1 သမူၺ်ႇ 1
1
ဢေးလႃႉၵႃႇၼႃႉလႄႈတင်းၵူၼ်းႁိူၼ်းမၼ်းၼႂ်းဝဵင်းသိလေႃႇ
1မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈဢေးလႃႉၵႃႇၼႃႉ၊ၵူၼ်းၸိူဝ်ႉၶိူဝ်းဢေႇၽရိမ်ႇ၊ဢၼ်ယူႇၵႃႈတီႈဝဵင်းရႃႇမႀိမ်းၸုပိမ်း၊ၵႃႈၼိူဝ်ႁၢၼ်ႉလွႆဢေႇၽရိမ်ႇ၊ၼၼ်ႉဢေႃႈ။ မၼ်းၼၼ်ႉပဵၼ်လုၵ်ႈၸၢႆးယေႇရေႃးႁမ်ႇ၊လၢၼ်ၸၢႆးဢေးလိႁု၊ၼႂ်းၶိူဝ်းႁိူၼ်းတေႃႇႁု၊ဢၼ်ၽႄဢွၵ်ႇပဵၼ်ၶိူဝ်းႁိူၼ်းၸုၽႃႉ၊ၼၼ်ႉဢေႃႈ။- 2ဢေးလႃႉၵႃႇၼႃႉ၊ၼၼ်ႉမီးမေးသွင်ၵေႃႉလႄႈၵေႃႉၼိုင်ႈပဵၼ်ႁၼ်ႇၼႃႉ၊ၵေႃႉၼိုင်ႈသမ်ႉပဵၼ်ပေႇၼိၼ်ႇၼႃႉ၊ဢေႃႈ။ ပေႇၼိၼ်ႇၼႃႉ၊ၼၼ်ႉမီးလုၵ်ႈမီးလၢင်းဢေႃႈ။ ႁၼ်ႇၼႃႉ၊ၸမ်ႉဢမ်ႇမီး။
3ၵူၼ်းၵေႃႉၼႆႉၸိုင်၊ယၢမ်ႈလုၵ်ႉသေၵႃႈတီႈဝဵင်းဢၼ်မၼ်းယူႇသေလႄႈၶိုၼ်ႈၸူးၵႃႈတီႈဝဵင်းသိလေႃႇ၊ၵူႈပီၵူႈပီႁႂ်ႈလႆႈဝႆႈလႄႈႁဵတ်းတၢင်းလူႇဢၼ်သၢၵ်ႈၵၢပ်ႈတီႈထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ဢေႃႈ။ ၵႃႈတီႈဝဵင်းသိလေႃႇ၊ၼၼ်ႉ၊လုၵ်ႈၸၢႆးဢေးလိ၊သွင်ၵေႃႉဢၼ်ပဵၼ်ႁေႃႇၽၼိ၊တင်းၽိၼႁတ်ႉ၊ႁဵတ်းယဵၸ်ႈပရေႃးႁဵၵ်ႈ#1:3 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈဢေႃႈ။- 4ၼႂ်းဝၼ်းဢၼ်ဢေးလႃႉၵႃႇၼႃႉ၊ႁဵတ်းတၢင်းလူႇဢၼ်သၢၵ်ႈၵၢပ်ႈၼၼ်ႉမၼ်းမႅင်ႇပုၼ်ႈမႅင်ႇတႃႇပၼ်တီႈမေးမၼ်းပေႇၼိၼ်ႇၼႃႉ၊ပုၼ်ႈၼိုင်ႈဢိၵ်ႇတင်းပုၼ်ႈတႃႇလုၵ်ႈယိင်းလုၵ်ႈၸၢႆးမၼ်းပုၼ်ႈၼိုင်ႈၼင်ႇၵၼ်ဢေႃႈ။- 5တီႈႁၼ်ႇၼႃႉ၊ၼၼ်ႉပိၵ်ႉသမ်ႉမၼ်းႁၵ်ႉၼႃႇလူင်လၢင်သေၵေႃႈ မၼ်းမႅင်ႇပၼ်ပုၼ်ႈလဵဝ်ၵူၺ်း#1:5 “မၼ်းမႅင်ႇပၼ်ၼိုင်ႈပုၼ်ႈၵူၺ်း” - ၼႂ်းၵျၢမ်းမူႇတၢင်ႇမူႇဝႃႈ၊ “မႅင်ႇပၼ်သွင်ပုၼ်ႈ၊” ဢေႃႈၵွပ်ႈပိူဝ်ႈထႃႇဝရႃႉၽြႃး၊ဢမ်ႇပၼ်ဢၶႂၢင်ႉဢၼ်ၵိူတ်ႇလဵင်ႉလုၵ်ႈလဵင်ႉလၢင်းတီႈမၼ်းၼၼ်ႉဢေႃႈ။- 6ၵွပ်ႈပိူဝ်ႈဢၼ်မၼ်းဢမ်ႇၵိူတ်ႇလုၵ်ႈၵိူတ်ႇလၢင်းလႄႈ ပေႇၼိၼ်ႇၼႃႉ၊ၵေႃႉဢၼ်ၶေႉဢၼ်ၶဵင်ႇၵၼ်တင်းမၼ်းၼၼ်ႉယႃႉယူၵ်ႉမၼ်းၼႃႇလူင်လၢင်ႁႂ်ႈမၼ်းလႆႈၸႂ်မႆႈၸႂ်လမ်ဢေႃႈ။- 7လွင်ႈတၢင်းၼၼ်ႉပဵၼ်ၸိူဝ်ႉၼင်ႇၼၼ်ယူႇၵႃႈၼင်ႇဢၼ်ၶဝ်ၵႂႃႇၵႃႈတီႈႁိူၼ်းထႃႇဝရႃႉၽြႃး၊ၵူႈပီၵူႈပီ၊ပေႇၼိၼ်ႇၼႃႉ၊ၼၼ်ႉယႃႉယူၵ်ႉမၼ်းၼႃႇလူင်လၢင်တေႃႇထိုင်ႁွတ်ႈႁွင်ႉႁႆႈသေလႄႈဢမ်ႇၵိၼ်ဢမ်ႇၶူပ်းသေၸိူဝ်ႉသေပိူင်လႄႈယူႇဢေႃႈ။- 8ၽူဝ်မၼ်းဢေးလႃႉၵႃႇၼႃႉ၊ၼၼ်ႉထၢမ်တီႈမၼ်းလႄႈဝႃႈ၊ “ႁၼ်ႇၼႃႉ၊႟။ ၵွပ်ႈသင်လႄႈမႂ်းႁွင်ႉႁႆႈယူႇ။ ၵွပ်ႈသင်လႄႈမႂ်းဢမ်ႇၵိၼ်ဢမ်ႇၶူပ်း။ ၵွပ်ႈသင်လႄႈမႂ်းၸႂ်လဵၵ်ႉၸႂ်ဢူၼ်ႈယူႇ။ ၸွင်ႇၵဝ်ဢမ်ႇလီတီႈမႂ်းလိူဝ်တွၼ်းၼႃႇသေလုၵ်ႈၸၢႆးသိပ်းၵေႃႉၼၼ်ႉႁိုဝ်း၊” ဝႃႈၼင်ႇၼႆဢေႃႈ။
ႁၼ်ႇၼႃႉတင်းဢေးလိ
9-10မီးဝၼ်းၼိုင်ႈ၊လိုၼ်းသေၶဝ်ၵိၼ်ၶူပ်းၵႃႈတီႈတၢင်းလူႇဢၼ်သၢၵ်ႈၵၢပ်ႈၵႃႈတီႈဝဵင်းသိလေႃႇ၊ယဝ်ႉၼၼ်ႉ၊ႁၼ်ႇၼႃႉ၊မီးတင်းၸႂ်ဢၼ်ႁဵဝ်ႇၸွပ်ႈၼႃႇ၊လုၵ်ႉလႄႈၵႂႃႇၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃး၊သေလႄႈသူးတွင်းတီႈမၼ်းၸဝ်ႈလူၺ်ႈတင်းၸႂ်ဢၼ်ၶေႃးၶူမ်ၼႃႇလႄႈၼမ်ႉတႃတူၵ်းၼမ်ၼႃႇယူႇဢေႃႈ။ မိူဝ်ႈယၢမ်းၼၼ်ႉယဵၸ်ႈပရေႃးႁဵၵ်ႈ#1:9 