တမၢၼ်ႇ 15

ပၢင်ၵုမ်လူင်ၼႂ်းဝဵင်းယေႇရုသလႅမ်ႇ

1ၵူၼ်းၵမ်ႈၽွင်ႈလုၵ်ႉသေၵႃႈတီႈမိူင်းယုတႃႉ၊ႁွတ်ႈမႃးၵႃႈတီႈဝဵင်းဢၼ်ႇတိဢူၵ်ႉ၊သေယဝ်ႉ၊ႁေႃးလၢတ်ႈသင်ႇသွၼ်ပၼ်တီႈတပႄးၸဝ်ႈတင်းလၢႆလႄႈဝႃႈ၊ “ပေႃးသူယင်းဢမ်ႇၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်၊ၸွမ်းၼင်ႇတြႃးမူဝ်းသေႇ၊မီးဝႆႉၼၼ်ႉၸိုင်၊သူဢမ်ႇႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႆႈ၊” ဝႃႈၼင်ႇၼႆဢေႃႈ။- 2သြႃႇပေႃးလု၊တင်းပႃႇၼပႃႉ၊ၵေႃႈတိူင်ႇပၢင်ႇထဵင်ၵၼ်တင်းၶဝ်ၼၼ်ႉၼမ်ၼႃႇ၊လူၺ်ႈလွင်ႈတၢင်းၼႆႉလႄႈၸင်ႇၽွမ်ႉၸႂ်ဝႃႈ၊သြႃႇပေႃးလု၊ဢိၵ်ႇတင်းပႃႇၼပႃႉ၊တင်းၵူၼ်းဝဵင်းတၢင်ႇၵေႃႉၵမ်ႈၽွင်ႈတၵ်းလႆႈလူင်းၵႂႃႇၸူးဝဵင်းယေႇရုသလႅမ်ႇ၊ႁႂ်ႈလႆႈဢုပ်ႇၵုမ်တိူင်ႇပၢင်ႇၵၼ်တင်းတမၢၼ်ႇၸဝ်ႈတင်းလၢႆ၊ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈၶဝ်လူၺ်ႈလွင်ႈတၢင်းယၢပ်ႇဢၼ်ၶဝ်ထဵင်ၵၼ်ၼၼ်ႉဢေႃႈ။

3ၵူၼ်းၸိူဝ်းၸဝ်ႈတင်းလၢႆၸွမ်းသူင်ႇၶဝ်ၵႂႃႇပွတ်းတၢင်းသေယဝ်ႉ၊ၼႂ်းၶၢဝ်းတၢင်းဢၼ်ၶဝ်လတ်းၶဝ်ႈမိူင်းၽိၼိတ်ႉ၊ဢိၵ်ႇတင်းမိူင်းသမႃႇရိ၊ၵႂႃႇၼၼ်ႉ၊ၶဝ်မွၵ်ႇလၢတ်ႈလွင်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼမ်ၼႃႇၶဝ်ႈပဵၼ်တပႄးၸဝ်ႈမႃးၼၼ်ႉလႄႈၶၢဝ်ႇငၢဝ်းၼၼ်ႉႁဵတ်းႁႂ်ႈတပႄးၸဝ်ႈတင်းသဵင်ႈတင်းမူတ်းသိူဝ်းပျေႃႇဢေႃႈ။- 4မိူဝ်ႈဢၼ်ၶဝ်ႁွတ်ႈထိုင်ဝဵင်းယေႇရုသလႅမ်ႇ၊ၵႂႃႇၼၼ်ႉၸိုင်၊ၶဝ်လႆႈၶၢမ်ႇတၢင်းဢၼ်တမၢၼ်ႇၸဝ်ႈ၊ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢိၵ်ႇတင်းၵူၼ်းၸိူဝ်းၸဝ်ႈတင်းသဵင်ႈတင်းမူတ်းႁပ်ႉတွၼ်ႈလႄႈၶဝ်ၵေႃႈမွၵ်ႇလၢတ်ႈၶႆႈၼႄလွင်ႈတၢင်းဢၼ်ၽြႃးပဵၼ်ၸဝ်ႈဢဝ်ၶဝ်ႁဵတ်းၸိူဝ်းၼၼ်ႉဢေႃႈ။- 5ၵူၺ်းၵႃႈ၊ၵူၼ်းၸိူဝ်းယုမ်ႇမၢတ်ႈၵမ်ႈၽွင်ႈဢၼ်ပဵၼ်ၵိူင်းၽႃႇရိသႄး၊ၼၼ်ႉလုၵ်ႉလႄႈလၢတ်ႈဝႃႈ၊ “ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်သေလႄႈတၵ်းလႆႈသွၼ်ပၼ်ႁႂ်ႈၶဝ်ၵမ်ၵျၢင်ႉၸွမ်းတြႃးမူဝ်းသေႇ၊ဢေႃႈ၊” ဝႃႈၼင်ႇၼႆဢေႃႈ။

