Wungo ti azo 4

Kua ti azo ti mara ti Lévi

a. Kua ti ahale ti Kehat

1 *KOTA GBIA atene na Moïse na Aaron: 2“Ala diko wungo ti *ahale ti Kehat so ayeke na popo ti azo ti mara ti Lévi, na lege ti akete mara ti ala oko oko nga na lege ti asewa ti ala oko oko. 3Ala diko ala so ngu ti ala alondo na ngu baleota asi na ngu baleoku, ala so alingbi ti sara kua na ya ti da ti bongo so KOTA GBIA na azo ti lo ayeke wara tere daa. 4Kua ti ahale ti Kehat na ya ti da ti bongo so KOTA GBIA na azo ti lo ayeke tere daa ayeke ti batango aye nde nde so ayeke nde si ayeke nzoni kue ahon atanga ni. 5Na ndembe so tambula ni ayeke londo, fade Aaron na amolenge ti lo ayeke ga ti zi ridoo so akangbi ya ti da ni ti kanga na ndö ti sanduku so a zia na ya ni atêne so a su atënë ti mbuki na le ni. 6 Ala yeke kanga ndö ni na mbeni pendere poro ti nyama, ala yeke bi na ndö ti aye ni kue, mbeni kota bongo so nzoroko ni akpa le ti nduzu. Na pekoni, ala yeke yoro ayongoro keke ti yongo na sanduku ni. 7 Ala yeke bi na ndö ti meza so a yeke zia mapa na ndö ni bongo so nzoroko ni akpa le ti nduzu si ala yeke zia na ndö ni aye tongana: akpangbara sembe, akete kopo, adu ti sembe nga na akopo ti samba. Ala yeke zia na ndö ti meza ni mapa so ala lingbi ti zia na dawa ti mbi KOTA GBIA lakue lakue. 8Ala yeke bi na ndö ti aye ni kue mbeni bengba bongo so ayeke za zango si ala yeke kanga ndö ni na mbeni pendere poro ti nyama. Na pekoni, ala yeke yoro ayongoro keke na tere ti meza ni ti yo na ni. 9Ala yeke mu mbeni bongo so nzoroko ni akpa le ti nduzu, ala bi na ndö ti gere ti alamba, alamba ni na aye ti tere ni kue, aye ti zingo na zende na tere ti ameshe ti lamba ni, akete sembe so a yeke tuku amburu ti wâ daa nga na akete ngbenda ti mafuta. 10Ala yeke mu aye ni kue, ala kanga ndö ni na mbeni pendere poro ti nyama. Na pekoni, ala yeke zia ni na ndö ti ye ti yongo na ni. 11Ala yeke zia mbeni bongo so nzoroko ni akpa le ti nduzu na ndö ti gbalaka ti lôro. Ala yeke kanga ndö ni na mbeni pendere poro ti nyama si ala yeke yoro ayongoro keke na tere ti gbalaka ni ti yo na ni. 12Na pekoni, ala yeke mu aye kue ti vorongo na Nzapa so ala yeke sara na kua na ya ti da so a zia nde ndali ti KOTA GBIA, ala yeke zia ni na ya ti mbeni bongo so nzoroko ni akpa le ti nduzu, ala yeke kanga ndö ni na mbeni pendere poro ti nyama si ala yeke zia ni na ndö ti ye ti yongo na ni. 13Ala yeke zi amburu ti wâ so ayeke na ndö ti gbalaka ni si ala yeke kanga ndö ni na mbeni bengba bongo so ayeke za zango. 14Ala yeke zia na ndö ti bongo ni aye kue ti sarango na kua ti yango *sandaga: akete ta ti zongo na dukani, afurshete, apao na adu ti sembe so a yeke zia mene ti anyama daa ti fi na tere ti aye. Ala yeke kanga ndö ti aye ni kue na mbeni pendere poro ti nyama. Na pekoni, ala yeke yoro ayongoro keke na tere ti gbalaka ni ti yo na ni. 15Tongana Aaron na amolenge ti lo akanga akungba ti da ni kue nga na aye so kue a yeke sara na kua na ya ti da ni, gi na ndembe so ala yeke londo ti hon, ahale ti Kehat ayeke ga ti yo aye ni. Me ala yeke ndu mbeni ye ti ya ti kungba ni oko pepe, ngbanga ti ala kui. So kua ti ahale ti Kehat laa. 16Ti Elazar, molenge ti wayango-sandaga Aaron, kua ti lo ayeke ti baa lege ti mafuta ti ziango na ya ti alamba, dukani ti zongo na wâ, sandaga ti ale ti kobe so azo ayeke mu na ya ti lango oko oko nga na mafuta ti tukungo na li ti zo ti zia lo nde. Kua ti lo ayeke nga ti baa ndo na ndö ti da so a zia nde ndali ti Nzapa, na aye ti ya ni kue, aye nde nde ti sarango na kua ti ya ti da ni nga na agbakuru ni kue.”

