Salmo 51
51
I too glut ksal gaflehew Dwata
Ani lingag Harì Dabid di kafnge i tugad Dwata, Natan, tmalù kenen gablà di kwean ku Batsiba i yaan Yuraya.
1E Dwata, kandom agu
du i kakdom landè kgilin;
ge sa i too nun bong kakdo,
taman begam nifu i kdee salàgu di gusmulatam dun.
2Na toom agu nalob mdà di kdee salàgu;
nweam kdee sasè di lam nawagu fye too mlaneb.
3Du dilègu dad gukulanggu,
na msamuk i nawagu du là agu gamlifet i dad salàgu.
4Di ge alò i gugamsalàgu,
du i mgimògu too sasè di kitem;
taman too glut i gutadagam dmalam deg,
na too matlu i kdee kukumam.
5Too glut agu satu to gamsalà
fandà fa di làgu fa sut.
6Én toom kayè di satu to, ku mnè i kaglut na ksalig di lam i nawan,
taman tdoam deg du fye too nun kfulunggu faldam.
7Nlanebam agu mdà di dad salàgu,
na nweam kalbong kdee kagsikgu fye too agu mlaneb.
8Fuléam di deg i klehewgu;
du balù i kiboam deg salngad ku tatanfoam dad tulangu di kablat i salàgu,
knean ku nlifetam lêman agu lehew.
9Snafangam matam fye laam teen i dad salàgu,
na nifum i kdee sasè mgimògu di gusmulatam dun.
10Blém deg i falami nawa too mlaneb,
na fneam déén i kagsalig.
11Nangam agu flana di safédam,
na nangam nwè di deg i Mtiu Tulusam.
12Kabay fuléam di deg i klehew i to gmadè tagalwà kenen di agot i sasè,
na banlém agu ayè mimen ge.
13Na én nimògu, tdògu di dad gamsalà i knayeam di dale,
na msal ale na fdadong di ge.
14Dwata, falwaam agu di kukum di fati,
du alò ge i gafalwà deg,
na too agu lehew tmulen di dademe to gablà di kagalwà mdà di ge.
15E Gumdatahgu, nweam i kyàgu talù,
na toogu fdengeg i kafyem.
16Ise ku én i toom knayè i kadsù dad lmanaf,
du balù blégu ge lmanaf snakuf di lifoh là gaflehew ge.
17Kabay én dsù i toom knayè i kablégu ge i ksal too mdà di nawagu;
laam knagol i to malbà i nawan,
i to nun klidù nawan mdà di salaan.
18Na banlém kafye na tnabengam i dad tom di banwe Sion,
na fdakam lêman i labat batu di glibut syudadam Dyérusalém.
19Ku mgimò én, gaflehew ge nan i dad lmanaf dsù di ge,
én dad lagi baka snakufmi di lifoh di tah i gudamsù di ge,
du blé mdà di glut kimen nawa i mlé dun.
Currently Selected:
Salmo 51: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