6တမၢၼ်ႇၸဝ်ႈဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆၸုတုမ်ၵၼ်လႄႈၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းယၢပ်ႇၼႆႉဢေႃႈ။- 7ဝၢႆးသေတိူင်ႇပၢင်ႇလၢတ်ႈၸႃၵၼ်ၼမ်ၼႃႇယဝ်ႉၼၼ်ႉ၊ပေႇတရု၊လုၵ်ႉလႄႈလၢတ်ႈဝႃႈ၊ “ပီႈၼွင်ႉၶဝ်႟။ သူႁုလွင်ႈဢၼ်ၽြႃးပဵၼ်ၸဝ်ႈ၊လိူၵ်ႈဢဝ်ၵဝ်သေၵႃႈၼႂ်းသူၸဵမ်မိူဝ်ႈဢွၼ်တၢင်းႁိုင်ၼႃႇႁႂ်ႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈ၊တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ပုၼ်ႈဢၼ်ၶဝ်တၵ်းငိၼ်းလႄႈယုမ်ႇမၢတ်ႈၼၼ်ႉယူႇဢေႃႈ။- 8ၽြႃးပဵၼ်ၸဝ်ႈဢၼ်ႁုၸႅင်ႈႁူဝ်ၸႂ်ၵူၼ်းၵူႈၵေႃႉၼၼ်ႉ၊ၶၢမ်ႇသၢၵ်ႈသေႇၽၢႆႇၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ၊ၼႂ်းတၢင်းဢၼ်ပၼ်ဝိၺိၺ်ႇမူတ်းၸၢင်ႇၸဝ်ႈ၊မိူၼ်ၸိူဝ်ႉၼင်ႇဢၼ်ပၼ်တီႈႁဝ်းၼၼ်ႉဢေႃႈ။- 9မၼ်းၸဝ်ႈဢမ်ႇႁဵတ်းႁႂ်ႈၶဝ်ပႅၵ်ႇပိူင်ႈၵၼ်တင်းႁဝ်း။ မၼ်းၸဝ်ႈႁႂ်ႈႁူဝ်ၸႂ်ၶဝ်မူတ်းသႂ်ၵွပ်ႈလူၺ်ႈတၢင်းယုမ်ႇမၢတ်ႈၶဝ်ၼၼ်ႉယူႇဢေႃႈ။- 10ပိူဝ်ႈၼႆလႄႈတေႃႈလဵဝ်ၼႆႉ၊ႁဵတ်းသင်လႄႈၶႂ်ႈၸၢမ်းတူၺ်းၽြႃးပဵၼ်ၸဝ်ႈၼႂ်းတၢင်းဢၼ်ဢဝ်ၵၢၼ်းဢၼ်ပူႇမွၼ်ႇႁဝ်း၊ဢိၵ်ႇတင်းႁဝ်းယင်းႁၢပ်ႇဢမ်ႇပႄႉလႆႈၼၼ်ႉ၊တၢင်ႇသႂ်ႇၵႃႈၼိူဝ်ႁူဝ်မႃႇတပႄးၸဝ်ႈတင်းလၢႆၸိူဝ်ႉၼင်ႇႁိုဝ်။- 11ဢမ်ႇၸႂ်ႈၸိူဝ်ႉၼင်ႇၼၼ်ၵူၺ်း။ ႁဝ်းၸိုင်၊ယုမ်ႇမၢတ်ႈလႄႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈၵျေးၸူးၸဝ်ႈယေႇသုၶရိၸ်ႈ၊ၵူၺ်းမိူၼ်မိူၼ်ၵၼ်တင်းၶဝ်ဢေႃႈ၊” ဝႃႈၼင်ႇၼႆဢေႃႈ။

