Dad Fngewe 15
15
1I mafganag timel gaflana i kaflabè,
bay i makto timel i gafdinè dun.
2Ku nun man i to fulung faldam, too kayè i dademe ganbet,
bay ku nun man i to là fulung faldam, landè gukmamu dun.
3I kdee mgimò di klamang banwe teen Dwata,
teenan i kdee nimoito balù fye ku demen sasè.
4I fye talù gamlé klawil na ktanak nawa i dad to,
bay i sasè talù gamlé tduk di nawa i dad to.
5I to là fulung faldam là mayè flinge i tdò i maan,
bay i to dmawat i kngak i maan, fiten i kfulungan mebe i kton.
6I knun i to matlu là lana di kenen,
bay i knun i to sasè tatì lana di kakel i kalima.
7I kbel i gnadè fagu di to fulung faldam,
ise ku fagu di to là fulung faldam.
8I dsù blé i to sasè knang Dwata,
bay i dasal i to matlu kanlehewan.
9I nimò i to sasè knang Dwata,
bay kanbongan nawa i to mimò i matlu.
10Ku gasyat i to di fye dalan, too blat i kaflayaman,
na mati i to ku laan dmawat i kngak kenen di gugsalaan.
11Du gadè Dwata i kdee gablà di gumnè i dad mati,
lumban fa kgadean i kdee gablà di nawa i dad to.
12I to madoy là mayè ku nun mngak kenen,
na là mayè mni fngewe di to fulung faldam.
13I to lehew, teenam i klehewan di bawehan,
bay i to mlidù, teenam i klidù nawan di bawehan.
14I to nun kaglabatan mayè gambet,
bay i to là fulung faldam fnò i nawan i klandè kfulungan.
15I knè i to mdanà too malima,
bay i to nun klehew, too lehew i knean.
16Fye fa i to tukay knunan ku nun klikoan di Dwata,
di to nun bong knunan i nun ksamuk.
17Fye fa ku tatì ge alò kmaan i gulay dmeme i demem sakdo,
di kmaan ge i too fye nem uten, bay nun kasnang nawa.
18I to mlal malbut kenen gumdà i ksugak,
bay i to là mlal malbut fakay smafye i dad to sugak.
19I to là mayè mimò, balù tanè, nun dad sual gablabal i dalanan,
bay i to matlu landè gablabal i dalanan.
20I tingà fulung faldam gaflehew i maan,
bay i tingà là fulung faldam knangan i yéan.
21I to landè kaglabatan toon sa kanlehew i sasè nimoan,
bay i to nun kaglabatan, toon nimò i matlu nimò.
22I tafandam i to là gdohò ku kulang i dad to mngewe,
bay too gdohò fagu di dee dad to mngewe kenen.
23Lehew i to ku fye i ktimelan
di bangan tmimel dun.
24I to fulung faldam, mlalò i dalan salu di nawa landè sen,
là mlalò i dalan salu di fati.
25Lanbà Dwata i gumnè i to fdatah,
bay nifatan i tanà i libun balu.
26Knang Dwata i fandam i dad to sasè,
bay kanlehewan i talù dad to mlaneb i nawala.
27I to mlimbung fakufan sa i malayan di ksamuk,
bay i to là dmawat i blé du fye msen di sasè, mlawil kenen.
28I to matlu funan too faldam di laan fa tmimel,
bay i to sasè mlal timelan, bay sasè i manan.
29I dasal i to matlu too fanlinge Dwata,
bay mawag Dwata di to sasè.
30Ku lehew i satu to, ge baling too lehew,
na i fye tulen too gafgulê ge.
31Ku flinge i satu to i kngak kenen,
mbaling kenen satu di dad to fulung faldam.
32Ku i to là mayè fatdò, fanlayaman i kton,
bay ku fanlingen i kngak kenen, matnù i kfulungan.
33I klikò di Dwata, én gamlé di to i kfulung faldam,
na silang nun mafè i to ku funan fdanà i kton.
Currently Selected:
Dad Fngewe 15: ITD
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