17KOTA GBIA akiri atene na Moïse na Aaron: 18“Ala sara kue titene azo ti kete mara ti Kehat angba na fini na popo ti azo ti mara ti Lévi. 19Ala sara tongaso si azo ti kete mara ni alingbi ti ngba na fini, ala kui pepe na ndembe so ala yeke ga nduru na ndo so ayeke nde si ayeke nzoni kue ahon atanga ni: ti mo Aaron, mo na amolenge ti mo, fade ala yeke ga ti mu na zo oko oko kua ti lo nga na akungba ti lo ti yongo ni. 20Tongaso, azo ti kete mara ni ayeke li pepe ti baa aye so a zia ni nde ndali ti Nzapa, ataa na ya ti kete ngoi. Tongaso pepe, fade ala yeke kui.”

b. Kua ti ahale ti Gershon

21 *KOTA GBIA atene na Moïse: 22“Mo diko wungo ti *ahale ti Gershon na lege ti asewa ti ala oko oko nga na lege ti akete mara ti ala oko oko. 23Mo yeke diko wungo ti akoli kue so ngu ti ala ato ndani na ngu baleota asi na ngu baleoku, ala so kue alingbi ti sara kua na ya ti da ti bongo so KOTA GBIA na azo ti lo ayeke wara tere daa. 24Akua so azo ti kete mara ti Gershon alingbi ti sara ayeke so: 25ala yeke yo bongo ti li ti da so a zia ni nde ndali ti Nzapa, aporo ti koli-taba nga na apendere poro ti nyama so a yeke kanga na li ti da ni, ridoo ti yanga ti da ti bongo so KOTA GBIA na azo ti lo ayeke wara tere daa. 26 Ala yeke yo nga abongo ti tere ti gbagba so angoro da ni na gbalaka, ridoo ti yanga ti gbagba ni, akamba ti kangango na gbagba ni, na akungba nde nde ti sarango na akua ti ala. 27Akua so azo ti mara ti Gershon ayeke sara ande, ataa ti yongo akungba, ataa ti sarango kua ti ala, ala yeke sara ni na gbe ti komandema ti Aaron na amolenge ti lo. Ala laa ayeke fa na azo ti mara ti Gershon akua ti sarango ni nga na akungba so ala lingbi ti yongo ni. 28So ayeke akua so azo ti kete mara ti Gershon ayeke sara na ya ti da ti bongo so KOTA GBIA na azo ti lo ayeke wara tere daa laa. Ala yeke sara kua ni na gbe ti Itamar, molenge ti wayango-sandaga Aaron.

