Jérémie 26
26
Azo aye ti fâ Jérémie
1So Yoakim, molenge ti Yosias ato nda ti le-gbia na sese ti Juda, tënë ti *KOTA GBIA so asi na Jérémie, atene: 2“Tënë so KOTA GBIA atene ayeke so: Gue mo luti na ya ti gbagba ti kota da ti KOTA GBIA, mo to mbela na tënë so na azo so kue alondo na ya ti agbata ti Juda si aga ti voro Nzapa na ya ti kota da so. Mo tene na ala atënë so kue mbi mu yanga na mo ti tene; mo zi mbeni tënë oko na ya ni pepe. 3E hinga pepe, fade ala yeke ma si zo oko oko ayeke zia sioni lege ti sarango ye ti lo. Tongaso si sioni kpale so mbi ye ti tokua na ndö ti ala ndali ti asioni sarango ye ti ala, fade mbi yeke zia lege ni. 4Fade mo yeke tene na ala: Tënë so KOTA GBIA atene ayeke so: ‘Ala ma mbi, ala tambula na lege ti andia so mbi mu na ala. 5Ala ma tënë ti azo ti kua ti mbi, awayanga-Nzapa! Mbi mu ngoi ti mbi kue ti tokua na ala awayanga-Nzapa, me ala ma ala pepe. 6 Tongana ala ma pepe, fade mbi yeke buba kota da ti Nzapa so, tongana ti so mbi buba ti Silo. Mbi yeke sara si gbata ti Jérusalem aga tapande ti dengo ba ndali ti amara ti sese kue.’ ”
7Awayango-sandaga, awayanga-Nzapa na azo kue ama Jérémie so ayeke tene atënë so na ya ti gbagba ti kota da ti Nzapa. 8So Jérémie ahunzi ti tene atënë so KOTA GBIA amu yanga na lo ti tene na azo so kue awe, awayango-sandaga, awayanga-Nzapa na azo kue agbu lo si ala tene: “Mo lingbi na kuâ! 9Ngbanga ti nyen si mo tene peko ti tënë ti yanga ti KOTA GBIA, mo tene: ‘Fade a yeke buba kota da ti Nzapa so tongana ti Silo, a yeke buba gbata so si azo ti gbata ni ayeke duti daa mbeni pepe so?’ ”
Tongaso azo so kue ayeke na ya ti kota da ti Nzapa abongbi na tere ti Jérémie. 10So agbenyogbia ti Juda ama tënë so, ala londo na yangbo ti gbia si ala gue na kota da ti Nzapa; ala duti na yanga ti kota da ti Nzapa so iri ni Fini yanga-da. 11Awayango-sandaga na awayanga-Nzapa atene na agbenyogbia ni nga na azo ni kue, atene: “Koli so alingbi na kuâ! Biani, lo tene peko ti tënë ti yanga ti Nzapa na ndö ti gbata so; tënë ni laa ala wani ama na mê ti ala so!”
12Me Jérémie atene na agbenyogbia ni kue nga na gba ti azo ni, lo tene: “Atënë so kue ala ma so, KOTA GBIA laa atokua mbi ti tene peko ti tënë ti yanga ti lo na ndö ti da so nga na ndö ti gbata so. 13Ti fadeso, ala sara si lege ti dutingo ti ala na sarango ye ti ala akiri aga nzoni; ala ma yanga ti KOTA GBIA Nzapa ti ala! Tongaso, sioni kpale so lo tene tënë ti tokuango ni na ndö ti ala, lo yeke zia lege ni. 14Ti mbi, mbi yeke na ya ti maboko ti ala; ala sara na mbi ye so ala baa ayeke nzoni si ayeke mbirimbiri na le ti ala. 15Ye oko, ayeke nzoni ala hinga atene, tongana ala fâ mbi, andaa ala fâ zo so tënë ayeke na li ti lo pepe. Tongaso, ngbanga ti kuâ ti mbi ayeke kiri na li ti ala, na li ti gbata so nga na li ti azo ti gbata ni. Biani, KOTA GBIA laa atokua mbi ti tene atënë so na mê ti ala.”
16Tongaso, agbenyogbia ni na azo ni kue atene na awayango-sandaga nga na awayanga-Nzapa, atene: “Koli so alingbi na kuâ pepe! Biani, na iri ti KOTA GBIA Nzapa ti e laa lo tene tënë na e.”
17Na pekoni, ambeni *kangba ti kodro ni alondo; ala tene na azo so kue abongbi so, atene: 18“Na ngoi so Ezekias ayeke gbia ti Juda, Mishe ti gbata ti Moreshet ayeke daa; lo yeke mbeni wayanga-Nzapa. Mishe atene na azo ti Juda kue, lo tene: Tënë so KOTA GBIA so ayeke na ndö ti dunia kue atene ayeke so:
‘Fade *Sion ayeke ga tongana yaka so a de ni awe,
Jérusalem ayeke ti kue na sese
si hoto so kota da ti Nzapa ayeke daa,
ndö ni ayeke ga ngonda.’
19Gbia Ezekias na azo ti Juda afâ wayanga-Nzapa Mishe ndali ni? Oko pepe, me ala kpe mbeto ti KOTA GBIA, nilaa ala sara kue ti de be ti lo. Tongaso, sioni kpale so KOTA GBIA atene tënë ti tokuango ni na ndö ti ala, lo zia lege ni. Ti e, tongana e fâ ngbanga fadeso na li ti koli so, andaa e sara sioni mingi na e wani.”
Yoakim afâ wayanga-Nzapa Uria
20Na ngoi ni so, mbeni koli nga ayeke daa so ayeke tene peko ti tënë ti yanga ti *KOTA GBIA; iri ti lo Uria, molenge ti Shemaya, zo ti gbata ti Kiriat-Yearim. Lo nga, lo tene peko ti tënë ti yanga ti KOTA GBIA na tere ti gbata ti Jérusalem nga na tere ti kodro ti Juda tongana ti so Jérémie asara. 21Gbia Yoakim, lo na angangu turugu ti lo kue nga na akota zo ti kodro ti lo ama atënë so Uria atene. Tongaso, gbia agi lege ti fâ lo. So Uria ama tënë ni, mbeto agbu lo si lo kpe, lo gue na Ezipte. 22Me gbia Yoakim atokua na Ezipte Elnatan, molenge ti Akbor, lo na ambeni zo. 23Ala gue, agbu Uria kâ na Ezipte si aga na lo na gbia Yoakim. Yoakim afâ lo; a mu kuâ ti lo si a bi na ya ti du so ayeke ndali ti azo kue.
24Me ti Jérémie, Ahikam, molenge ti Shafan abata lo; lo sara si Jérémie ati pepe na maboko ti azo so aye fade gi kuâ ti lo so.
Currently Selected:
Jérémie 26: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010