Wungo ti azo 5

Alingbi azo ti Israel atumba azo so aga *sioni na popo ti ala

1 *KOTA GBIA atene na Moïse: 2“Mo mu yanga na azo ti Israel ti tumba na ya ti bâbâ azo ti buruma kue, azo so sioni kobela ayeke yuru na lege ti tere ti ala ti koli wala ti wali, nga na azo so aga *sioni na ndungo mbeni kuâ. 3 Ataa koli, ataa wali, fade ala yeke tumba ala kue; ala yeke tumba ala ti sigigi na ya ti bâbâ ni, tongaso si ala sara titene bâbâ ni aga *sioni pepe, na ndo so mbi yeke duti daa na popo ti azo ti Israel.” 4Azo ti Israel asara ye alingbi na tënë ni: ala tumba azo ni na ya ti bâbâ ni alingbi na yanga so KOTA GBIA amu na Moïse.

Lekengo tënë na peko ti sioni so zo asara

5 *KOTA GBIA atene na Moïse: 6“Tene na azo ti Israel, mo tene: Tongana mbeni koli wala mbeni wali asara sioni na mba ti lo si lo sara nga siokpari ti ke KOTA GBIA, fade tënë ayeke ngba na li ti lo. 7Alingbi zo ni afa na gigi siokpari so lo sara. Na pekoni, lo yeke futa na mba ti lo ni ye ti sioni so lo sara na lo. Ye so lo lingbi ti futa, lo yeke kangbi ya ni oku si lo yeke mu mbeni mbage ni oko ti zia na ndö ti ye oku so lo futa so. 8 Tongana wa ti ye ni akui si mbeni sewa ti lo ti mu ye ti peko ti lo ayeke daa pepe, fade a yeke mu ye ni na KOTA GBIA, so ti tene na wayango-sandaga. Na pekoni, zo ti sarango siokpari ni ayeke kiri ti ga na mbeni koli-taba ti mu na *sandaga ndali ti siokpari ti lo. Wayango-sandaga ayeke sara ye ti fa atene, KOTA GBIA azi siokpari na li ti zo ni awe. 9Aye so kue azo ti Israel ayeke zi na ndö ti asandaga so ala ga na ni na KOTA GBIA, ayeke ti wayango-sandaga. 10Ye so zo oko oko azia nde ndali ti KOTA GBIA, ayeke ti wayango-sandaga; ye so zo oko oko ayeke mu na wayango-sandaga ayeke nga ti wayango-sandaga ni.”

