဝ်ပွႆႇၸႂ်ႉၶုၼ်ႁၢၼ်ၶဝ်မႃးပႃးတင်းဢမိင်ႉဢၼ်ဝႃႈ၊ “ပွႆႇၵူၼ်းၸိူဝ်းၼႆႉလွတ်ႈတႃႉ၊” ဝႃႈၼင်ႇၼႆၼၼ်ႉဢေႃႈ။

36ပိူဝ်ႈၼႆလႄႈထွင်ႇမူးလၢတ်ႈတီႈသြႃႇပေႃးလု၊လႄႈဝႃႈ၊ “ၶုၼ်တင်းလၢႆပွႆႇၸႂ်ႉမႃးႁႂ်ႈပွႆႇလွတ်ႈသူၸဝ်ႈၶႃႈယဝ်ႉ။ ပိူဝ်ႈၼႆလႄႈသူၸဝ်ႈဢွၵ်ႇၵႂႃႇလႆႈၶႃႈယဝ်ႉ။ ၵႂႃႇၼိမ်ၼိမ်လီလီသေၵမ်းၶႃႈတႃႉ၊” ဝႃႈၼင်ႇၼႆဢေႃႈ။

37ၵူၺ်းၵႃႈ၊သြႃႇပေႃးလု၊ၶိုၼ်းလၢတ်ႈတီႈၶုၼ်ႁၢၼ်ၸိူဝ်းၼၼ်ႉလႄႈဝႃႈ၊ “ႁဝ်းၼႆႉယင်းဢမ်ႇမီးဢပျတ်ႈၵႃႈသင်လႄႈလႆႈၶၢမ်ႇပေႃႉယႅၼ်ႉၵႃႈတီႈၽၢႆႇၼႃႈမူႇၵူၼ်းထၢင်ႇထၢင်ႇသႃးသႃးယဝ်ႉ။ ႁဝ်းၼႆႉပဵၼ်ၵူၼ်းမိူင်းရူဝ်းမႃႉ၊ဢေႃႈ။ ယင်းလႆႈၶၢမ်ႇတၢင်းဢၼ်တူၵ်းထွင်ႇယဝ်ႉလႄႈၶဝ်ၶႂ်ႈလွမ်ပွႆႇဢွၵ်ႇတဵတ်ႇတဵတ်ႇႁိုဝ်း။ ဢမ်ႇထုၵ်ႇလီႁဵတ်းၸိူဝ်ႉၼင်ႇၼႆ။ ႁႂ်ႈတူဝ်ၶုၼ်တႅပ်းတတ်းတြႃးၸိူဝ်းၼၼ်ႉမႃးၼုၵ်ႈဢဝ်ႁဝ်းဢွၵ်ႇတႃႉ၊” ဝႃႈၼင်ႇၼႆဢေႃႈ။

38ၶုၼ်ႁၢၼ်ၸိူဝ်းၼၼ်ႉၵေႃႈ၊ဢဝ်ၵႂၢမ်းၼၼ်ႉၵႂႃႇမွၵ်ႇလၢတ်ႈထိုင်ၵႃႈတီႈၶုၼ်ဢၼ်တႅပ်းတတ်းတြႃးတင်းလၢႆလႄႈ မိူဝ်ႈဢၼ်ၶဝ်ငိၼ်းလွင်ႈဢၼ်သြႃႇပေႃးလု၊တင်းသီႇလႃႉ၊ပဵၼ်ၵူၼ်းမိူင်းရူဝ်းမႃႉ၊ၼၼ်ႉၸိုင်၊ၶဝ်ၵူဝ်ႁႄၼႃႇဢေႃႈ။- 39ပိူဝ်ႈၼႆလႄႈဢွၼ်ၵၼ်ၵႂႃႇတွင်းပၢၼ်ႇတီႈၶဝ်သေယဝ်ႉ၊ဢဝ်ၶဝ်ဢွၵ်ႇထွင်ႇမႃးယဝ်ႉၸင်ႇ၊ၶျေႃးဝွၼ်းႁႂ်ႈၶဝ်ဢွၵ်ႇဝဵင်းၼၼ်ႉၵႂႃႇဢေႃႈ။- 40ၶဝ်ၵေႃႈဢွၵ်ႇထွင်ႇၵႂႃႇလႄႈၶဝ်ႈၵႃႈၼႂ်းႁိူၼ်းလုတိ၊သေယဝ်ႉ၊ထူပ်းႁၼ်တပႄးၸဝ်ႈတင်းလၢႆလႄႈတိုၵ်းယူင်းပၼ်ႁႅင်းၶဝ်ယဝ်ႉၸင်ႇဢွၵ်ႇၵႂႃႇသေဢေႃႈ။

Currently Selected:

တမၢၼ်ႇ 16: SHNCL

Highlight

Copy