Zakarii 7
7
Tënë ti kengo kobe ti sambela
1Na ngu osio ni so Darius ayeke gbia, na lango osio ti nze gumbaya ni, so ti tene na nze ti Kisleu, tënë ti *KOTA GBIA asi na Zakarii. 2Azo ti gbata ti Betel atokua lani Sareser, lo na Regem-Melek nga na ambeni zo na tere ti ala titene ala gue na ya ti kota da ti KOTA GBIA. A tokua ala ti voro tere ti ala na KOTA GBIA ti sara si be ti lo ade, 3ti hunda tënë so na awayango-sandaga so ayeke sara kua na ya ti kota da ti KOTA GBIA so ayeke na ndö ti dunia kue nga na awayanga-Nzapa; hundango tënë ni ayeke so: “Alingbi e ngba ti toto, ti ke kobe na nze oku ni ti sambela tongana ti so e sara na ya ti angu mingi so ahon so?” 4Tongaso, tënë ti KOTA GBIA so ayeke na ndö ti dunia kue asi na mbi, atene: 5 Mo tene na azo ti kodro ni kue nga na awayango-sandaga, mo tene:
“Asara laso ngu balembarambara awe
so ala yeke ke kobe
si ala yeke toto na nze oku ni
nga na nze mbarambara ni;
ala sara aye ni so ndali ti mbi?
6So lani ala yeke te si ala yeke nyon so,
ala sara ni gi ndali ti ala wani pepe?”
7Ando, KOTA GBIA azia mara ti atënë tongaso na yanga ti awayanga-Nzapa ti tene ni awe. Ala tene tënë ni na ngoi so Jérusalem na agbata so angoro ni ayeke na siriri si na sese ti mbage ti Mbongo nga na ti *Kodro-ti-gbeni, azo asi singo daa.
8Tënë ti KOTA GBIA asi na Zakarii, atene: 9Tënë so KOTA GBIA so ayeke na ndö ti dunia kue atene ayeke so:
“Ala fâ ngbanga ti azo na lege ti taa-tënë;
ala ye tere na popo ti ala
si zo oko oko asara nzoni be na mba ti lo.
10Ala sara mbana pepe na awali-mua
nga na anyindu,
wala na agene nga na azo ti mawa.
Ayeke nzoni zo agbu li ti lo pepe
ti sara sioni na mba ti lo.”
11Me azo ni ake ti ma tënë ni; ala sara ngangu li, ala kanga mê ti ala titene ala ma ndo pepe. 12Ala kiri akpengba be ti ala ngangu tongana diaman; ala ke ti ma atënë ti ndia na atënë ti KOTA GBIA; atënë so KOTA GBIA so ayeke na ndö ti dunia kue afa na ala na lege ti Yingo ti lo si akozo wayanga-Nzapa afa peko ni so. Tongaso ngonzo agbu KOTA GBIA mingi, lo so lo yeke na ndö ti dunia kue so. 13Nilaa KOTA GBIA so ayeke na ndö ti dunia kue, atene:
“So lani mbi iri ala si ala ke ti ma so,
mbi nga, ala iri mbi si mbi ke ti ma ala.
14Tongana ti so kota pupu amu aye ahon na ni kirikiri,
mbi kangbi ala na popo ti amara nde nde
so ala hinga ala kozoni pepe.
Kodro ni abuba kue na peko ti ala,
mbeni zo ti kiri ti fono
na ya ti kodro ni ayeke daa pepe.
Kodro so lani ayeke mbeni nzoni kodro,
kodro ni akiri aga ngonda awe.”
Currently Selected:
Zakarii 7: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
