Wungo ti azo 1

AZO TI ISRAEL AYEKE NA YA TI BENYAMA TI SINAI

1.1–10.10

Kozo dikongo wungo ti azo ti Israel

1Na kozo lango ti use nze ti use ngu ni, na peko ti so azo ti Israel asigigi na kodro ti Ezipte si ala yeke na ya ti benyama ti Sinai, *KOTA GBIA atene tënë na Moïse na ya ti da ti bongo so KOTA GBIA na azo ti lo ayeke wara tere daa. Lo tene na Moïse: 2 “Mo na Aaron, ala diko wungo ti bongbi ti azo ti Israel kue na lege ti akete mara ti ala oko oko, na lege ti asewa ti ala oko oko; ala su na mbeti iri ti akoli oko oko kue. 3Ala diko wungo ti akoli so kue ngu ti ala alingbi baleuse na ala so ngu ti ala ahon baleuse; ala so alingbi ti sara kua ti turugu si ala yeke na ya ti bongbi ti aturugu nde nde ti azo ti Israel. 4Ayeke nzoni makonzi ti sewa oko, na ya ti mara oko oko amu maboko na ala. 5Iri ti azo ni ayeke so:

ti mara ti Ruben: Elisur, molenge ti Shedeur;

6ti mara ti Siméon: Shelumiel, molenge ti Surishadai:

7ti mara ti Juda: Nashon, molenge ti Aminadab;

8ti mara ti Isakar: Netaneel, molenge ti Suar;

9ti mara ti Zabulon: Eliab, molenge ti Helon;

10ti mara ti Efraim, molenge ti Joseph: Elishama, molenge ti Amihud;

ti mara ti Manase, molenge ti Joseph: Gamliel, molenge ti Pedasur;

11ti mara ti Benjamin: Abidan, molenge ti Gidoni;

12ti mara ti Dan: Ahiezer, molenge ti Amishadai;

13ti mara ti Aser: Pagiel, molenge ti Okran;

14ti mara ti Gad: Eliasaf, molenge ti Deuel;

15ti mara ti Neftali: Ahira, molenge ti Enan.”

16So ayeke iri ti amakonzi ti amara nde nde so a soro ala, ala yeke nga amakonzi ti abongbi nde nde ti gba ti aturugu ti Israel. 17Moïse na Aaron amu azo so a iri ala so titene azo ni amu maboko na ala. 18Na kozo lango ti use nze ni, ala iri azo ti Israel kue ti bongbi tere ti ala na ndo oko. Tongaso azo ti Israel adiko wungo ti ala na lege ti akete mara ti ala oko oko, asewa ti ala oko oko; ala su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse. 19Moïse adiko wungo ti azo ti Israel na ya ti benyama ti Sinai alingbi na yanga so KOTA GBIA amu na lo.

20Ti *ahale ti Ruben, kozo molenge ti Jacob, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 21Wungo ti ala kue ayeke: 46 500.

22Ti ahale ti Siméon, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 23Wungo ti ala kue ayeke: 59 300.

24Ti ahale ti Gad, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 25Wungo ti ala kue ayeke: 45 650.

26Ti ahale ti Juda, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 27Wungo ti ala kue ayeke: 74 600.

28Ti ahale ti Isakar, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 29Wungo ti ala kue ayeke: 54 400.

30Ti ahale ti Zabulon, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 31Wungo ti ala kue ayeke: 57 400.

32Ti ahale ti Efraim, molenge ti Joseph, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 33Wungo ti ala kue ayeke: 40 500.

34Ti ahale ti Manase, molenge ti Joseph, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 35Wungo ti ala kue ayeke: 32 200.

36Ti ahale ti Benjamin, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 37Wungo ti ala kue ayeke: 35 400.

38Ti ahale ti Dan, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 39Wungo ti ala kue ayeke: 62 700.

40Ti ahale ti Aser, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 41Wungo ti ala kue ayeke: 41 500.

42Ti ahale ti Neftali, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu. 43Wungo ti ala kue ayeke: 53 400.

44So ayeke wungo ti azo so Moïse, Aaron nga na amakonzi baleoko na use ti Israel adiko ala laa, makonzi oko na ya ti mara oko oko. 45So ayeke wungo ti azo ti Israel so a diko ala na lege ti asewa oko oko laa, ala so ngu ti ala alingbi ngu baleuse na ala so ngu ti ala ahon baleuse, ala so alingbi ti sara kua ti turugu. 46Wungo ti ala kue ayeke: 603 550.

Kua so KOTA GBIA amu na azo ti mara ti Lévi

47Âdu ti azo ti mara ti Lévi, a diko wungo ti ala na popo ti tanga ti azo ti mara ti Israel pepe. 48*KOTA GBIA atene lani na Moïse: 49“Mo diko wungo ti azo ti mara ti Lévi pepe, mo diko ala na popo ti azo ti Israel pepe. 50Fade mo yeke mu na azo ti mara ti Lévi kua ti batango da so a zia nde ndali ti Nzapa, da so a yeke bata atêne so a su atënë ti *mbuki na le ni nga na akungba ti ya ti da ni kue. Ala yeke yo da ni na akungba ti ya ni kue, ala yeke sara kua na ya ti da ni si ala yeke sara bâbâ ti ala angoro da ni kue. 51Tongana ala londo ti gue na mbeni ndo, azo ti mara ti Lévi laa ayeke zi da ni; ndo so ala yeke luti daa ti sara bâbâ ti ala, azo ti mara ti Lévi laa ayeke kiri ti leke da ni. Tongana mbeni zo nde aga nduru na tere ti da ni, fade a yeke fâ lo. 52Zo ti Israel oko oko ayeke duti na ya ti bâbâ ti lo, zo oko oko na tere ti bendere ti mara ti lo nga na ya ti bongbi ti aturugu ti lo. 53Ti azo ti mara ti Lévi, ala yeke sara bâbâ ti ala angoro da so a zia nde ndali ti Nzapa. Tongaso si ngonzo ti KOTA GBIA ati na ndö ti bongbi ti azo ti Israel pepe. Kua ti azo ti mara ti Lévi ayeke ti sara akua kue ti da ni.” 54Tongaso azo ti Israel asara ye alingbi gi na yanga so KOTA GBIA amu na Moïse.

Currently Selected:

Wungo ti azo 1: MNF2010

Highlight

Copy