Wungo ti azo 13
13
Moïse atokua azo ti bembe ndo na Kanaan
1 *KOTA GBIA atene na Moïse: 2“Tokua ambeni koli titene ala gue *abembe ndo na ya ti kodro ti Kanaan, kodro so mbi yeke mu na azo ti Israel. Ala yeke tokua zo oko na ya ti mara oko oko, zo ni ayeke makonzi ti mara ti lo.” 3Ti londo na benyama ti Paran, Moïse atokua azo ni alingbi na yanga so KOTA GBIA amu na lo. Azo ni kue ayeke amakonzi ti azo ti Israel. 4Iri ti ala ayeke so:
Shamua, molenge ti Zakur, zo ti mara ti Ruben;
5Shafat, molenge ti Hori, zo ti mara ti Siméon;
6Kaleb, molenge ti Yefune, zo ti mara ti Juda;
7Igal, molenge ti Joseph, zo ti mara ti Isakar;
8Hose, molenge ti Nune, zo ti mara ti Efraim;
9Palti, molenge ti Rafu, zo ti mara ti Benjamin;
10Gadiel, molenge ti Sodi, zo ti mara ti Zabulon;
11Gadi, molenge ti Susi, zo ti mara ti Manase so ayeke molenge ti Joseph;
12Amiel, molenge ti Gemali, zo ti mara ti Dan;
13Setur, molenge ti Mikael, zo ti mara ti Aser;
14Nabi, molenge ti Vofsi, zo ti mara ti Neftali;
15Geuel, molenge ti Maki, zo ti mara ti Gad.
16So ayeke iri ti akoli so Moïse atokua ala ti bembe ndo na ya ti kodro ti Kanaan laa. Moïse amu na Hose, molenge ti Nune iri ti Josué.
17Na ndembe so Moïse atokua azo ni ti bembe ndo na ya ti kodro ti Kanaan, lo tene na ala: “Ala li na mbage ti Mbongo; na pekoni, ala ma na sese so ahoto ayeke daa. 18Ala baa kodro ni kâ ayeke tongana nyen, azo ni ayeke ngangu wala ala yeke ngangu pepe; ala yeke mingi wala ala yeke mingi pepe. 19Ala baa kodro ni ayeke nzoni wala ayeke sioni; agbata ni, a sara ngangu gbagba na tere ni wala gi abâbâ. 20Ala baa wala sese ni ayeke le kobe mingi wala ayeke le kobe mingi pepe; akeke ayeke daa mingi wala ayeke daa pepe. Ala sara ngangu, ala gue, aga na ale ti kobe ti kodro ni.” – Andaa ngoi ni so ayeke kozo ngoi ti fango ale ti *vinye –.
21Akoli ni ague, abembe ndo na ya ti kodro ni, ti londo na benyama ti Zin ngbii asi na Rehob, nduru na Lebo-Hamat. 22Ala mu lege so ahon na mbage ti Mbongo si ala gue ngbii asi na Hebron, ndo so azo ti kete mara ti Ahiman, ti Sheshai na ti Talmai ayeke lango daa. Ala kue ayeke *ahale ti Anak. A sara gbata ti Hebron ngu mbarambara kozoni si a sara gbata ti Soan so ayeke na Ezipte. 23Ala gue ngbii asi na popo-hoto ti Eshekol. Kâ, ala fâ mbeni maboko ti keke ti *vinye so mbeni kota li ni ayeke na tere ni, ala kanga ni na ndö ti mbeni yongoro keke si akoli use ayo ni. Ala fâ nga ale ti keke ti grenade na ale ti fige. 24A di iri ti ndo ni so popo-hoto ti Eshekol, ndali ti kota li ti vinye so azo ti Israel afâ na ndo ni kâ.
Awatokua ti Moïse afa peko ti tambula ti ala
25Na peko ti lango baleosio, azo so a tokua ala so ahunzi ti *bembe ndo na ya ti kodro ni si ala kiri. 26Ala ga awara Moïse, Aaron nga na bongbi ti azo ti Israel kue na ya ti benyama ti Paran, na Kades. Azo ni afa peko ti tondo ni na ala nga na bongbi ti azo ti Israel kue, ala fa nga na ala ale ti keke ti kodro ni. 27Ala tene na Moïse: “E gue, e si na kodro so mo tokua e daa. Biani, kodro ni ayeke *kodro so ngu ti me ti bagara na mafuta ti wotoro asi singo daa. Ala baa, ambeni le ti keke ti kodro ni laa. 28Gi ye oko, azo ti kodro ni ayeke ngangu mingi, agbata ni akono mingi si a sara angangu gbagba na tere ni. E baa nga *ahale ti azo ti mara ti Anak. 29Azo ti mara ti Amalek alango na mbage ti Mbongo, azo ti mara ti Het, ti Yebus na ti Amori alango na ndö ti ahoto si azo ti mara ti Kanaan alango ti ala na tere ti kota ngu-ingo nga na tere ti ngu ti Jourdain.”
30Kaleb ahunda na azo so akasa Moïse ti kai si lo tene na ala: “E gue! E gue, e mu kodro so. E lingbi ti so benda!” 31Me amba ti Kaleb atene: “E lingbi ti tiri bira na azo so pepe, ngbanga ti so ngangu ti ala ahon ti e mingi.” 32Ala to nda ti tene sioni tënë ti kodro ni na dawa ti azo ti Israel, kodro so ala gue, abembe ndo daa so. Ala tene: “Kodro so e gue, e bembe ndo daa so ayeke kodro so asara si azo so aga ti sara kodro kâ akui. Azo ti kodro ni kue ayeke ayongoro zo. 33 E baa azo so na ya ti mara ti ala, ala kue ayeke ayongoro yongoro zo, ala yeke ahale ti Anak. E baa tere ti e tongana agbadola; ala nga, ala yeke baa e tongaso.”
Currently Selected:
Wungo ti azo 13: MNF2010
Highlight
Copy
Compare
Share
Want to have your highlights saved across all your devices? Sign up or sign in
© La Société Biblique de Centrafrique 2010