12မူႇၵူၼ်းတင်းလၢႆယူႇတဵတ်ႇတဵတ်ႇလႄႈထွမ်ႇဢဝ်သြႃႇပေႃးလု၊ဢိၵ်ႇတင်းပႃႇၼပႃႉ မွၵ်ႇလၢတ်ႈၶႆႈၼႄလွင်ႈၼိမိၵ်ႈလၢၵ်ႈၶၼႃႇ၊ဢိၵ်ႇတင်းတၢင်းဢၼ်လီဢၢမ်းတင်းလၢႆ၊ဢိၵ်ႇတင်းၵႃႈဢၼ်ၽြႃးပဵၼ်ၸဝ်ႈဢဝ်ၶဝ်ႁဵတ်းၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉယူႇဢေႃႈ။- 13ဝၢႆးသေၶဝ်လၢတ်ႈယဝ်ႉၵႂႃႇၼၼ်ႉ၊ယႃႇၵုပ်ႈ၊လၢတ်ႈလႄႈဝႃႈ၊ “ပီႈၼွင်ႉၶဝ်႟။ ထွမ်ႇၵဝ်သေၵမ်း။- 14သိမုၼ်ႇ၊လၢတ်ႈၼႄလွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇႁိုဝ်လႄႈမႃးလူတူၺ်းၵူၼ်းတၢင်ႇၸိူဝ်ႉတၢင်ႇၶိူဝ်းပွၵ်ႈဢွၼ်တၢင်း၊ၼင်ႇႁိုဝ်ၵႃႈၼႂ်းၶဝ်ၼၼ်ႉတၵ်းၼုၵ်ႈဢဝ်မဵဝ်းၵူၼ်းပုၼ်ႈၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉယဝ်ႉ။- 15ၵႂၢမ်းပရေႃးၽႅတ်ႈ#15:15 “ၵႂၢမ်းပရေႃးၽႅတ်ႈ” - ၵႂၢမ်းဢၼ်ၽြႃးပဵၼ်ၸဝ်ႈၸႂ်ႉၵူၼ်းမၼ်းၸဝ်ႈႁေႃးလၢတ်ႈလွင်ႈတၵ်းပဵၼ်မႃးတေႃႈလဵဝ်လႄႈမိူဝ်းၼႃႈတင်းလၢႆၵေႃႈမႅၼ်ႈၵၼ်တင်းလွင်ႈတၢင်းၼႆႉလႄႈတႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ။

16“‘ထႃႇဝရႃႉၽြႃးမီးဢမိင်ႉၸမ်ႉ၊လိုၼ်းၼၼ်ႉၵဝ်တၵ်းၶိုၼ်းမႃးလႄႈမႄးၵုမ်းမႄးႁဵတ်းႁိူၼ်းတႃႇဝိတ်ႈ၊ဢေႃႈ။

ၵဝ်တၵ်းၶိုၼ်းတႄႇၶိုၼ်းတင်ႈဢၼ်လူမ်ႉပင်းလုလႅဝ်လႄႈႁႂ်ႈမၼ်ႈၶိူင်ႇၶိုၼ်းဢေႃႈ။

17ႁဵတ်းၸိူဝ်ႉၼင်ႇၼၼ်လႄႈၵူၼ်းဢၼ်ၵိုတ်းဢၼ်ၵျၢၼ်ႇတင်းလၢႆ၊တၵ်းၶိုၼ်းမႃးႁႃၸဝ်ႈထႃႇဝရႃႉၽြႃးလႄႈ ၵူၼ်းတၢင်ႇၸိူဝ်ႉတၢင်ႇၶိူဝ်း၊

ၵႃႈဢၼ်လႆႈႁွင်ႉၸွမ်းၼႃႇမႃႉၸိုဝ်ႈသဵင်ၵဝ်ၸိူဝ်းၼၼ်ႉတၵ်းပႃးဢေႃႈ။

18ၸဝ်ႈၽြႃးဢၼ်ႁဵတ်းႁႂ်ႈလွင်ႈတၢင်းၸိူဝ်းၼႆႉ၊ထၢင်ႇသႃးမႃးၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉ မီးပျႃႇတိၵ်ႈဝႆႉဢေႃႈ၊’ ဝႃႈၼင်ႇၼႆမီးမႃးၼင်ႇၼႆယဝ်ႉ။ #တူၺ်း၊ ဢႃႇ 9:11-12

