Salmo 63
63
Tnabeng Dwata i harì
Ani lingag Dabid di kadtuan di banwe gulandè to di bong banwe Dyudiya.
1E Dwata, ge i Dwatagu,
na too sè klidùgu ge;
i klidù nawagu ani,
gambet too agu malau.
Fanngabalta ge gambet i to mngabal yéél ninum
di banwe too kafag na sasè tanà i landè yéél.
2Tagafdadong agu di ge déén di Bong Gumneam,
na tateengu i bong enegam na kafyem.
3Du i kakdom too mabtas fa di nawagu,
na én duengu dmayen ge.
4Mlé agu fye di ge di klogu mto fa,
na kayanggu i dad sigalgu déén di ge du dmasal fagu di dagitam.
5Toogu fabsol i layefgu di kafyem,
na di klehewgu mlingag agu dmayen ge.
6Di kilègu faldam agu ge;
tayud i butang ge i fandamgu.
7Mnè agu di ifatam salngad di knè i anuk di dungan fafak yéan,
taman mlingag agu du ge sa i tmabeng deg.
8Nlagafta ge na nagotam agu i kwananam
du fye landè gaslokgu.
9Kabay dad to mayè mwè i nawagu falmo;
gtufa ale kadang ditù di lam i banwe dad to mati.
10Sdulê ale mati di kasfati,
na i lawehla knaan i dad ayem di bnas.
11Kabay i harì ani flehew di kfisan Dwata i dad dmuen deg;
na kdee to makang msen di deg
flehew du tamaklang i talù dad to tmulen kéng ani.
Currently Selected:
Salmo 63: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
