Matayo 4
4
Yesu akemebwa
(Mar 1:12-13; Luk 4:1-13)
1Agho Mwoyo yaatwala Yesu mu irungu, Sitaani amukeme.#Heb 2:18; 4:15 2Bwe yamala okusiiba enaku amakumi ana (40), omusana n'obwire, endhala yaamuluma. 3Omukemi yaaseeta, yaamukoba ati: “Oba oli Mwana wa Katonda koba amabaale gano gafuuke emigaati.”
4Aye Yesu yaakoba ati: “Kyaghandiikibwa kiti: ‘Omuntu taba mulamu lwa mugaati gwonka, aye na buli kibono ekiva mu munwa gwa Katonda.’ ”#Ma 8:3
5Agho Sitaani yaatwala Yesu mu kibuga ekitukuvu, yaamuniinia ku kasulya ak'eisinzizo, 6yaamukoba ati: “Oba oli Mwana wa Katonda, weesuule ghansi kuba kyaghandiikibwa kiti:#Zab 91:11-12
‘Aliragira bamalaika be
baakugemerera mu mikono gyaibwe,
olobe kwekontola kigere ku ibaale.’ ”
7Yesu yaamukoba ati: “Era kyaghandiikibwa kiti, ‘Tokemanga Musengwa Katonda wo.’ ”#Ma 6:16
8Kabiri Sitaani yaamutwala ku lusozi oluleeyi einho, yaamulaga obwakyabazinga obw'ensi n'ekitiisa kyabwo. 9Era yaamukoba ati: “Ebyo byonabyona ndidha kubikugha bwe weeyala ghansi n'onsinza.”
10Agho Yesu yaamukoba ati: “Sitaani ja ere! Kuba kyaghandiikibwa kiti,
‘Osinzanga Musengwa Katonda wo,
era ni yenka y'ogheerezanga.’ ”#Ma 6:13
11Agho Sitaani yaamuleka, era bamalaika baidha baamugheereza.
Yesu atoolera okwegeresa mu Galilaaya
(Mar 1:14-15; Luk 4:14-15)
12Agho Yesu bwe yawulira ati Yoanne bamugemye, yaaja e Galilaaya.#Mat 14:3; Mar 6:17; Luk 3:19-20 13Yaava e Nazarethi, yaaja yaaba e Kaperinaumu eky'oku nhandha, mu biketezo eby'e Zebuluni ni Nafutali#Yoa 2:12 14okutuukiriza omulanzi Isaia kye yakoba, ati:
15“Ekiketezo kya Zebuluni n'ekya Nafutali,#Isa 9:1-2
ku ngira ey'oku nhandha ng'osomoike Yorudani.
Galilaaya ey'abamaghanga agandi!
16Abantu abaabanga mu kizikiiza
baboine obutangaavu obunene.
N'abo ababaire mu nsi ey'olumbe n'ekinsense kyayo,
ekimulika kibaakiire.”
17Okuva olwo Yesu yainhama okwegeresa n'okukoba ati: “Mwenenie kuba Obwakyabazinga obw'omu igulu buseese.”#Mat 3:2
Ayeta abavubi bana
(Mar 1:16-20; Luk 5:1-11)
18Yesu yali ng'atambula ku mbali okw'enhandha ey'e Galilaaya, yaabona aboluganda babiri: Simoni ayetebwa Petero ni Anderea muganda we, nga bali kutega akatimba mu nhandha kuba baali bavubi. 19Yaakoba ati: “Munnonereze, ndidha kubafuula abavubi ab'abantu.” 20Era mangu ago baaleka obutimba baamunonereza.
21Bwe yava agho, yeeyongerayo, yaabona aboluganda abandi babiri: Yakobo ni Yoanne, abaana ba Zebedaayo, nga bali mu lyato n'iseibwe Zebedaayo nga batereeza obutimba bwaibwe yaabeeta. 22Era mangu ago baaleka eryato ni iseibwe, baamunonereza.
Ayegeresa era bw'awonia n'abalwaire kamaala
(Luk 6:17-19)
23Agho Yesu yeezungulula Galilaaya yoonayoona, ng'ayegeresa mu sinagoga dhaibwe, era ng'abakobera Amawulire Amalungi ag'Obwakyabazinga yaawonia buli bulwaire na buli bugodhe mu bantu.#Mat 9:35; Mar 1:39 24Yaawulikika mu Siria mwonamwona baamuleetera boonaboona abaali obubi: abaalwala endwaire edha buli nsambo, n'abaali na buli kibaluma, abaaliku emizimu, n'abasimbu, n'abalema, era yaabawonia. 25Ebiyindi by'abantu byava mu Galilaaya, ni mu Dekapoli, ni mu Yerusalemu, ni mu Buyudaaya, n'okusomoka Yorudani, byamunonereza.
Currently Selected:
Matayo 4: Sog
Highlight
Share
Copy
Want to have your highlights saved across all your devices? Sign up or sign in
Baibuli Ekibono kya Katonda © The Bible Society of Uganda, 2014