Zakarii 8
8
KOTA GBIA amu zendo ti mu siriri na gba ti mosoro na Jérusalem
1Tënë ti *KOTA GBIA so ayeke na ndö ti dunia kue asi na mbi, atene:
2Tënë so KOTA GBIA so ayeke na ndö ti dunia kue atene ayeke so:
“Mbi yeke sara mbanda ti *Sion mingi,
nzara ti lo ayeke sara mbi ahon ndoni.
3Tënë so KOTA GBIA atene ayeke so:
Fade mbi yeke kiri ti ga na Sion,
mbi yeke kiri ti duti taa na Jérusalem.
Fade a yeke mu mbeni iri na Jérusalem, atene:
‘Gbata so abata tënë ti yanga ti Nzapa’
si a yeke mu nga iri na hoto ti KOTA GBIA
so ayeke na ndö ti dunia kue, atene:
‘Hoto so ayeke nde si ayeke nzoni kue’.
4Tënë so KOTA GBIA
so ayeke na ndö ti dunia kue atene ayeke so:
Fade ambakoro-koli na ambakoro-wali
ayeke kiri ti duti na be ti gbata ti Jérusalem;
zo oko oko ayeke gbu keke ti tambula na ni,
ngbanga ti so ngu ti ala ahon mingi awe.
5Fade amolenge-koli na amolenge-wali
ayeke si singo na be ti gbata ni ti sara ngia.
6Tënë so KOTA GBIA
so ayeke na ndö ti dunia kue atene ayeke so:
Tongana tanga ti azo ti Israel so angba abaa
so ye ni alingbi ti si laoko pepe,
ti mbi, mbi lingbi ti baa ye ni tongaso?
– so tënë ti yanga ti KOTA GBIA
so ayeke na ndö ti dunia kue laa.
7Tënë so KOTA GBIA
so ayeke na ndö ti dunia kue atene ayeke so:
Azo ti mbi so a gbu ala si a gue na ala na akodro
ti mbage ti To nga na ti mbage ti Do,
fade mbi yeke zi ala.
8 Fade mbi yeke kiri na ala
si ala yeke duti na Jérusalem.
Ala yeke duti azo ti mbi
si mbi yeke duti Nzapa ti ala.
Mbi yeke sara komandema na ndö ti ala
na lege ti batango tënë ti yanga ti mbi
na fango ngbanga ti mbirimbiri.”
9Tënë so KOTA GBIA
so ayeke na ndö ti dunia kue atene ayeke so:
“Ala gbu ngangu!
Ala ma fadeso atënë
so awayanga-Nzapa atene na ngoi
so a yeke zia agere ti kota da ti KOTA GBIA
titene akiri asara da ni.
10Kozoni, zo ayeke wara futa ti kua ti lo pepe,
nyama ayeke wara nga futa ti kua ti lo pepe.
Ndali ti awato,
azo alingbi ti fono na siriri pepe.
Biani, mbi zia zo oko oko ti tiri na mba ti lo.
11Me fadeso, ye so mbi sara ando so,
mbi yeke kiri ti sara ni pepe na tanga ti azo
so angba na fini so;
so tënë ti yanga ti KOTA GBIA
so ayeke na ndö ti dunia kue laa.
12Biani, fade mbi yeke sara si siriri
amu ndö ti sese kue,
akeke ti *vinye ayeke le,
sese ayeke du ale ti kobe,
yayu ayeke tokua ngu-Nzapa.
Mbi yeke mu anzoni ye
so na tanga ti azo ti Israel so angba
titene aga ye ti ala.
13Ala, akodro-gbia ti Juda na ti Israel,
na popo ti amara kue,
ala yeke lani tapande ti mbeni mara so a deba lo.
Me fadeso, mbi soo ala,
ala yeke ga tapande ti mbeni mara
so a sara tufa na ndö ti lo.
Ala sara mbeto pepe, ala gbu ngangu!”
14Tënë so KOTA GBIA
so ayeke na ndö ti dunia kue atene ayeke so:
“Ando, mbi leke na be ti mbi ti sara pasi na ala,
ngbanga ti so akotara ti ala azia ngonzo na be ti mbi;
mbi de ti zia peko ti tënë ni pepe.
15Ti fadeso, mbi leke na be ti mbi
ti sara nzoni na ala,
azo ti Jérusalem
nga na ala, azo ti kodro ti Juda kue.
Ala sara mbeto pepe!
16 Aye so alingbi ala sara ni ayeke so:
Zo oko oko atene taa-tënë na mba ti lo;
na ya ti afango ngbanga ti ala,
ala fâ ngbanga na lege ti taa-tënë
si siriri aga.
17Ayeke nzoni ala gbu li ti ala pepe
ti sara sioni na popo ti ala.
Ala ke tënë ti dengo ba ti mvene,
ngbanga ti so mbi ke aye so kue”;
so tënë ti yanga ti KOTA GBIA laa.
Alango ti kengo kobe ayeke ga alango ti matanga
18Tënë ti *KOTA GBIA so ayeke na ndö ti dunia kue asi na mbi, atene: 19 Tënë so KOTA GBIA so ayeke na ndö ti dunia kue atene ayeke so: “Alango ti kengo kobe so ala azo ti Juda, ala yeke ke na ya ti osio nze ni, oku nze ni, mbarambara nze ni nga na nze baleoko ni ti ngu oko oko, fade alango ni so ayeke kiri ti ga alango ti matanga, alango ti ngia na ti kota ngia nga na ti nzoni matanga.
“Me ayeke nzoni ala ye taa-tënë nga na siriri.”
20Tënë so KOTA GBIA so ayeke na ndö ti dunia kue atene ayeke so:
“Biani, fade amara nde na azo ti agbata mingi
ayeke kiri ti ga gbani gbani na Jérusalem.
21Fade azo ti mbeni gbata ayeke tene
na azo ti mbeni gbata nde, atene:
‘Ala ga, e gue, e voro KOTA GBIA,
e gi le ti KOTA GBIA
so ayeke na ndö ti dunia kue.’
Fade azo ni ayeke kiri tënë:
‘E nga, e yeke gue!’
22Azo mingi na angangu mara
ayeke ga na Jérusalem ti gi le ti KOTA GBIA
so ayeke na ndö ti dunia kue,
ala yeke ga nga ti voro lo.
23Tënë so KOTA GBIA
so ayeke na ndö ti dunia kue atene ayeke so:
na ngoi ni so, fade azo baleoko
so ayeke tene ayanga ti kodro nde nde
ayeke gbu mbeni zuife oko na yanga ti bongo ti lo
si ayeke tene na lo: ‘E nga, e ye ti gue na ala,
ngbanga ti so e ma a tene, Nzapa ayeke na ala.’ ”
Currently Selected:
Zakarii 8: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
