1 Mbai 10
10
MBAI TI DAVID, GBIA TI ISRAEL
10–29
Saul akui
(1 Sam 31.1-13)
1Azo ti Filistii ayeke tiri bira na azo ti Israel. Azo ti Israel akpe na dawa ti azo ti Filistii si a fâ ala mingi na hoto ti Gilboa. 2Azo ti Filistii aga nduru nduru na Saul nga na amolenge ti lo. Ala fâ Jonatan, Abinadab nga na Malkishua, amolenge ti Saul. 3Bira ni ane na ndö ti Saul. Azo ti pikango kokora abaa ndo so lo yeke daa si azia mbeto na be ti lo. 4Saul atene na zo so ayo aye ti bira ti lo, atene: “Gboto yongoro zeme ti mo, mo koro ya ti mbi, ngbanga ti so mbi ye pepe titene azo so ahinga Nzapa pepe so aga si ala he mbi.” Me zo so ayo aye ti bira ni ake, ngbanga ti so mbeto asara lo mingi. Nilaa Saul amu yongoro zeme ti lo azia si lo ti na yanga ni. 5So zo so ayo aye ti bira ti lo abaa so Saul akui awe, lo nga lo ti na yanga ti yongoro zeme ti lo si lo kui. 6Tongaso, Saul na amolenge ti lo ota, nga na azo ti da ti lo kue akui; ala kui legeoko.
7So azo ti Israel so kue ayeke lango na popo-hoto abaa so aturugu ti Israel ayeke kpe kirikiri si Saul na amolenge ti lo akui awe, ala do agbata ti ala azia si ala kpe. Azo ti Filistii aga si ala duti daa.
8Na ndade ni, azo ti Filistii aga ti zi aye so ayeke na tere ti azo so akui so. Ala wara kuâ ti Saul na ti amolenge ti lo so ayeke lango na sese, na hoto ti Gilboa. 9Ala zi aye ti bira ti Saul na tere ti lo, ala mu li ti lo si ala gue na ni. Na pekoni, ala tokua azo ti vunga sango ni na ya ti kodro ti Filistii kue, na ayanda ti ala nga na azo ti ala. 10Ala zia aye ti bira ti Saul na ya ti da ti anzapa ti ala si ala pika bio ti li ti lo na pondi na tere ti mbeni ye na ya ti da ti mbeni nzapa ti ala so iri ti lo Dagon.
11So azo ti Yabesh so kue ayeke na sese ti Galaad ama tënë ti aye so kue azo ti Filistii asara na Saul, 12akpengba turugu ague, amu kuâ ti Saul na ti amolenge ti lo, ala kiri na ni na Yabesh. Ala lu abio ti Saul na ti amolenge ti lo na gbe ti keke ti terebente na Yabesh; ala ke kobe na ya ti lango mbarambara.
13Saul akui, ngbanga ti so lo ke *KOTA GBIA. Lo ke ti sara ye alingbi na tënë ti KOTA GBIA; na ndö ni kue, lo gue ti hunda yingo ti mbeni kuâ 14ahon titene lo hunda KOTA GBIA. Nilaa KOTA GBIA asara si lo kui si lo mu mbata ti gbia ni na David, molenge ti Yese.
Currently Selected:
1 Mbai 10: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010