Zakarii 3
3
Osio ye so wayanga-Nzapa abaa: kota wayango-sandaga Yeshua
1 Na pekoni, na ya ti mbeni ye tongana bango-li, *KOTA GBIA asara si mbi baa kota wayango-sandaga Yeshua. Lo yeke luti na dawa ti *ange ti KOTA GBIA. Andaa Satan ayeke luti na mbage ti maboko ti lo ti koli, ti bi tënë na li ti lo. 2 Ange ti KOTA GBIA atene na Satan: “Satan, ayeke nzoni KOTA GBIA akanga yanga ti mo! Biani, ayeke nzoni KOTA GBIA akanga yanga ti mo; lo so lo soro Jérusalem so. Ti Yeshua, lo yeke tongana mbeni nduru keke ti wâ so a gboto ni na le ti wâ asigigi na ni awe pepe?”
3Andaa Yeshua ayu bongo ti sarate si lo yeke luti na dawa ti ange ni. 4Ange ni amu yanga na azo so ayeke luti na dawa ti lo, atene: “Ala zi asarate bongo so na tere ti lo.” Na pekoni, lo tene na Yeshua: “Baa, mbi zi asioni ti mo awe, mbi yeke yu na mo abongo ti matanga.”
5Ange ni akiri atene: Ala kanga na li ti Yeshua mbeni nzoni bongo. Azo ni akanga na li ti lo nzoni bongo ni si na dawa ti ange ni, ala yu na lo bongo. 6Na pekoni, ange ti KOTA GBIA atene tënë so na Yeshua, atene: 7Tënë so KOTA GBIA so ayeke na ndö ti dunia kue atene ayeke so:
“Tongana mo tambula na lege ti mbi
si mo sara ye alingbi na andia ti mbi,
mo laa, mo yeke ga makonzi ti kota da ti mbi
na ti ya ti gbagba ti kota da ni.
Mbi yeke zia nga mo na popo ti azo
so ayeke sara kua ti mbi ge so.”
Nzapa ayeke sara titene zo ti kua ti lo aga
8“Yeshua, kota wayango-sandaga, mo ma mbi!
Ala awayango-sandaga,
ala so ala na lo ayeke sara kua so, ala ma mbi!
Biani, ala awayango-sandaga,
ala yeke tongana ye so ayeke fa na azo
tënë ti mbeni ye so ayeke si ande.
Mbi yeke sara si zo ti kua ti mbi aga,
lo so iri ti lo ayeke ‘Kete keke so asigigi’.
9Baa, mbi zia mbeni têne na dawa ti Yeshua.
Na ndö ti têne ni,
ale ni ayeke daa mbarambara.
Mbi wani, mbi yeke kpaka mbeni nzoroko
na ndö ti têne ni;
so tënë ti yanga ti *KOTA GBIA
so ayeke na ndö ti dunia kue laa.
Gi na lango oko,
mbi yeke zi asioni ti kodro so.
10 Na lango ni so,
fade ala yeke tisa tere na popo ti ala
ti ga ti duti na siriri na gbe ti akeke ti *vinye ti ala
nga na gbe ti akeke ti fige ti ala;
so tënë ti yanga ti KOTA GBIA
so ayeke na ndö ti dunia kue laa.”
Currently Selected:
Zakarii 3: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
