1 Mbai 21
21
David adiko wungo ti azo ti Israel
(2 Sam 24.1-9)
1Mbeni lâ, Satan alondo ti sara ye ti sioni na azo ti Israel; lo pusu David titene lo diko wungo ti azo ti Israel. 2David atene na Yoab nga na amakonzi ti aturugu, atene: “Ala gue, adiko azo ti Israel, ti londo na Bersheba ngbii asi na Dan. Na pekoni, ala ga afa peko ni na mbi si mbi lingbi ti hinga wungo ti ala.” 3 Yoab akiri tënë: “Ayeke nzoni *KOTA GBIA asara titene azo ti lo awu fani ngbangbo oko ahon so! Gbia ti mbi, ala kue ayeke azo ti kua ti mo pepe? Gbia, mo gi ti hinga ye so ngbanga ti nyen? Ngbanga ti nyen laa ye tongaso ayeke sara fade titene tënë aga na li ti azo ti Israel?”
4Me yanga so gbia amu na Yoab, lo ngba gi na ndö ni; nilaa Yoab alondo atambula na ya ti kodro ti Israel kue; na pekoni, lo kiri na Jérusalem. 5Yoab afa na David wungo ti azo so ala diko: na Israel, aturugu so alingbi ti tiri bira ayeke 1 100 000; na Juda, aturugu so alingbi ti tiri bira ayeke 470 000.
6Yoab adiko wungo ti azo ti mara ti Lévi na ti Benjamin na popo ti azo ni pepe, ngbanga ti so yanga so gbia amu ayeke sioni mingi na le ti Yoab.
Nzapa apika azo ndali ti sioni ye so David asara
(2 Sam 24.10-17)
7Ye so David asara so anzere na Nzapa pepe si lo pika azo ti Israel. 8David atene na Nzapa: “Ye so mbi sara so ayeke sioni mingi. Mbi hinga, mbi tene, mbi sara ye tongana zo so li ti lo ayeke daa pepe. Fadeso, mo zi siokpari so na li ti mbi, zo ti kua ti mo.”
9 KOTA GBIA atene na Gad, zo ti bango nda ti aye na David, atene: 10“Gue mo tene na David, mo tene: ‘Tënë so KOTA GBIA atene ayeke so: Mbi zia na dawa ti mo aye ota; soro oko na popo ni, fade mbi yeke sara ni na mo.’ ”
11Gad ague, awara David si atene na lo: “Tënë so KOTA GBIA atene ayeke so: ‘Mo soro so wa? 12Ngu ota so kota nzara ati na ya ti kodro ti mo? Wala nze ota so mo ti na gbe ti awato ti mo si awato ti mo ayeke sara ngangu na mo? Wala lango ota so Nzapa apika kodro ni na lege so lo yeke tokua *ange ti fango azo si lo yeke tokua sioni kobela ti bubango kodro na ya ni kue’. Gbu li ti mo, mo tene na mbi ye so mbi lingbi ti tene na lo so atokua mbi so.” 13David akiri tënë na Gad, atene: “Mbi yeke na ya ti ye ti ngangu mingi! Mbi gbu gere ti mo, zia mbi ti na maboko ti KOTA GBIA, ngbanga ti so nzoni be ti lo ayeke kota mingi; me mbi ye ti ti na maboko ti azo pepe.”
14Tongaso, KOTA GBIA atokua sioni kobela ti bubango kodro na ya ti kodro ti Israel; azo ti Israel 70 000 akui. 15Nzapa atokua ange na Jérusalem ti kangbi sioni kobela ni na ya ti gbata ni. So ange ti fango azo angba ti fâ azo ni, Nzapa abaa ye ni si mawa asara lo, lo tene na ange ni: “Alingbi awe! Kiri na maboko ti mo!”
Na ndembe ni so, ange ti KOTA GBIA ayeke luti na tere ti lakere ti Ornan, zo ti mara ti Yebus. 16David ayo le ti lo na nduzu si lo baa ange ti KOTA GBIA so ayeke luti na popo ti yayu na sese. Ange ni agbu na maboko ti lo yongoro zeme so a zi na ya ti bozo ni, lo yoro ni na mbage ti Jérusalem. David na *akangba ayu bongo ti mua, ala ti akpo li ti ala na sese. 17David atene na Nzapa: “Mbi laa mbi mu yanga titene a diko wungo ti azo ni pepe? Mbi laa mbi sara siokpari ni si mbi sara sioni; me asenge zo so, nyen laa ala sara, nyen? KOTA GBIA, Nzapa ti mbi, mbi gbu gere ti mo, ayeke nzoni mo pika gi mbi na asewa ti mbi; me mo pika azo ti mo na sioni kobela so pepe.”
David asara mbeni gbalaka ndali ti KOTA GBIA
(2 Sam 24.18-25)
18 *Ange ti *KOTA GBIA atene na Gad ti tene na David, atene: “Ayeke nzoni David ague na lakere ti Ornan, zo ti mara ti Yebus, ti sara mbeni gbalaka ndali ti KOTA GBIA kâ.” 19David ague na lakere ni alingbi na tënë so Gad atene na iri ti KOTA GBIA. 20Ornan angba ti pika ale ti *ble ti lo na ndö ti lakere ni. Lo bi le ti lo na peko si lo baa ange ni. Amolenge ti lo ti koli osio so ayeke na tere ti lo ague, ahonde tere ti ala. 21So David asi na tere ti Ornan, Ornan abaa lo, lo londo na ndö ti lakere ni, lo ga lo kuku, lo kpo li ti lo na sese na dawa ti David. 22Lo tene na Ornan: “Mu na mbi ndo so lakere ni ayeke daa so. Mbi ye ti sara gbalaka daa ndali ti KOTA GBIA, tongaso si sioni kobela so ayeke fâ azo so ahunzi. Ka ndo ni na mbi alingbi taa gi na ngere ni.” 23Ornan akiri tënë na David: “Gbia, mo mu ni, mo sara na ye so be ti mo aye. Baa, mbi mu abagara ndali ti *sandaga so a yeke gbi ni kue na wâ. Mbi mu ye ti pikango na ale ti ble ti sara na wâ, ale ti ble ndali ti sandaga ti ale ti kobe. Mbi mu na mo aye so kue.” 24Me David atene na Ornan: “Ên-en! Mbi ye ti vo ni alingbi taa gi na ngere ni. Mbi ye ti mu ye ti mo senge senge pepe ti mu na sandaga so a yeke gbi ni kue na wâ na KOTA GBIA!”
25David amu na Ornan ale ti lôro ngbangbo omene ti vo na ndo ni so. 26Lo sara gbalaka na ndo ni ndali ti KOTA GBIA; lo zia na ndö ni sandaga so a yeke gbi ni kue na wâ nga na sandaga ti beoko. Na pekoni, lo sambela KOTA GBIA si lo kiri tënë na lo na lege so lo tokua wâ so alondo na yayu, ati na ndö ti sandaga ni si agbi ni. 27Na pekoni, KOTA GBIA amu yanga na ange ni ti kiri na yongoro zeme ti lo na ya ti bozo ni.
28So David abaa atene, KOTA GBIA akiri tënë na sambela ti lo na ndö ti lakere ti Ornan, zo ti mara ti Yebus, lo ngba lakue ti mu asandaga na Nzapa na ndo ni so. 29Na ngoi ni so, da ti Nzapa so Moïse asara lani na benyama nga na gbalaka so a yeke gbi asandaga na ndö ni so angba na ndo so azo ayeke voro Nzapa daa na hoto ti Gabaon. 30Me lege titene David ague kâ ti hunda Nzapa ayeke daa pepe, ngbanga ti so mbeto ti yongoro zeme ti ange ti KOTA GBIA agbu lo mingi.
Currently Selected:
1 Mbai 21: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010