19“ပိူဝ်ႈၼႆလႄႈသၽေႃးၵဝ်ၸမ်ႉ၊ႁဝ်းဢမ်ႇထုၵ်ႇလီယႃႉယူၵ်ႉၵူၼ်းတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်ပိၼ်ႇၸႂ်မႃးၸူးၽြႃးပဵၼ်ၸဝ်ႈၼႆႉၼၼ်ႉ။- 20ႁဝ်းယင်းလီတႅမ်ႈလိၵ်ႈပၼ်ၵႂႃႇၵႃႈတီႈၶဝ်၊သင်ႇႁႂ်ႈၶဝ်ဝႄႈပႅတ်ႈတၢင်းၵိၼ်ဢၼ်ၵူဝ်ႈၵိူၵ်ႇဢၼ်လႆႈတၢင်ႇပၼ်တမ်းပၼ်တီႈႁုၼ်ႇႁၢင်ႈသၢင်းထုယဝ်ႉပိူင်ၼိုင်ႈ၊ၵႃႇမေႇသုဢၼ်ဢမ်ႇတြႃးပိူင်ၼိုင်ႈ၊ဢိၵ်ႇတင်းႁႂ်ႈၶဝ်ဢမ်ႇၵိၼ်ၼိူဝ်ႉသတ်းဢၼ်လႆႈၶၢမ်ႇငႅၼ်းၶေႃးတၢႆ၊ဢိၵ်ႇတင်းလိူတ်ႈမၼ်းၸိူဝ်းၼၼ်ႉဢေႃႈ။- 21လွင်ႈမၼ်းၸမ်ႉ၊ပိင်းၺၢပ်ႈတြႃးမူဝ်းသေႇ၊ၼၼ်ႉလႆႈၽတ်းဢၢၼ်ႇၵႃႈၼႂ်းၸရွပ်ႈႁေႃးတြႃးတင်းလၢႆ၊ၼႂ်းဝၼ်းၵမ်သိၼ်ၵူႈသိၼ်လႄႈတြႃးမၼ်းၼၼ်ႉၵေႃႈလႆႈႁေႃးလၢတ်ႈၵႃႈၼႂ်းဝဵင်းၵူႈဝဵင်း၊ၸဵမ်မိူဝ်ႈဢွၼ်တၢင်းႁိုင်ၼႃႇၼၼ်ႉမႃးယဝ်ႉဢေႃႈ၊” ဝႃႈၼင်ႇၼႆဢေႃႈ။

လိၵ်ႈပုၼ်ႈတပႄးၸဝ်ႈၵူၼ်းတၢင်ႇၸိူဝ်ႉတၢင်ႇၶိူဝ်း

22မိူဝ်ႈၼၼ်ႉ၊တမၢၼ်ႇၸဝ်ႈတင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢိၵ်ႇတင်းၵူၼ်းၸိူဝ်းၸဝ်ႈတင်းသဵင်ႈတင်းလူင်၊ၽွမ်ႉၵၼ်လိူၵ်ႈဢဝ်ၵူၼ်းၵမ်ႈၽွင်ႈၵႃႈၼႂ်းၶဝ်ၼၼ်ႉသေလႄႈပွႆႇၸႂ်ႉၵႂႃႇၵႃႈတီႈဝဵင်းဢၼ်ႇတိဢူၵ်ႉ၊ႁူမ်ႈလူၺ်ႈၵၼ်တင်းသြႃႇပေႃးလု၊ဢိၵ်ႇတင်းပႃႇၼပႃႉ၊ဢေႃႈ။ ၶဝ်လိူၵ်ႈဢဝ်ၵူၼ်းသွင်ၵေႃႉ၊ဢၼ်တပႄးၸဝ်ႈတင်းလၢႆရူဝ်ႇသေႇဢၼ်ပဵၼ်ယုတႃႉ၊ဢၼ်လႆႈၸိုဝ်ႈမႂ်ႇႁွင်ႉဝႃႈ၊ပႃသပႃႉ၊ဢိၵ်ႇတင်းသီႇလႃႉ၊လႄႈ၊- 23ဢဝ်လိၵ်ႈၼၼ်ႉ၊ၽၢၵ်ႇၸွမ်းၶဝ်ၵႂႃႇဢေႃႈ။ ၼႂ်းလိၵ်ႈၼၼ်ႉဝႃႈၸမ်ႉ၊

“ႁဝ်းၵႃႈဢၼ်ပဵၼ်တမၢၼ်ႇၸဝ်ႈတင်းၵူၼ်းဢုပ်ႉၸိူဝ်းၸဝ်ႈ၊ဢိၵ်ႇတင်းၵႃႈပီႈၵႃႈၼွင်ႉတင်းလၢႆၸိူဝ်းၼႆႉ၊ပႃးတင်းမႅတ်ႈတႃႇမီးလိၵ်ႈလီလၢႆးၸိုၼ်ႈသေယိုၼ်ႈႁွတ်ႈပၼ်ထိုင်ပီႈၼွင်ႉႁဝ်း၊ၸိူဝ်းဢၼ်ပဵၼ်ၸႃႇတိၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ၸိူဝ်းဢၼ်ယူႇၵႃႈတီႈၸႃႉၸဵမ်ၼႂ်းဝဵင်းဢၼ်ႇတိဢူၵ်ႉ၊မိူင်းသီးရီးယႃး၊တင်းမိူင်းၵိလိၵိ၊တင်းသဵင်ႈတင်းလူင်ဢေႃႈ။- 24ႁဝ်းလႆႈငိၼ်းဝႃႈ၊ၵူၼ်းၵမ်ႈၽွင်ႈၵႃႈတီႈမူႇၸုမ်းႁဝ်းၼႆႉ၊ၵႂႃႇယႃႉယုၵ်ႉႁႂ်ႈသူယၢပ်ႇၸႂ်ယုင်ႈၸႂ်လူၺ်ႈၵႂၢမ်းဢၼ်ၶဝ်ႁေႃးလၢတ်ႈဝႃႈ၊လူဝ်ႇၶၢမ်ႇမၢင်ႇၵလႃႇပၢတ်ႇပၢႆၼင်လႄႈၸွမ်းတြႃးမူဝ်းသေႇ၊ၵူႈၵေႃႉၵူႈၵူၼ်းၼၼ်ႉယူႇဢေႃႈ။ ၶဝ်ယင်းဢမ်ႇလႆႈဢၶႂၢင်ႉတီႈႁဝ်းၵႃႈသင်လႄႈၵႂႃႇဢေႃႈ။- 25ပိူဝ်ႈၼႆၸင်ႇ၊ႁဝ်းၸုတုမ်ဢုပ်ႇၵုမ်ၵၼ်သေယဝ်ႉ၊ၽွမ်ႉၸႂ်ၵၼ်လိူၵ်ႈဢဝ်ၵူၼ်းသေလႄႈပွႆႇၸႂ်ႉၵႂႃႇၸွမ်းၵေႃႉသႄႈႁဝ်းပႃႇၼပႃႉ၊ဢိၵ်ႇတင်းသြႃႇပေႃးလု၊- 26ဢၼ်ႁတ်းၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈၸဝ်ႈယေႇသုၶရိၸ်ႈ၊ၼၼ်ႉၵႂႃႇၸူးသူဢေႃႈ။- 27တေႃႈလဵဝ်ႁဝ်းပွႆႇၸႂ်ႉယုတႃႉ၊တင်းသီႇလႃႉ၊ဢၼ်တၵ်းဢဝ်တင်းသူပ်းၶဝ်မွၵ်ႇလၢတ်ႈၸိူဝ်ႉၼင်ႇဢၼ်ႁဝ်းတႅမ်ႈပၼ်ၵႂႃႇၼႆႉယူႇဢေႃႈ။- 28လိူဝ်သေတၢင်းဢၼ်သူထုၵ်ႇလီႁဵတ်းၸိူဝ်းၼၼ်ႉလႄႈဝိၺိၺ်ႇမူတ်းၸၢင်ႇၸဝ်ႈ၊ဢိၵ်ႇတင်းႁဝ်းၽွမ်ႉၵၼ်လႄႈဢမ်ႇၶႂ်ႈဢဝ်ၶူဝ်းဢၼ်ၼၵ်းၼႃႇတၢင်ႇၸိူဝ်ႉတၢင်ႇဢၼ်တၢင်ႇသႂ်ႇၵႃႈၼိူဝ်သူ။- 