Jérémie 25
25
Jérémie afa tënë na ya ti ngu baleuse na ota kue
1Tënë ti *KOTA GBIA asi na Jérémie ndali ti azo ti Juda kue; tënë ni asi na lo na ya ti osio ngu so Yoakim, molenge ti Yosias ayeke gbia ti Juda – so ayeke nga kozo ngu so Nabukodonosor ayeke le-gbia na sese ti Babilone laa –. 2Jérémie atene tënë ni na azo ti Juda kue nga na azo ti Jérusalem kue, lo tene: 3“Ti londo na ngu baleoko na ota ti lengo-gbia ti Yosias, molenge ti Amon, gbia ti Juda, ngbii asi laso, na ya ti ngu baleuse na ota kue, tënë ti KOTA GBIA asi na mbi si mbi mu ngoi ti mbi kue ti tene tënë ni na ala, me ala ma pepe. 4KOTA GBIA amu ngoi ti lo kue ti tokua na ala azo ti kua ti lo so kue ayeke awayanga-Nzapa. Me ala, azo ti Juda, ala ma pepe; ala ke ti dingi mê ti ala ti ma. 5Lo tene na ala: ‘Ala zia ngbene lege ti sarango ye ti ala, ala zia asioni ti ala. Tongaso, fade ala yeke wara lege ti duti ngbene ye kpu na kpu, lakue lakue na ya ti kodro so mbi mu ando na ala nga na akotara ti ala. 6Ala mu peko ti anzapa nde pepe ti voro ala, ala kuku nga na gbe ti ala pepe; ala zia ngonzo na be ti mbi pepe ndali ti ayanda so ala leke ni so. Tongaso, fade mbi yeke sara sioni na ala oko pepe. 7Me ala ma mbi pepe; so tënë ti yanga ti KOTA GBIA laa. Ala zia gi ngonzo na be ti mbi na lege ti aye so maboko ti ala asara; andaa ala yeke baa sioni na peko ni.’
8“Tongaso, tënë so KOTA GBIA so ayeke na ndö ti dunia kue atene ayeke so: Ndali ti so ala ke ti ma tënë ti mbi, 9mbi yeke tokua titene a gi amara ti mbage ti Banga kue, so tënë ti yanga ti KOTA GBIA laa. Mbi yeke iri zo ti kua ti mbi Nabukodonosor, gbia ti Babilone, titene lo ga. Mbi yeke sara titene azo ni aga atuku na ndö ti kodro so; ala ga na tere ti azo ti kodro ni nga na tere ti amara so kue angoro kodro ni. Mbi yeke hunzi ala na amara ni kue. Mbi yeke sara si kodro ni ati biani biani si aga ye ti dongo be. Na bango kodro ni, fade azo ayeke huru yanga ti ala; so tënë ti yanga ti KOTA GBIA laa. 10Mbi yeke zi na popo ti ala bia ti azo so tere ti ala anzere, bia ti azo so ayeke na ngia nga na bia ti koli na wali so amu tere fini fini; mbi yeke zi na popo ti ala toto ti têne ti nikango na ye nga na wâ ti lamba. 11 Fade kodro so kue ayeke ga ndo ti gba ti atêne si ayeke ga ye ti dongo be. Na ya ti ngu balembarambara, amara ni kue ayeke duti na gbe ti komandema ti gbia ti Babilone.
12“Me tongana ngu balembarambara so ahunzi awe, mbi wani, mbi yeke ga na tere ti gbia ti Babilone nga na tere ti azo ti kodro ti lo ndali ti sioni so ala sara; so tënë ti yanga ti KOTA GBIA laa. Mbi yeke ga na tere ti kodro ti azo ti Babilone; mbi yeke sara si kodro ni aga ye ti dongo be kpu na kpu. 13Akpale so kue mbi tene tënë ni si a su tënë ni na ya ti buku so, fade mbi yeke sara si akpale ni ati na ndö ti kodro so. Jérémie atene tënë ni na peko ti yanga ti mbi na tere ti amara so kue awe. 14Biani, fade azo ti Babilone nga ayeke duti na gbe ti komandema ti amara mingi na ti angangu gbia. Lege so mbi yeke futa na ala peko ti asarango ye ti ala nga na sioni so kue ala sara laa.”
Amara anyon kopo ti ngonzo ti Nzapa
15Tënë so *KOTA GBIA, Nzapa ti Israel atene na mbi ayeke so: “Mu na maboko ti mbi kopo ti vin so; ngonzo ti mbi asi singo na ya ni. Mu ni na amara so kue mbi yeke tokua mo na mbage ti ala titene ala nyon. 16Ala yeke nyon ni, ala yeke tambula kirikiri si li ti ala ayeke ga kirikiri na bango ye so kue mbi yeke buba ni na lege ti bira na popo ti ala.”
17Tongaso, mbi mu kopo ni na maboko ti KOTA GBIA si mbi mu na amara so kue KOTA GBIA atokua mbi na mbage ti ala titene ala nyon ni. 18Mbi to nda ni na Jérusalem nga na gbata ti sese ti Juda na agbia ni, na akota zo ti kodro ni. Mbi sara si agbata ni aga ndo ti gba ti atêne si aga ye ti dongo be, ye so azo ayeke huru yanga ti ala na bango ni; aga tapande ndali ti azo so ayeke deba amba ti ala. Ye so asi laso laa.