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈဢေးလိ၊ၼင်ႈယူႇၵႃႈၼိူဝ်တင်ႇမၼ်းၵႃႈႁိမ်းၼႃႈၽၵ်းတူၵျွင်းပိၵ်ႈမၢၼ်ႇထႃႇဝရႃႉၽြႃး၊ၼၼ်ႉဢေႃႈ။- 11ႁၼ်ႇၼႃႉ၊တိူင်ႇၵၢဝ်ႇဝႆႉၵတိလႄႈဝႃႈၸမ်ႉ၊ “ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊တီႈၶႃႈ။ ၸဝ်ႈႁဝ်းလူတူၺ်းၶႃႈၸဝ်ႈၼႆႉလူး။ တူၺ်းႁၼ်တုၵ်ႉၶႃႉၶႃႈၸဝ်ႈႁဝ်းၼႆႉလႄႈၶုၵ်းၸႂ်လႆႈၶႃႈၸဝ်ႈသေၵမ်း။ ပေႃးၸဝ်ႈႁဝ်းပၼ်လုၵ်ႈၸၢႆးၵေႃႉၼိုင်ႈတီႈၶႃႈၸဝ်ႈၸိုင်၊ၶႃႈၸဝ်ႈတၵ်းဢဝ်မၼ်းသၢၵ်ႈၵၢပ်ႈတီႈၸဝ်ႈႁဝ်းၸူဝ်ႈဢသၢၵ်ႈမၼ်းလႄႈၶႃႈၸဝ်ႈတၵ်းဢမ်ႇႁဵတ်းတၢင်းဢၼ်ထႃႁူဝ်မၼ်းလႃးလႃး#1:11 “ဢမ်ႇႁဵတ်းတၢင်းဢၼ်ထႃႁူဝ်မၼ်းလႃးလႃး” - ၼႆႉပဵၼ်သၢၵ်ႈသေႇတၢင်းဢၼ်သၢၵ်ႈၵၢပ်ႈတီႈထႃႇဝရႃႉၽြႃးဢေႃႈဝႃႈၼႆၶႃႈၸဝ်ႈႁဝ်းဝႆႉၵတိတီႈၶႃႈဢေႃႈ၊” ဝႃႈၼင်ႇၼႆဢေႃႈ။
12 ႁၼ်ႇၼႃႉ၊သိုပ်ႇသူးတွင်းတီႈထႃႇဝရႃႉၽြႃး၊ႁိုင်ၼႃႇလႄႈဢေးလိ၊ၵေႃႈပႂ်ႉတူၺ်းသူပ်းမၼ်းဢေႃႈ။- 13မၼ်းသူးတွင်းၵႃႈၼႂ်းၸႂ်ၵူၺ်းလႄႈ၊ပိၵ်ႉသမ်ႉသူပ်းမၼ်းတူင်ႉယူႇသေၵေႃႈဢမ်ႇဢွၵ်ႇသဵင်လႃးလႃး။ ပိူဝ်ႈၼႆလႄႈဢေးလိ၊ထၢင်ႇမၼ်းမဝ်းလဝ်ႈသေယဝ်ႉ၊- 14လၢတ်ႈတီႈမၼ်းၼၼ်ႉလႄႈဝႃႈ၊ “မႂ်းတၵ်းပဵၼ်ၶီႈလဝ်ႈယူႇႁိုင်ၵႃႈႁိုဝ်။ တိုတ်းပႅတ်ႈၵိၼ်လဝ်ႈမႂ်းတႃႉ၊” ဝႃႈၼင်ႇၼႆဢေႃႈ။
15 ႁၼ်ႇၼႃႉ၊ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈမဝ်းလဝ်ႈဢမ်ႇၸႂ်ႈၶႃႈ။ ၵဝ်ၶႃႈၸႂ်လဵၵ်ႉၸႂ်ဢူၼ်ႈၼႃႇလႄႈသူးတွင်းယူႇတီႈၶႃႈဢေႃႈ။ ၵဝ်ၶႃႈဢဝ်တုၵ်ႉၶႃႉၵဝ်ၶႃႈၽုၺ်ႇဢွၵ်ႇၼႄပျႃးၵႃႈတီႈၽၢႆႇၼႃႈထႃႇဝရႃႉၽြႃး၊ယူႇတီႈၶႃႈဢေႃႈ။- 16ယႃႇပေထၢင်ႇဝႃႈ၊ၵဝ်ၶႃႈၼႆႉပဵၼ်မႄႈယိင်းဢၼ်မဝ်ဢၼ်မၢင်သေၵမ်း။ ၵဝ်ၶႃႈႁဵတ်းပထၼႃႇသူးတွင်းယူႇၸိူဝ်ႉၼင်ႇၼႆၵွပ်ႈပိူဝ်ႈဢၼ်ၵဝ်ၶႃႈငိၼ်းၽၢၼ်ထိုင်ၸႂ်ၼႃႇၶႃႈဢေႃႈ၊” ဝႃႈၼင်ႇၼႆဢေႃႈ။
17 ဢေးလိ၊ၵေႃႈလၢတ်ႈလႄႈဝႃႈ၊ “ၵႂႃႇၼိမ်ၼိမ်လီလီတႃႉ။ ႁႂ်ႈၽြႃးပဵၼ်ၸဝ်ႈမဵဝ်းဢိသရေး၊ၼၼ်ႉဢဵတ်းလူပၼ်ၵႃႈဢၼ်မႂ်းလႆႈသူးတွင်းယဝ်ႉၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
18မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ႁႂ်ႈၵဝ်ၶႃႈပဵၼ်ၵေႃႉဢၼ်ၵိုင်ႇထိူၵ်ႈၵၼ်တင်းတၢင်းဢၼ်ၸဝ်ႈမီးၸႂ်ၵရုၼႃႇဢၼ်ဢဵတ်းလူၼၼ်ႉသေၵမ်းလူၺ်ႈ၊” ဝႃႈၼင်ႇၼႆသေယဝ်ႉ၊မိူဝ်းၵႂႃႇလႄႈၵိၼ်တၢင်းၵိၼ်တၢင်းၶူပ်းသေလႄႈယင်းဢမ်ႇမီးၼႃႈငိူဝ်ႈၼႃႈငဝ်ထႅင်ႈသေဢိတ်းသေဢီႈယဝ်ႉဢေႃႈ။
သမူၺ်ႇလႃႉၵိူတ်ႇလဵင်ႉမႃးလႄႈဢဝ်သၢၵ်ႈၵၢပ်ႈ
19ၼႂ်းဝၼ်းမိူဝ်ႈၽုၵ်ႈၼၼ်ႉဢေးလႃႉၵႃႇၼႃႉ၊တင်းၵူၼ်းႁိူၼ်းၵူၼ်းယေးမၼ်းလုၵ်ႉၸဝ်ႉၸဝ်ႉသေယဝ်ႉ၊ႁဵတ်းဝၢတ်ႈတၢင်းဢၼ်ဝႆႈသႃၵူဝ်းၵႂၢႆႇထႃႇဝရႃႉၽြႃး၊သေလႄႈဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈႁိူၼ်းၶဝ်ဝဵင်းရႃႇမႃႉ၊ၼၼ်ႉသေဢေႃႈ။ ဢေးလႃႉၵႃႇၼႃႉ၊ၵေႃႈၶဝ်ႈၸူးၼွၼ်းလူၺ်ႈၵၼ်တင်းမေးမၼ်းႁၼ်ႇၼႃႉ၊လႄႈထႃႇဝရႃႉၽြႃး၊ပၼ်ႁႂ်ႈၵႂၢမ်းသူးတွင်းမႄႈယိင်းၼၼ်ႉပျေႉၸုမ်ႇဢေႃႈ။- 20ပိူဝ်ႈၼႆလႄႈႁၼ်ႇၼႃႉ၊ပႃးပတိၵ်ႈသၼ်ႇထေႇမႃးသေယဝ်ႉ၊မိူဝ်ႈဢၼ်ၶိင်ႇၶႃႇမၼ်းၸေးၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊သမူၺ်ႇလႃႉ၊#1:20 “သမူၺ်ႇလႃႉ” - ၼႂ်းၵႂၢမ်းႁေႇပြႄးပွင်ႇဝႃႈ၊ “ၸိုဝ်ႈသဵင်ၽြႃးပဵၼ်ၸဝ်ႈ၊” သေၵေႃႈ၊တီႈၼႆႉၸမ်ႉမၼ်းပွင်ႇဝႃႈ၊ “ၶေႃယွၼ်း” ဢေႃႈ ဢေႃႈ။ မၼ်းၼၼ်ႉမွၵ်ႇလၢတ်ႈၼႄပိူၼ်ႈလႄႈဝႃႈ၊ “ၵဝ်ၶႃႈသူးတွင်းယွၼ်းဢဝ်မၼ်းတီႈထႃႇဝရႃႉၽြႃး၊ဢေႃႈ၊” ဝႃႈၼင်ႇၼႆဢေႃႈ။
21ၶိင်ႇၶႃႇဢၼ်ဢေးလႃႉၵႃႇၼႃႉ၊တင်းၵူၼ်းႁိူၼ်းၵူၼ်းယေးမၼ်းတင်းလၢႆတၵ်းဢွၼ်ၵၼ်ၶိုၼ်ႈၸူးၵႃႈတီႈဝဵင်းသိလေႃႇ၊ႁႂ်ႈလႆႈႁဵတ်းတၢင်းလူႇတီႈထႃႇဝရႃႉၽြႃး၊ဢၼ်ႁဵတ်းၵူႈပီဢိၵ်ႇတင်းၶိူင်ႈတၢင်းလူႇဢၼ်ၶိုၵ်ႉဢၼ်ၶမ်ႇဢၼ်ၸၢပ်ႈသႅင်ႇၵၼ်တင်းၵတိသဵတ်ႈၸႃႇမၼ်းၼၼ်ႉသမ်ႉႁွတ်ႈထိုင်မႃးထႅင်ႈယဝ်ႉဢေႃႈ။- 22ႁၼ်ႇၼႃႉ၊ဢမ်ႇၵႂႃႇၸွမ်း။ လွင်ႈမၼ်းၸမ်ႉ၊မၼ်းလၢတ်ႈတီႈၽူဝ်မၼ်းလႄႈဝႃႈ၊ “ဝၢႆးသေလုၵ်ႈၸၢႆးၽၢတ်ႇၼူမ်းယဝ်ႉၵမ်းလဵဝ်ၼၼ်ႉၵဝ်ၶႃႈၸင်ႇတၵ်းဢဝ်မၼ်းၵႂႃႇၸူးၵႃႈတီႈၽၢႆႇၼႃႈထႃႇဝရႃႉၽြႃး၊လႄႈႁႂ်ႈမၼ်းယူႇၵႃႈတီႈၼၼ်ႈၸူဝ်ႈဢသၢၵ်ႈမၼ်းဢေႃႈ၊” ဝႃႈၼင်ႇၼႆဢေႃႈ။
23ၽူဝ်မၼ်းဢေးလႃႉၵႃႇၼႃႉ၊ႁပ်ႉတုင်းဢဝ်လႄႈဝႃႈ၊ “ႁဵတ်းၸွမ်းၵႃႈၼင်ႇဢၼ်မႂ်းထၢင်ႇပဵၼ်ဢၼ်လီၼၼ်ႉတႃႉ။ ပႂ်ႉထႃႈတေႃႇထိုင်ႁွတ်ႈမၼ်းၽၢတ်ႇၼူမ်းတႃႉ။ ႁႂ်ႈၵတိထႃႇဝရႃႉၽြႃး၊တႄႇမၼ်ႈသေၵမ်းလူၺ်ႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈမႄႈယိင်းၼၼ်ႉၵိုတ်းဝႆႉယူႇလႄႈလုမ်းလႃးလုၵ်ႈၸၢႆးဢွၼ်ႇမၼ်းတေႃႇထိုင်ႁွတ်ႈၽၢတ်ႇၼူမ်းဢေႃႈ။
24 ႁၼ်ႇၼႃႉ၊ႁႂ်ႈၽၢတ်ႇၼူမ်းယဝ်ႉမၼ်းၸင်ႇဢဝ်လုၵ်ႈဢွၼ်ႇၼၼ်ႉၵႂႃႇၵႃႈတီႈႁိူၼ်းထႃႇဝရႃႉၽြႃး၊ၵႃႈၼႂ်းဝဵင်းသိလေႃႇ၊ဢေႃႈ။ မၼ်းပႃးဢဝ်ဝူဝ်းဢၼ်ဢသၢၵ်ႈမီးသၢမ်ပီ#1:24 “ဝူဝ်းဢၼ်ဢသၢၵ်ႈမီးသၢမ်ပီ” ၵျၢမ်းမူႇႁေႇပြႄးဝႃႈ၊ “ဝူဝ်းသၢမ်တူဝ်” ဢေႃႈတူဝ်ၼိုင်ႈ၊ၽွင်ၶဝ်ႈၵျုင်ႇၸဵတ်းပႄႇ#1:24 “ၽွင်ၶဝ်ႈၵျုင်ႇၸဵတ်းပႄႇ” ၵႂၢမ်းႁေႇပြႄး “ဢေးၽႃႇၼိုင်ႈ” မိူၼ်ၵၼ်တင်း “ၼမ်ႉၼၵ်းသိပ်းၵီးလူဝ်းၵရမ်ႇ” ဢေႃႈတင်းထူင်ၼင်ဢၼ်တဵမ်ဝႆႉတင်းၼမ်ႉမၢၵ်ႇၸပိတ်ႉၼၼ်ႉထူင်ၼိုင်ႈၵႂႃႇဢေႃႈ။ မိူဝ်ႈၼၼ်ႉသမူၺ်ႇလႃႉ၊ၼၼ်ႉဢသၢၵ်ႈယင်းတိုၵ်ႉလဵၵ်ႉၼႃႇဢွၼ်ႇၼႃႇဢေႃႈ။- 25ၶဝ်ႁႅမ်ဝူဝ်းတူဝ်ၼၼ်ႉယဝ်ႉၸင်ႇဢဝ်လုၵ်ႈဢွၼ်ႇၼၼ်ႉၶဝ်ႈၸူးတီႈဢေးလိ၊ဢေႃႈ။- 26ႁၼ်ႇၼႃႉ၊လၢတ်ႈတီႈမၼ်းလႄႈဝႃႈ၊ “ဢူဝ်း။ ၸဝ်ႈတီႈၶႃႈ႟။ ၸွင်ႇၸဝ်ႈတွင်းၵဝ်ၶႃႈယူႇတီႈၶႃႈႁိုဝ်း။ ၵဝ်ၶႃႈၼႆႉပဵၼ်မႄႈယိင်းၵေႃႉဢၼ်ၸဝ်ႈႁၼ်မၼ်းၸုၵ်းယူႇၵႃႈတီႈၼႆႈသေလႄႈသူးတွင်းတီႈထႃႇဝရႃႉၽြႃး၊မိူဝ်ႈဝၼ်းၼၼ်ႉၶႃႈဢေႃႈ။- 27ၵဝ်ၶႃႈသူးတွင်းယွၼ်းဢဝ်လုၵ်ႈဢွၼ်ႇၼႆႉၶႃႈဢေႃႈ။ ထႃႇဝရႃႉၽြႃး၊ဢဵတ်းလူပၼ်ၵႃႈၼင်ႇဢၼ်ၵဝ်ၶႃႈယွၼ်းဢဝ်ၼၼ်ႉၶႃႈယဝ်ႉ။- 28ၵွပ်ႈပိူဝ်ႈၼင်ႇၼၼ်လႄႈၵဝ်ၶႃႈဢဝ်မၼ်းသၢၵ်ႈၵၢပ်ႈတီႈထႃႇဝရႃႉၽြႃး၊ၶႃႈဢေႃႈ။ သၢၵ်ႈၵၢပ်ႈႁႂ်ႈမၼ်းပဵၼ်ၵူၼ်းထႃႇဝရႃႉၽြႃး၊ပိူင်ႇယူႇၸူဝ်ႈဢသၢၵ်ႈမၼ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈႁဵတ်းတၢင်းဢၼ်ၵူဝ်းၵႂၢႆႇဝႆႈသႃၵူဝ်းၵႂၢႆႇထႃႇဝရႃႉၽြႃး၊ၵႃႈတီႈၼၼ်ႈဢေႃႈ။
Currently Selected:
1 သမူၺ်ႇ 1: SHNCL
Highlight
Copy
Compare
Share
Want to have your highlights saved across all your devices? Sign up or sign in
