Wungo ti azo 12

Kobela ti buruma amu tere ti Miriam kue

1Moïse amu lani mbeni wali ti mara ti Kush ti ga wali ti lo. Miriam na Aaron apa lo ndali ti wali so lo mu so. 2Ala tene: “*KOTA GBIA atene tënë gi na Moïse lo oko? E nga, lo tene tënë na e pepe?” KOTA GBIA ama tënë ti ala ni. 3Moïse ayeke mbeni zo so ayeke sara tere ti lo kete mingi; mbeni zo na sese so ti sara tere ti lo kete ti lingbi na lo ayeke daa pepe. 4Gi hio tongaso, KOTA GBIA atene na Moïse, Aaron na Miriam: “Ala ota kue, ala gue na da ti bongo so KOTA GBIA na azo ti lo ayeke wara tere daa.”

Tongaso ala ota kue ague kâ. 5 KOTA GBIA azu na ya ti ngbongboro mbinda si aga aluti na yanga ti da ni. Lo iri Aaron na Miriam si ala use kue aga nduru. 6Lo tene na ala: “Ala ma tënë ti mbi nzoni. Tongana mbeni wayanga-Nzapa ayeke na popo ti ala, mbi KOTA GBIA, mbi sara si lo hinga, mbi na lege ti mbeni ye tongana bango-li; mbi tene tënë na lo na ya ti bango-li. 7Ti Moïse, zo ti kua ti mbi, ye ni ayeke tongaso pepe. Lo laa mbi zia be ti mbi na ndö ti lo ti baa ndo na ndö ti aye ti da ti mbi kue. 8Mbi yeke tene tënë na lo le na le, na hondengo ni pepe. Mbi yeke fa tere ti mbi na lo si lo yeke baa limo ti mbi. Ngbanga ti nyen laa ala kasa Moïse, zo ti kua ti mbi so?” 9Ngonzo ti KOTA GBIA alondo na tere ti ala tongana wâ si lo londo, lo hon. 10Na ndembe so mbinda aya ahon na ndö ti da ti bongo ni, buruma amu tere ti Miriam kue; tere ti lo avuru tuuu. Aaron abaa ndo na mbage ti Miriam, lo baa so buruma amu tere ti lo kue awe. 11Tongaso lo tene na Moïse: “Ae babâ! Mbi gbu gere ti mo, sara titene ngbanga ti siokpari ti e ati na li ti e pepe. E sara siokpari, e sara ye tongana azo so li ti ala ayeke daa pepe! 12Ayeke nzoni Miriam aga pepe tongana kete molenge so a du lo na kuâ ni, molenge so mbage ti tere ti lo afun na ndembe so mama ti lo adu lo!”

13Moïse asambela KOTA GBIA, atene: “Ae Nzapa, mo kai kobela ti lo maa!” 14 KOTA GBIA akiri tënë na Moïse: “Tongana babâ ti lo atuku fade ngu ti yanga na le ti lo, ka lo ngba na kamene ni na ya ti lango mbarambara pepe? Alingbi a zi lo na ya ti bâbâ ni na ya ti lango mbarambara. Na pekoni, lo lingbi ti kiri na popo ti ala senge.” 15A tumba Miriam na ya ti bâbâ ni na ya ti lango mbarambara. Azo ti Israel alondo ti hon pepe kozo titene lo kiri na ndo ti ala. 16Na pekoni, ala londo na Haserot si ala gue, asara bâbâ ti ala na ya ti benyama ti Paran.

Currently Selected:

Wungo ti azo 12: MNF2010

Highlight

Copy

Compare