19Na pekoni, ayeke mbeni mara nde:
– Faraon, gbia ti Ezipte, lo na akota zo ti lo, na akota zo ti kodro ti lo nga na azo ti kodro ti lo kue; 20na amara nde nde so kue ayeke lango na Ezipte;
– agbia ti kodro ti Us;
– agbia ti sese ti Filistii: ala ti Askalon, ti Gaza, ti Ekron na tanga ti azo ti Asdod;
21– azo ti sese ti Edom; azo ti sese ti Moab na ala ti Amoni;
22– agbia kue ti Tir, ti Sidon na ala ti sese so ayeke na mbeni mbage ti kota ngu-ingo;
23 – azo ti kodro ti Dedan, ti Tema, ti Buz na ala so ayeke kio kua ti tere ti li ti ala;
24– agbia kue ti Arabii na agbia ti amara nde nde so ayeke lango na benyama;
25– agbia kue ti Zimri, ala ti Elam na ala ti Medii kue;
26– agbia kue ti Banga, ataa ala yeke nduru, wala ala yeke na yongoro ndo.
Akodro-gbia ti dunia kue, ala so kue ayeke na ndö ti le ti sese, ala oko oko kue ayeke nyon kopo so na peko ti tere na peko ti tere. Na peko ti ala kue, gbia ti Sheshak laa ayeke nyon ni.
27KOTA GBIA ahunda na mbi ti tene na azo ni, atene: “Tënë so KOTA GBIA so ayeke na ndö ti dunia kue, Nzapa ti Israel, atene ayeke so: Ala nyon, ala nyon ahon ndö ti ala, ala de! Ala ti, ala ngba na sese na bango yongoro zeme so mbi yeke tokua na popo ti ala.” 28Lo kiri lo tene: “Tongana ambeni zo na popo ti azo ni ake ti mu kopo ni na maboko ti mo ti nyon ni, fade mo yeke tene na ala: ‘Tënë so KOTA GBIA so ayeke na ndö ti dunia kue atene ayeke so: Ataa nyen na nyen, ala yeke nyon ni!’ 29Biani, gbata so a zia nde ndali ti mbi, mbi yeke to nda ti tokua kota kpale ti ti na ndö ni. Ala baa ti ala atene, ala yeke sigigi na ya ni? Oko pepe, fade ala yeke sigigi na ya ni pepe. Me gi bira laa mbi yeke tokua na tere ti azo ti dunia kue; so tënë ti yanga ti KOTA GBIA laa.”
30KOTA GBIA akiri atene na mbi: “Mo tene peko ti atënë ti yanga ti mbi so kue na ala, mo tene:
Na nduzu kâ,
KOTA GBIA atoto ngangu tongana bamara;
na ya ti da so a zia nde ndali ti lo,
lo sara si azo ama go ti lo.
Lo yeke toto tongana bamara
na ndö ti sese so ayeke ti lo.
Lo yeke dekongo na ndö ti azo ti kodro ni kue
tongana azo so ayeke ko ale ti *vinye ti sara na vin.
31Totongo ti lo ni asi na nda ti sese kue.
KOTA GBIA ayeke na ngbanga na amara nde,
lo iri azo kue ti ga na ya ti ngbanga ti lo.
Ti azo so ngbanga ati na li ti ala,
lo yeke zia ala titene a fâ ala na yongoro zeme;
so tënë ti yanga ti KOTA GBIA laa.”
32Tënë so KOTA GBIA so ayeke na ndö ti dunia kue atene ayeke so:
“Kota kpale alondo na mbeni mara
asi na mbeni mara,
ngangu pupu ti ngu-Nzapa
alondo na nda ti sese kâ si ayeke ya.”
33Na lango ni so, azo so KOTA GBIA afâ ala, kuâ ti ala ayeke lango na sese, ti londo na yanga ti sese asi na mbeni yanga ni; a yeke toto kuâ ti azo ni pepe; a yeke ro akuâ ti ala pepe, a yeke lu ni pepe. Akuâ ni ayeke ga tongana puru na ndö ti sese.
34Ala azo ti li ti kodro,
ala dema tere, ala dekongo!
Ala awabatango-taba,
ala rule tere ti ala na sese!
Biani, lango ti fango ala alingbi awe.
Fade a yeke kangbi ala kirikiri
si ala yeke ti na sese tongana ta ti ngangu ngere.
35Ti azo ti li ni, ndo titene ala kpe daa
ti honde tere ti ala ayeke daa pepe!
Ti awabatango-taba, ndo titene ala kpe daa ayeke daa pepe!
36A yeke ma dekongo ti azo ti li ni,
a yeke ma demango tere ti awabatango-taba:
KOTA GBIA laa abuba ndo ti tengo pere ti anyama ti ala.
37Ndali ti ngonzo ti wâ ti KOTA GBIA,
gbagba ti ataba so ya ni ayeke fade na siriri,
fadeso ya ni ade ngii,
38mo baa mo tene, bamara
so azia ndo ti lo si ahon.
Kodro ti ala aga tongana benyama
ndali ti aye ti mawa so bira abi ni kâ;
nga ndali ti ngonzo ti wâ ti KOTA GBIA.
Currently Selected:
Jérémie 25: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010