Pahayag 7
7
Tinatakan ang 144,000
1Pagkatapos nito, nakita kong nakatayo ang apat na anghel sa apat na sulok ng mundo. Pinipigilan nila ang apat na hangin upang hindi umihip sa lupa, sa dagat, o sa alinmang punongkahoy. 2At nakita ko ang isa pang anghel na galing sa silangan na taglay ang pantatak ng buháy na Diyos. Sumigaw siya sa apat na anghel na binigyan ng Diyos ng kapangyarihang maminsala sa lupa at dagat. 3Sinabi niya, “Huwag muna ninyong pinsalain ang lupa, ang dagat o ang mga punongkahoy hanggaʼt hindi pa natin natatatakan sa noo ang mga lingkod ng ating Diyos.” 4Ayon sa narinig ko, 144,000 ang lahat ng tinatakan mula sa labindalawang lahi ng Israel.
5Labindalawang libo mula sa lahi ni Juda ang tinatakan;
labindalawang libo mula sa lahi ni Ruben;
labindalawang libo mula sa lahi ni Gad;
6labindalawang libo mula sa lahi ni Asher;
labindalawang libo mula sa lahi ni Neftali;
labindalawang libo sa lahi ni Manases;
7labindalawang libo mula sa lahi ni Simeon;
labindalawang libo mula sa lahi ni Levi;
labindalawang libo mula sa lahi ni Isacar;
8labindalawang libo mula sa lahi ni Zebulun;
labindalawang libo mula sa lahi ni Jose;
labindalawang libo mula sa lahi ni Benjamin.
9Pagkatapos nito, nakita ko ang napakaraming tao na hindi mabilang sa dami. Nagmula sila sa lahat ng bansa, angkan, lahi at wika. Nakatayo sila sa harap ng trono at ng Kordero. Nakadamit silang lahat ng puti at may hawak na mga palaspas. 10Sumisigaw sila nang malakas,
“Ang kaligtasan ay mula sa Diyos
na nakaupo sa trono,
at sa Kordero.”
11Tumayo ang mga anghel na nakapalibot sa trono, sa mga pinuno, at sa apat na buháy na nilalang. At nagpatirapa sila sa harap ng trono at sumamba sa Diyos. 12Sinabi nila,
“Amen!
Ang Diyos natin ay dapat purihin,
sambahin, pasalamatan at parangalan.
Nalalaman niya ang lahat,
at nasa kanya ang lahat ng kapangyarihan at kalakasan.
Purihin siya magpakailanman!
Amen!”
13Tinanong ako ng isa sa dalawampuʼt apat na pinuno, “Sino ang mga taong iyon na nakadamit ng puti, at saan sila nanggaling?”
14Sumagot ako, “Hindi ko po alam. Kayo po ang nakakaalam.”
At sinabi niya sa akin, “Sila ang mga dumaan sa matinding paghihirap. Nilinis at pinaputi nila ang kanilang mga damit sa pamamagitan ng dugo ng Kordero. 15Kaya,
nasa harap sila ng trono ng Diyos.
Naglilingkod sila sa kanya
araw at gabi sa kanyang Templo.
At ang Diyos na nakaupo sa trono
ang siyang kublihan nila.
16Hindi na sila magugutom
o mauuhaw pang muli.
At hindi na rin mabibilad
o mapapaso sa sinag ng araw#7:16 Isa. 49:10..
17Sapagkat ang Korderong nasa trono
ang magiging pastol nila,
at silaʼy dadalhin sa mga bukal na nagbibigay-buhay.#7:17 Isa. 49:10.
At papahirin ng Diyos ang luha
sa kanilang mga mata#7:17 Isa. 25:8..”
Currently Selected:
Pahayag 7: ASD
Highlight
Share
Copy
Want to have your highlights saved across all your devices? Sign up or sign in
Biblica® Open Ang Salita ng Diyos™
Karapatang-sipi © 2009, 2011, 2014, 2025 ng Biblica, Inc.
Biblica® Open Tagalog Contemporary Bible™
Copyright © 2009, 2011, 2014, 2025 by Biblica, Inc.
Ang “Biblica” ay ang tatak-pangkalakal na nakarehistro sa Biblica, Inc. sa United States Patent at Trademark Office.
Ginamit nang may pahintulot.
“Biblica” is a trademark registered in the United States Patent and Trademark Office by Biblica, Inc.
Used with permission.
