Salmo 95
95
Satu lingag dmayen Dwata
1Salu gamu dini, mlingag ito di Amuito Dwata;
flehew ito dmayen kenen, du kenen i guflidungito na i falwà gito.
2Mlé ito fye di kenen di ksaluito di munan;
flehew ito mlingag dad lingag dmayen kenen.
3Du Amuito Dwata i too mdatah Dwata,
kenen i harì mdatah fa di kdee dademe dwata gusmalig i dad to.
4Kenen i magot i klamang banwe;
nagotan kdee mdà di gumngalam i tanà kel di tah i dad mdatah bulul.
5Nagotan i mahin na tanà;
du kenen mimò dale.
6Taman fdadong ito na fdanaito ktoito du mangamfù di kenen;
lkuad ito di muna Amuito Dwata, i mimò gito,
7du kenen alò i Dwata gusmaligito,
na gito i dad to nifatan salngad di kifat satu to mifat bilibili.
E gamu, tooyu fanlinge i manan di gamu di duh ani,
8manan, “Nangyu fgal i uluyu salngad di mgimò i dad to gutambulyu ditù di Mériba,
na salngad di mgimòla di klola ditù di banwe gulandè to di Masah.
9Ditù tnandakla agu, neyela ku tan kaftahàgu i nawagu di landè ksaligla di deg,
blaam tateenla i fye mgimògu di dale.
10Fat falò fali klo i kalbutgu i dad to én,
na gmangu, ‘Dale i dad to fasyat i nawala;
là ale mayè mimen i dad knayègu.’
11Taman tatoo agu flabè na ani fakanggu na toogu dnohò,
gmangu, ‘I dad to ani, talà ale nan gfusuk di banwe gufaftudgu moon dale.’ ” Én man Dwata.
Currently Selected:
Salmo 95: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