c. Kua ti ahale ti Merari

29“Ti *ahale ti Merari, mo yeke diko wungo ti ala na lege ti asewa ti ala oko oko nga na lege ti akete mara ti ala oko oko. 30Mo yeke diko wungo ti akoli kue so ngu ti ala ato ndani na ngu baleota asi na ngu baleoku, ala so kue alingbi ti sara kua ti da ti bongo so *KOTA GBIA na azo ti lo ayeke wara tere daa. 31Akua so ala lingbi ti sara ayeke so: ala yeke yo *amabaya ti da ni, alate ti da ni, angbongboro keke ti da ni, agere ni, 32angbongboro wen so angoro gbagba ni, agere ti awen ni, awen so a kpo ti gbu da ni na nduzu, akamba ti da ni nga na akungba nde nde so ala yeke sara na kua. Fade awayango-sandaga ayeke fa na zo oko oko kungba ti lo ti yongo ni. 33So ayeke kua ti azo ti kete mara ti Merari so ala yeke sara na ya ti da so KOTA GBIA na azo ti lo ayeke wara tere daa laa. Ala yeke sara akua ni na gbe ti Itamar, molenge ti wayango-sandaga Aaron.”

Dikongo wungo ti azo ti mara ti Lévi so ayeke sara kua

34Moïse, Aaron na amakonzi ti bongbi ti azo ti Israel adiko wungo ti azo ti kete mara ti Kehat na lege ti akete mara ti ala oko oko nga na lege ti asewa ti ala oko oko, 35ala so ngu ti ala ato ndani na ngu baleota asi na ngu baleoku, ala so alingbi ti sara kua na ya ti da so *KOTA GBIA na azo ti lo ayeke wara tere daa. 36Wungo ti ala so a diko ala kue na lege ti akete mara ti ala oko oko ayeke 2 750. 37So ayeke wungo ti azo ti kete mara ti Kehat, ala so kue ayeke sara kua na ya ti da ti bongo so KOTA GBIA na azo ti lo ayeke wara tere daa laa; ala so Moïse na Aaron adiko wungo ti ala alingbi na yanga so KOTA GBIA amu Moïse.

38Azo ti kete mara ti Gershon so a diko wungo ti ala na lege ti akete mara ti ala oko oko nga na lege ti asewa ti ala oko oko, 39ala so kue ngu ti ala ato ndani na ngu baleota asi na ngu baleoku, ala so alingbi ti sara kua na ya ti da ti bongo so KOTA GBIA na azo ti lo ayeke wara tere daa, 40wungo ti azo ni na lege ti kete mara ti ala nga na lege ti asewa ti ala ayeke 2 630. 41So ayeke wungo ti azo ti kete mara ti Gershon, ala so kue ayeke sara kua na ya ti da ti bongo so KOTA GBIA na azo ti lo ayeke wara tere daa laa. Moïse na Aaron adiko wungo ti ala alingbi na yanga so KOTA GBIA amu.

42Azo ti kete mara ti Merari so a diko wungo ti ala na lege ti akete mara ti ala oko oko nga na lege ti asewa ti ala oko oko, 43ala so kue ngu ti ala ato ndani na ngu baleota asi na ngu baleoku, ala so alingbi ti sara kua na ya ti da ti bongo so KOTA GBIA na azo ti lo ayeke wara tere daa, 44wungo ti azo ni na lege ti kete mara ti ala kue ayeke 3 200. 45So ayeke wungo ti azo ti kete mara ti Merari laa. Moïse na Aaron adiko wungo ti ala alingbi na yanga so KOTA GBIA amu na Moïse.

46Moïse, Aaron na amakonzi ti Israel adiko wungo ti azo ti mara ti Lévi na lege ti akete mara ti ala oko oko nga na lege ti asewa ti ala oko oko, 47ala so kue ngu ti ala ato ndani na ngu baleota asi na ngu baleoku, ala so alingbi ti sara kua na ya ti da ni, kua ti yongo da ni nga na kungba ti da ti bongo so KOTA GBIA na azo ti lo ayeke wara tere daa. 48Wungo ti azo ni kue ayeke 8 580. 49A diko wungo ti ala alingbi na yanga so KOTA GBIA amu na Moïse; a fa na zo oko oko kua ti lo ti sarango ni na kungba ti lo ti yongo ni alingbi na yanga so KOTA GBIA amu na Moïse.

Currently Selected:

Wungo ti azo 4: MNF2010

Highlight

Copy