YouVersion Logo
Search Icon

Matayo 2

2
Abasaadha abaava e buvandhuba
1Agho Yesu bwe yazaalibwa e Bethelehemu mu Buyudaaya, mu byanda bya kyabazinga Herode, ghaabaagho abakugu mu by'emuunienie abaava e buvandhuba baatuuka mu Yerusalemu. 2Baakoba bati: “Ali gha oyo azaaliibwa okuba kyabazinga ow'Abayudaaya? Kuba tuboine emuunienie y'e buvandhuba era n'okwidha tumusinze.” 3Olwawulira bino, kyabazinga Herode ni Yerusalemu yoonayoona baatabulwa. 4Agho Herode yaasoloza Bakabona Abakulu boonaboona n'Abanamateeka ab'eighanga yaababuuza gha Kurisito ye yali ow'okuzaalibwa.
5Baamukoba bati: “Mu Bethelehemu eky'e Buyudaaya kuba kyaghandiikibwa omulanzi kiti:
6‘Iwe Bethelehemu mu nsi ya Yuda,#Mik 5:2
toli mutene mu bwami obw'omu Yuda,
kuba mu iwe n'omwidha okusimuka omufuzi,
anaalabirira abantu bange Abaisiraeli.’ ”
7Agho ni Herode yaayeta abasaadha mu kyama yaababuuza ku biseera emuunienie bye yabonekeramu. 8Yaabatuma e Bethelehemu ng'akoba ati: “Muje mwagale bukalamu omwana oyo, era bwe mumuzuula muntemyaku zeena nsobole okwidha okumusinza.”
9Olwamala okuwulira ebya kyabazinga baasimbula, aye okuja okubona nga muunienie ye baabona e buvandhuba ebakulembeiremu okutuusa bwe yatuuka n'eyemerera ghaigulu gh'ekigo aghaali omwana. 10Bwe baabona emuunienie baasangaala ekibitiriire. 11Agho baingira mu ndhu, baabona omwana ghalala n'inhina Maria, beeyala ku itaka baamusinza era baasibulula ebitereke byaibwe baamugha ebirabo: Zaabu, obubbaani ni mirra. 12Era nga bwe baalabulwa mu kirooto obutaira wa Herode, baagema engira eyindi okuja mu nsi ey'ewaibwe.
Okulumukira e Misiri
13Agho ng'abo baakavaagho, malaika wa Musengwa yaabonekera Yosefu mu kirooto yaamukoba ati: “Situka otoole omwana n'inhina mulumukire e Misiri, era musigale eyo okutuusa lwe ndiba ni kye nkukoba, kuba Herode aja kunoonia omwana okumwita.” 14Agho Yosefu yaasituka yaagema ku mwana n'inhina obwire obwo baaja e Misiri 15era baasigala eyo okutuusa Herode bwe yafa. Kyali kityo okutuukiriza Musengwa kye yayogerera mu mulanzi ati: “Nayeta omwana wange ave mu Misiri.”#Hos 11:1
Okwita abaana abato
16Agho Herode bwe yategeera nga bamutebwike, yaasungughala ekibitiriire era yaalagira okwita abaana abalenzi boonaboona ab'emyaka ebiri n'okwika ghansi abaali mu Bethelehemu n'ebiketezo ebikiriinaine, okusinziira ku biseera bye yali amaze okukakasa obukalamu n'abasaadha bale.
17Kityo ni kyatuukirira omulanzi Yeremia kye yakoba ati:
18“Mu Rama yaawulikikayo amamiro
ag'okugegenga n'okukuba empungu edh'amaani.
Rakeli ng'agegenga olw'abaana be,
era nga tayenda na kusaasirwa,
kuba baali nga tibakaaligho.”
Okuva e Misiri
19Agho Herode bwe yamala okufa, malaika wa Musengwa yaabonekera Yosefu mu kirooto, e Misiri. 20Yaamukoba ati: “Situka ogeme ku mwana n'inhina muje mu nsi ya Isiraeli, kuba abaali banoonia okwita omwana bamaze okufa.” 21Agho Yosefu yaasituka yaagema ku mwana n'inhina yaaja mu nsi ya Isiraeli. 22Aye bwe yawulira ati Arikelao n'eyali afuga Buyudaaya ng'omusika wa Herode, yaatya okuja eyo. Era bwe yalabulwa mu kirooto yaaja mu biketezo eby'e Galilaaya. 23Era bwe yatuuka yaatyama mu kibuga ekyetebwa Nazarethi kyatuukirira kityo ekyayogerwa abalanzi kiti: “Alyetebwa Munazarethi.”#Mar 1:24; Luk 2:39; Yoa 1:45

Currently Selected:

Matayo 2: Sog

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy