Zakarii 2
2
Use ye so wayanga-Nzapa abaa: adidi na azo ti pikango ndao
1Mbi yo le ti mbi na nduzu si na ya ti mbeni ye tongana bango-li, mbi kiri mbi baa adidi osio. 2Mbi hunda *ange so ayeke tene tënë na mbi so, mbi tene: “Adidi so aye ti fa nyen?” Lo kiri tënë na mbi, lo tene: “Adidi ni afa tënë ti angangu mara so akangbi azo ti Juda, ti Israel na ti Jérusalem na ando nde nde.”
3Na pekoni, *KOTA GBIA afa na mbi azo ti pikango ndao osio. 4Mbi hunda ndo, mbi tene: “Ala ga ti sara nyen?” Lo kiri tënë na mbi, lo tene: “Azo ti pikango ndao ni aga ti zia mbeto nga ti tumba angangu mara so akangbi azo ti Juda na ando nde nde; mbeni zo oko so agbu le ni na angangu mara ni ayeke daa pepe.”
Ota ye so wayanga-Nzapa abaa: kamba ti hakango na ye
5Mbi yo le ti mbi na nduzu si na ya ti mbeni ye tongana bango-li, mbi kiri mbi baa mbeni koli so agbu kamba ti hakango na ye na maboko ti lo. 6Mbi hunda lo, mbi tene: “Mo yeke gue na ndo wa?” Lo kiri tënë na mbi, lo tene: “Mbi yeke gue ti haka gbata ti Jérusalem, ti hinga yongoro ni na nduru ni.”
7 *Ange so ayeke tene tënë na mbi so ague na dawa ti mbeni ange nde so ayeke ga ti tengbi na lo. 8Kozo ange ni atene na mbeni so, atene: “Kpe loro, mo tene na maseka-koli so kâ so, mo tene: Fade gbata ti Jérusalem ayeke ngba senge tongaso, a yeke sara gbagba na tere ni pepe, ngbanga ti so azo na anyama so ayeke lango na ya ni ayeke wu ahon ndoni. 9So tënë ti yanga ti *KOTA GBIA laa: ‘Ti mbi, fade mbi yeke duti daa; mbi yeke duti tongana ngangu gbagba ti wâ na tere ti gbata ni kue. Taa gi na ya ti gbata ni, mbi laa mbi yeke sara gonda ni.’ ”
KOTA GBIA airi azo so a gue na ala na kodro wande ti kiri
10So tënë ti yanga ti *KOTA GBIA laa:
“Ala londo, ala londo ahon!
Ala so mbi kangbi ala na ndangoro osio ti sese kue so,
ala londo hio na sese ti Banga, ala hon!
So tënë ti yanga ti KOTA GBIA laa.
11He, ala azo ti *Sion, ala londo, ala kpe,
ala so aduti kâ na Babilone so!”
12KOTA GBIA so ayeke na ndö ti dunia kue - lo so lo tokua mbi na amara so anzi aye ti ala kue, azo ti Sion, tënë so lo tene ayeke so:
“Zo so andu ala,
andaa lo ndu mboma ti le ti mbi awe.
13Biani, mbi yeke yoro maboko ti mbi
ti pika amara ni so.
Tongaso, azo so amara ni agbu ala lani na ngbaa so,
angbaa ni ayeke kiri ti gbu amara ni
tongana aye so a gbu na peko ti bira.”
Tongana ye ni asi, fade ala yeke hinga atene, KOTA GBIA so ayeke na ndö ti dunia kue laa atokua mbi.
14So tënë ti yanga ti KOTA GBIA laa:
“Ala dekongo na ngia, ala duti na ngia,
ala azo ti Sion.
Baa, mbi yeke ga,
fade mbi yeke duti na popo ti ala.
15Na lango ni so, fade amara mingi
ayeke ngba ngbango na peko ti KOTA GBIA.
Ala yeke ga azo ti mbi wani
si mbi yeke duti na popo ti ala.”
Tongana ye ni asi, fade ala yeke hinga atene, KOTA GBIA so ayeke na ndö ti dunia kue laa atokua mbi na ala.
16Fade KOTA GBIA ayeke kiri ti mu Juda
titene aga ye ti lo,
na ya ti sese so ayeke nde si ayeke nzoni kue.
Lo yeke kiri ti soro Jérusalem titene aga ye ti lo.
17Azo kue, ala kai kpoo na dawa ti KOTA GBIA!
Biani, lo londo, lo yeke sigigi na ya ti da ti lo
so ayeke nde si ayeke nzoni kue.
Currently Selected:
Zakarii 2: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