29လွင်ႈဢၼ်သူထုၵ်ႇလီႁဵတ်းၸမ်ႉ၊ယႃႇပေၵိၼ်တၢင်းၵိၼ်ဢၼ်တၢင်ႇပၼ်တမ်းပၼ်ၽၢႆႇၼႃႈႁုၼ်ႇႁၢင်ႈသၢင်းထုယဝ်ႉၼၼ်ႉ။ ယႃႇပေၵိၼ်လိူတ်ႈ။ ယႃႇပေၵိၼ်ၼိူဝ်ႉတူဝ်သတ်းဢၼ်လႆႈၶၢမ်ႇငႅၼ်းၶေႃးတၢႆၼၼ်ႉ၊ဝႄႈပႅတ်ႈၵႃႇမေႇသုဢၼ်ဢမ်ႇတြႃးတင်းလၢႆၼၼ်ႉတႃႉ။ ပေႃးသူဝႄႈပႅတ်ႈလွင်ႈတၢင်းၸိူဝ်းၼႆႉၸိုင်၊သူႁဵတ်းဢၼ်လီဢၼ်ငၢမ်းယဝ်ႉ။ ႁႂ်ႈယူႇလီၵိၼ်ဝၢၼ်သေၵမ်းလူၺ်ႈ၊” ဝႃႈၼင်ႇၼႆဢေႃႈ။ 30ၽူႈတၢင်တူဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇလႄႈၶဝ်ၵႂႃႇၵႃႈတီႈဝဵင်းဢၼ်ႇတိဢူၵ်ႉ၊ယဝ်ႉၸင်ႇ၊တီႈၼၼ်ႈၶဝ်ႁွင်ႉဢဝ်တပႄးၸဝ်ႈတင်းမူႇတင်းၸုမ်းၸုတုမ်ၵၼ်လႄႈဢၢပ်ႈပၼ်လိၵ်ႈၼၼ်ႉဢေႃႈ။- 31ၶဝ်ၽတ်းဢၢၼ်ႇလိၵ်ႈၼၼ်ႉလႄႈ မီးတၢင်းဢၼ်သိူဝ်းၸူမ်းၵွပ်ႈပိူဝ်ႈၵႂၢမ်းဢၼ်ပၼ်ဢဵၼ်ပၼ်ႁႅင်းၼၼ်ႉဢေႃႈ။- 32ယုတႃႉ၊တင်းသီႇလႃႉ၊ၼၼ်ႉ ပိူဝ်ႈဢၼ်ပဵၼ်ပရေႃးၽႅတ်ႈ#15:32 “ပရေႃးၽႅတ်ႈ” - ၽူႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈလွင်ႈတၵ်းပဵၼ်မႃးတေႃႈလဵဝ်လႄႈမိူဝ်းၼႃႈလႄႈလၢတ်ႈတေႃႇၶဝ်ႁိုင်ၼႃႇတင်းၵႂၢမ်းဢၼ်တိုၵ်းယူင်းပၼ်ဢဵၼ်ပၼ်ႁႅင်းတီႈၶဝ်ဢေႃႈ။- 33ဝၢႆးသေယူႇတီႈၼၼ်ႈႁိုင်တၢၼ်ႇတၢၼ်ႇယဝ်ႉၸိုင်၊တပႄးၸဝ်ႈၸိူဝ်းၼၼ်ႉပွႆႇၶဝ်မိူဝ်းၵႂႃႇၼိမ်ၼိမ်လီလီလႄႈၶဝ်ၵေႃႈမိူဝ်းၵႂႃႇၵႃႈတီႈၵူၼ်းၸိူဝ်းဢၼ်ပွႆႇၶဝ်မႃးၼၼ်ႉဢေႃႈ။- 34[ၵူၺ်းၵႃႈ၊သီႇလႃႉ၊ၼၼ်ႉ၊ဝႆႉၸႂ်ၵိုတ်းသဝ်းယူႇတီႈၼၼ်ႈဢေႃႈ။]#15:34 […] ၵႃႈၼႂ်းမူႇၵျၢမ်းလိၵ်ႈၵဝ်ႇၵဝ်ႇၵမ်ႈၽွင်ႈဢမ်ႇပႃးၵႂၢမ်းၶေႃႈၼႆႉ

