Abia (Psaumes) 135
135
Mbi hinga so KOTA GBIA ayeke kota
1Aleluya!
Ala sepela *KOTA GBIA!
Ala azo ti kua ti KOTA GBIA, ala sepela lo,
2ala so ayeke luti na ya ti da ti KOTA GBIA,
na ya ti gbagba ti da ti Nzapa ti e.
3Ala sepela KOTA GBIA, ngbanga ti so lo yeke nzoni!
Ala he bia ti gonda iri ti lo,
ngbanga ti so lo yeke wara azo na ngia!
4Biani, KOTA GBIA asoro Jacob ndali ti lo wani,
lo soro Israel titene aga ye ti lo wani.
5Biani, mbi hinga so KOTA GBIA ayeke kota;
Kota Gbia ti e ayeke na ndö ti anzapa kue.
6Ye so kue be ti KOTA GBIA aye,
lo yeke sara ni na yayu nga na sese,
na ya ti akota ngu-ingo nga na ya ti akota du so ali mingi.
7Lo sara si ambinda alondo kâ na nda ti sese
si ague na nduzu;
lo sara wâ ti bekpa titene ngu-Nzapa apika,
lo sigigi na pupu na ndo so lo bata ni daa.
8 Lo laa lo fâ akozo molenge-koli na Ezipte,
akozo molenge ti azo na ti anyama.
9 Lo sara aye ti kpene na aye ti dongo be
na popo ti azo ti mo, Ezipte,
na gbia Faraon na azo ti kua ti lo kue.
10Lo fâ gba ti amara,
lo fâ nga angangu gbia:
11 Sihon, gbia ti azo ti mara ti Amori,
Og, gbia ti Bashan
na agbia ti akodro ti Kanaan kue.
12Lo zi sese ti azo ni na maboko ti ala,
lo mu ni na azo ti Israel, azo ti lo titene aga ye ti ala.
13KOTA GBIA, iri ti mo ayeke ngba lakue,
KOTA GBIA, azo ayeke dabe ti ala na mo ngu na ngu.
14Biani, KOTA GBIA ayeke fâ ngbanga ti azo ti lo na legeni,
lo yeke baa mawa ti azo ti kua ti lo.
15 Anzapa ti amara nde, a sara ala na wen ti nginza nga na lôro;
maboko ti zo laa asara ala.
16Ala yeke na yanga, me ala yeke tene tënë pepe;
ala yeke na le, me ala yeke baa ndo pepe;
17ala yeke na mê, me ala yeke ma ndo pepe;
ala yeke wu nga pupu kete na yanga ti ala pepe.
18Azo so asara anzapa ni,
azo so azia be ti ala na ndö ti anzapa ni,
ayeke nzoni ala ga tongana ala!
19 Ala amara ti Israel, ala mu singila na KOTA GBIA!
Ala *ahale ti Aaron, ala mu singila na KOTA GBIA!
20Ala amara ti Lévi, ala mu singila na KOTA GBIA!
Ala so ayeke kpe mbeto ti KOTA GBIA,
ala mu singila na KOTA GBIA!
21Ti londo na *Sion,
ayeke nzoni azo amu singila na KOTA GBIA
so ndo ti duti ti lo ayeke na Jérusalem!
Aleluya!
Currently Selected:
Abia (Psaumes) 135: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010