Salmo 34
34
Salmo 34
Awit na isinulat ni David noong siyaʼy nagbaliw-baliwan sa harapan ni Abimelec, kaya itinaboy siya nito at siyaʼy umalis.
1Pupurihin ko ang Panginoon
sa lahat ng oras.
Ang aking bibig ay hindi titigil
sa pagpupuri sa kanya.
2Ipagmamalaki ko ang gawa ng Panginoon;
maririnig ito ng mga api
at silaʼy magagalak.
3Halikayo! Ipahayag natin
ang kadakilaan ng Panginoon,
at itaas natin ang kanyang pangalan.
4Akoʼy nanalangin sa Panginoon
at akoʼy kanyang sinagot.
Pinalaya niya ako sa lahat
ng aking takot.
5Ang mga umaasa sa kanya
ay nagniningning ang mata
sa kaligayahan,
at walang bahid ng hiya
sa kanilang mukha.
6Noong wala na akong pag-asa,
tumawag ako sa Panginoon.
Akoʼy kanyang pinakinggan
at iniligtas sa lahat ng mga dinaranas
kong kahirapan.
7Ang anghel ng Panginoon
ay nagbabantay
sa mga may takot sa Diyos,
at ipinagtatanggol niya sila.
8Subukan ninyo at inyong makikita,
kung gaano kabuti ang Panginoon.
Napakapalad ng taong naghahanap ng kaligtasan#34:8 naghahanap ng kaligtasan: Sa Hebreo: nanganganlong. sa kanya!
9Kayong mga hinirang ng Panginoon,
matakot kayo sa kanya,
dahil ang may takot sa kanya
ay hindi kukulangin sa lahat
ng pangangailangan.
10Kahit mga leon ay kukulangin
sa pagkain at magugutom,
ngunit hindi kukulangin
ng mabubuting bagay
ang mga nagtitiwala sa Panginoon.
11Lumapit kayo, kayong gustong matuto sa akin.
Pakinggan ninyo ako at tuturuan ko kayo
ng pagkatakot sa Panginoon.
12Kung nais ninyo ng masaya
at mahabang buhay,
13iwasan ninyo ang masamang pananalita
at pagsisinungaling.
14Lumayo kayo sa masama
at gawin ninyo ang mabuti.
Pagsikapan ninyong kamtin
ang kapayapaan.
15Iniingatan ng Panginoon
ang mga matuwid,
at pinakikinggan niya ang kanilang mga daing.
16Ngunit kinakalaban ng Panginoon
ang mga gumagawa ng masama.
Silaʼy kanyang nililipol
hanggang sa hindi na sila maalala
ng mga tao sa mundo.
17Tinutugon ng Panginoon ang panalangin
ng mga matuwid,
at inililigtas sila sa lahat ng mga suliranin.
18Malapit ang Panginoon
sa mga may bagbag na puso,
at tinutulungan niya ang mga nawawalan ng pag-asa.
19Marami ang paghihirap
ng mga matutuwid,
ngunit inililigtas sila ng Panginoon
sa lahat ng ito.
20Silaʼy iniingatan ng Panginoon,
at kahit isang buto nilaʼy hindi mababali.
21Ang masamang tao ay papatayin
ng kanyang kasamaan.
At silang nagagalit sa taong matuwid
ay parurusahan ng Diyos.
22Ngunit ililigtas ng Panginoon
ang kanyang mga lingkod,
at hindi parurusahan ang isa man
sa mga naghahanap ng kaligtasan sa kanya.
Currently Selected:
Salmo 34: ASD
Highlight
Copy
Compare
Share
Want to have your highlights saved across all your devices? Sign up or sign in
Biblica® Open Ang Salita ng Diyos™
Karapatang-sipi © 2009, 2011, 2014, 2025 ng Biblica, Inc.
Biblica® Open Tagalog Contemporary Bible™
Copyright © 2009, 2011, 2014, 2025 by Biblica, Inc.
Ang “Biblica” ay ang tatak-pangkalakal na nakarehistro sa Biblica, Inc. sa United States Patent at Trademark Office.
Ginamit nang may pahintulot.
“Biblica” is a trademark registered in the United States Patent and Trademark Office by Biblica, Inc.
Used with permission.
Mga Awit 34
34
Pagpuri Dahil sa Kabutihan ng Diyos
Katha#1 Sam. 21:13-15. ni David nang siya'y palayasin ni Abimelec matapos magkunwang nasisiraan siya ng bait.
1Sa lahat ng pagkakataon si Yahweh ay aking pupurihin;
pagpupuri ko sa kanya'y hindi ko papatigilin.
2Aking pupurihin kanyang mga gawa,
kayong naaapi, makinig, matuwa!
3Ang kadakilaan niya ay ihayag,
at ang ngalan niya'y purihin ng lahat!
4Ang aking dalangi'y dininig ng Diyos,
inalis niya sa akin ang lahat kong takot.
5Nagalak ang aping umasa sa kanya,
pagkat di nabigo ang pag-asa nila.
6Tumatawag sa Diyos ang walang pag-asa,
sila'y iniligtas sa hirap at dusa.
7Anghel ang siyang bantay sa may takot sa Diyos,
sa mga panganib, sila'y kinukupkop.
8Tingnan#1 Ped. 2:3. mo at lasapin ang kabutihan ni Yahweh;
mapalad ang mga taong nananalig sa kanya.
9Matakot kay Yahweh, kayo na kanyang bayan,
nang makamtan ninyo ang lahat ng bagay.
10Kahit mga leon ay nagugutom din, sila'y nagkukulang sa hustong pagkain;
ngunit ang sinumang kay Yahweh ay sumunod, mabubuting bagay, sa kanya'y di mauudlot.
11Lapit, ako'y dinggin mga kaibigan,
at kayo ngayo'y aking tuturuan na si Yahweh ay dapat sundi't igalang.
12Sinong#1 Ped. 3:10-12. may gusto ng mahabang buhay;
sinong may nais ng masaganang buhay?
13Dila mo'y pigilan sa paghabi ng kasamaan.
14Mabuti ang gawi't masama'y layuan
pagsikapang kamtin ang kapayapaan.
15Mga mata ni Yahweh, sa mat'wid nakatuon,
sa kanilang pagdaing, lagi siyang tumutugon.
16Sa mga masasama, siya'y tumatalikod,
at sa alaala, sila'y mawawala.
17Agad dinirinig daing ng matuwid;
inililigtas sila sa mga panganib.
18Tinutulungan niya, mga nagdurusa
at di binibigo ang walang pag-asa.
19Ang taong matuwid, may suliranin man,
sa tulong ni Yahweh, agad maiibsan.
20Kukupkupin#Jn. 19:36. siya nang lubus-lubusan,
kahit isang buto'y hindi mababali.
21Ngunit ang masama, ay kasamaan din
sa taglay na buhay ang siyang kikitil.
22Mga lingkod niya'y kanyang ililigtas,
sa nagpapasakop, siya ang mag-iingat!
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2005 Philippine Bible Society