35သြႃႇပေႃးလု၊တင်းပႃႇၼပႃႉ၊ယင်းယူႇတီႈၼႂ်းဝဵင်းဢၼ်ႇတိဢူၵ်ႉ၊လႄႈ သင်ႇသွၼ်သုင်းမႃႉပၼ်၊ဢိၵ်ႇတင်းႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၽြႃးႁူမ်ႈလူၺ်ႈၵၼ်တင်းပိူၼ်ႈတၢင်ႇၵေႃႉၼမ်ၼႃႇဢေႃႈ။

သြႃႇပေႃးလုၽၢတ်ႇၵၼ်တင်းပႃႇၼပႃႉ

36လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းသြႃႇပေႃးလု၊လၢတ်ႈတီႈပႃႇၼပႃႉ၊လႄႈဝႃႈ၊ “ႁဝ်းဢွၼ်ၵၼ်ၶိုၼ်းၵႂႃႇလႄႇထိုင်ၵႃႈပီႈၵႃႈၼွင်ႉၵူႈဝဵင်းၵူႈဝဵင်း၊တီႈဢၼ်ႁဝ်းယၢမ်ႈႁေႃးတြႃးၸဝ်ႈၽြႃးၸိူဝ်းၼၼ်ႉလႄႈလူတူၺ်းလွင်ႈဢၼ်ၶဝ်မီးယူႇၸိူဝ်ႉၼင်ႇႁိုဝ်ၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။- 37ပႃႇၼပႃႉ၊ၶႂ်ႈႁွင်ႉဢဝ် ယူဝ်းႁၢၼ်ႇမႃႇၵု၊ၸွမ်းၵႂႃႇသေၵေႃႈ၊- 38သြႃႇပေႃးလု၊ထၢင်ႇဝႃႈဢမ်ႇထုၵ်ႇလီႁွင်ႉၸွမ်း၊ပိူဝ်ႈဢၼ်မၼ်းယင်းဢမ်ႇၸွမ်းဢမ်ႇၵႂႃႇတေႃႇထိုင်ႁွတ်ႈၵၢၼ်တၢင်းႁဵတ်းၸဝ်ႈယဝ်ႉတူဝ်ႈလႄႈပႅတ်ႈၶဝ်သွင်ၵေႃႉဝႆႉၵႃႈတီႈမိူင်းပမ်ႇပုလိ၊လႄႈပွၵ်ႈၶိုၼ်းမိူဝ်းၵႂႃႇၼၼ်ႉဢေႃႈ။- 39တီႈၼၼ်ႈၶဝ်လႆႈတွပ်ႇထဵင်ၵၼ်ႁႅင်းတၢၼ်ႇတၢၼ်ႇ၊ထၢၼ်ႈပေႃးလႆႈၽၢတ်ႇၵၼ်ၵႂႃႇၵေႃႉတီႈၵေႃႉတၢင်းလႄႈပႃႇၼပႃႉ၊ႁွင်ႉဢဝ် မႃႇၵု၊ၶီႇႁိူဝ်းသၢင်းၽေႃးၵႂႃႇၸူးၵုၼ်သႆးပရၢတ်ႈ၊သေဢေႃႈ။- 40သြႃႇပေႃးလု၊ၸမ်ႉ၊ႁွင်ႉဢဝ်သီႇလႃႉ၊လႄႈ လႆႈၶၢမ်ႇတၢင်းဢၼ်တပႄးၸဝ်ႈတင်းလၢႆ၊ဢဝ်ၶဝ်ဢၢပ်ႈဝၢင်းၼႂ်းၵျေးၸူးၽြႃးပဵၼ်ၸဝ်ႈလႄႈဢွၵ်ႇၵႂႃႇသေဢေႃႈ။- 41မၼ်းလတ်းၶဝ်ႈၵႂႃႇၵႃႈၼႂ်းမိူင်းသီးရီးယႃး၊ဢိၵ်ႇတင်းမိူင်းၵိလိၵိ၊လႄႈတိုၵ်းယူင်းၸိူဝ်းၸဝ်ႈတင်းလၢႆႁႂ်ႈမၼ်ႈၶိူင်ႇယူႇဢေႃႈ။

Currently Selected:

တမၢၼ်ႇ 15: SHNCL

Highlight

Copy