Ndia ndali ti wali so a ma a tene, lo gi mbeni koli nde

11 *KOTA GBIA atene na Moïse: 12“Tene na azo ti Israel, mo tene: Tongana wali ti mbeni koli asara ye na legeni pepe, lo zia koli ti lo ti gi mbeni koli nde, 13tongana mbeni koli nde alango na lo na hondengo ni si koli ti lo ahinga pepe, tongana wali ni aga *sioni na lege so awe, me mbeni zo abaa lo daa pepe si a gbu nga lo daa pepe, 14tongana be ti koli ti wali ni afa na lo atene, wali ti lo agi koli, ataa tënë ni ayeke taa-tënë, ataa tënë ni ayeke mvene si koli ni asara mbanda ti wali ti lo, 15fade koli ni ayeke gue na wali ti lo na wayango-sandaga. Koli ni ayeke ga na kilo ota ti farini ti *orze ti mu na *sandaga ndali ti wali ni. Koli ni ayeke tuku mafuta na ya ti farini ni pepe, lo yeke tuku nga dukani na ndö ni pepe, ngbanga ti so sandaga ni so ayeke sandaga ti mbanda. A yeke mu ka sandaga ni ti hinga wala mbeni siokpari ayeke daa. 16Fade wayango-sandaga ayeke gue na wali ni titene lo luti na dawa ti KOTA GBIA. 17Wayango-sandaga ni ayeke mu ngu so a zia ni nde ndali ti Nzapa na ya ti mbeni ta ti sese, lo yeke mu mbeni fuku ti sese ti ya ti da ti Nzapa si lo tuku na ya ti ngu ni. 18Na pekoni, wayango-sandaga ayeke zia wali ni ti luti na nduzu na dawa ti KOTA GBIA, lo yeke zi ya ti kua ti li ti wali ni, lo yeke zia na ya ti maboko ti lo sandaga ti hinga atene, siokpari ayeke daa, so ti tene sandaga ti mbanda. Ti wayango-sandaga ni, lo yeke gbu na ya ti maboko ti lo sengo ngu so ayeke ga na deba na ndö ti zo. 19Wayango-sandaga ni ayeke tene na wali ni ti deba yanga ti lo tongaso: ‘Tongana mbeni koli nde alango na mo pepe, tongana mo handa koli ti mo pepe si mo sara nga ye ti kirikiri ti buba tere ti mo pepe, ayeke nzoni sengo ngu so ayeke ga na deba na ndö ti zo, aga na deba na ndö ti mo pepe. 20Me tongana mo handa koli ti mo si mo sara ye ti kirikiri ti buba tere ti mo si mbeni koli nde alango na mo, 21ayeke nzoni KOTA GBIA asara si mo du pepe, ya ti mo asuku si azo ti mara ti mo ayeke mu mo tongana tapande ti deba amba ti ala. 22Ayeke nzoni ngu so ayeke ga na deba na ndö ti zo ague na ya ti avi ti mo ti sara si ya ti mo asuku si mo du nga pepe.’ Fade wali ni ayeke kiri tënë: ‘Amen, amen!’

23“Na pekoni, wayango-sandaga ayeke su atënë ti dengo ba so na mbeti si lo yeke sukula ni na ya ti ngu ni. 24Lo yeke mu na wali ni sengo ngu so ayeke ga na deba na ndö ti zo titene lo nyon si aga sengo ye na ya ti lo. 25Wayango-sandaga ayeke mu sandaga ti mbanda na maboko ti wali ni, lo yeke ya ni na nduzu ti fa na KOTA GBIA si lo yeke gue ti zia ni na ndö ti gbalaka. 26 Lo yeke fu mbeni farini ni tongana sandaga ti dango be asi ya ti maboko ti lo, lo yeke zö ni na ndö ti gbalaka. Na pekoni, lo yeke mu ngu ni na wali ni titene lo nyon. 27Tongana wali ni ahanda koli ti lo si lo sara ye ti kirikiri ti buba tere ti lo, na peko ti nyongo ngu ni, ye so ayeke si na lo ayeke so: fade ngu so ayeke ga na deba na ndö ti zo ayeke gue na ya ti avi ti lo, ayeke suku ya ti lo si lo yeke du pepe. Azo ti mara ti lo ayeke mu lo tongana tapande ti deba amba ti ala. 28Tongana wali ni asara ye ti kirikiri ti buba tere ti lo pepe, tongana lo ga *sioni pepe, fade mbeni ye ti sioni ayeke wara lo pepe si lo yeke du amolenge.

29“So ayeke ndia na ndö ti tënë ti sarango mbanda ti wali so ahanda koli ti lo, lo sara ye ti kirikiri ti buba tere ti lo si lo ga *sioni, 30wala ndia ndali ti koli so asara mbanda ti wali ti lo, ngbanga ti so lo baa lo tene, wali ni agi mbeni koli nde. Fade koli ni ayeke gue na wali ni ti zia lo, lo luti na dawa ti KOTA GBIA si wayango-sandaga ayeke sara aye na lege ti ndia so na ndö ti wali ni. 31Ti koli ni, fade tënë ayeke na li ti lo pepe; me tongana wali ni asara sioni biani, sioni ti lo ni ayeke kiri na li ti lo wani.”

Currently Selected:

Wungo ti azo 5: MNF2010

Highlight

Copy