Ñwaè' Joân 21
21
1Cena yi ka' mì wɛɛ, Jisòs à ker duŋshi yì nyor nè ŋgǎa yɛ'ni yì buu àwǎa tʉ̀ Tìbɛrìyàs. E m dùŋshi yì nyor ba à njɛ̀ɛ enɛ̂. 2Saimʉn Pità ba Tomas ce a m ce too enɛ rfar nà, ba Nàtanìyɛ̀l ce à rla' Kɛnà ce à ŋgǒŋ Galèlê, ba boo Sɛbɛ̀dî, ba bèe mo' a baa efa mʉ̀ ŋgǎa yɛ'ni yì buu, a m ba àbee. 3Saimʉn Pità à m làa nè wowèe enɛ̂, “M be dù koo nca.” Wowèe a laa nè ye enɛ̂, “Sèe be dù.” Wowèe a du a niŋ mbe keŋ à rkoo nca, a ke' koo yuu nètʉ' anà ka'.
4Tʉ̀' à ka' ce raa, Jisòs à tɛɛ àwǎa rò. Ŋgǎa yɛ'ni yì buu a ke' riŋ enɛ a Jisòs ka'. 5Jisòs à laa nè wowèe enɛ̂, “Boo, wèe à koo nca ka' a?” Wowèe a beesì nè ye enɛ̂, “Ài'.” 6E laa nè wowèe enɛ̂, “Mà' nè rraa à ŋgʉ̀' bo mà', wèe be koo yuu.” Wowèe a ma' rraa, a moo à rsʉ̀ŋ rraa enjep rò làr, njobè' nca yi m ba njep rraa anà gòr sê. 7Ŋwɛ̀ yɛ'ni buu Jisòs ce Jisòs à m kòŋ se nà à laa nè Pità enɛ̂, “A Tatâ.” Pità à ka' yu' enɛ a Tatâ, a ma' cɛ̀' à nyòr njobè' e m co'ni bcɛ̀' efa nyòr. E ka' mà' wɛɛ, a nyɛɛ embe keŋ a coo njep rò a du a yɛ Jisòs. 8Bɛr ŋgǎa yɛ'ni buu Jisòs a m vʉ̀ yap ba mbe keŋ. A ka' ce vʉ̀ wa'a, a ce sʉ̀ŋ rraa ce nca yi m ba njo gòr se nà, a ce vʉ̀ àgho. Kɛ' embe dì' wowèe a m ba anà du nje wǎa rò yi m ba njìsàp ka'. Kɛ' embo nà du nje wǎa rò yi m ba àmbò mkoo mntâ.
9Wowèe a ka' bà' nje w a rò, fʉʉ embe keŋ, a yɛ mor, a yɛ brɛ̌d, a yɛ nca njep mor anà. 10Jisòs à laa nè wowèe enɛ̂, “Lòr nè nca mo' ce wèe à ku koo sè'ni nà, vʉ àgho.” 11Saimʉn Pità à kʉtì mbe keŋ a sʉŋ rraa a fʉr mbe ŋkʉ̀. Nca gòrgòr yi m ba njo sê. Yi m ba rjèe nè ncòp-taar-à-mntâ. Ka' nca yi m ba njo gòr wa'a, rraa li m ceeŋger ka'. 12Jisòs à laa nè wowèe enɛ̂, “Vʉ̀ nè ye yuu.” Ŋwɛ̀ mò' efa mʉ̀ wowèe à tʉr ntee à rbipshi nè Jisòs enɛ a ye nda lɛ ka'. Wowèe a m rìŋ enɛ a Tatâ. 13Jisòs à du a lor brɛ̌d a vʉ a gapshi nè wowèe, a ker lor nca a gapshi nè wowèe foŋ. 14A ŋkàrà' taar sè'ni àmbò Jisòs à m dùŋshi yì nyor nè ŋgǎa yɛ'ni yì buu, kɛ̌' à nfè' ce e m fʉʉ efa rkwe.
15Wowèe a ka' ye byee mìsi wɛɛ, Jisòs à laa nè Saimʉn Pità enɛ̂, “Saimʉ̀n, muu Jǒn, wɛ̀ kòŋ mɛ̀ a caa bèe ca a?” Pità à laa nè ye enɛ̂, “Ɛ̀no Tatâ, à rìŋ wɛnɛ m kòŋ wɛ̀.” E laa nè ye enɛ̂, “Nyaŋ ya njèe.” 16E m ker laa nè Pità enɛ̂, “Saimʉ̀n, muu Jǒn, à kòŋ mɛ̀ a?” E laa nè ye enɛ̂, “Ɛ̀no Tatâ, à rìŋ wɛnɛ m kòŋ wɛ̀.” E laa nè ye enɛ̂, “Nyaŋ ya njèe.” 17E ka' làa nè Pità bà' bkǎŋ btaar enɛ̂, “Saimʉ̀n, muu Jǒn, à kòŋ mɛ̀ a?” Ntee yi bep ye njobè' e m bipshi nè ye ŋkàrà' taar enɛ̂, “À kòŋ mɛ̀ a?” E laa nè ye enɛ̂, “Tatâ, à rìŋ buu wɛɛwɛ, à rìŋ wɛnɛ m kòŋ wɛ̀.” Jisòs à laa nè ye enɛ̂, “Nyaŋ ya njèe. 18M ce suŋ wɛ̀ nè mini-ŋwɛ̀ enɛ à m ba à nfè' ce wɛ̀ m bii nsùnsù ŋwɛ̀, wɛ̀ m ce kur yò ŋkànda ce dù fàdì' ce wɛ̀ gwɛɛ. Be ba à nfè' ce à yu nleeŋwɛ̀ tɛ à naa mmbo, tɛ ŋwɛ̀ jɛɛ kur wɛ̀, lòr wɛ̀ dù àgho fàdì' ce à kòŋ à rdù ka'.” 19E m làa wa'a, à rdùŋshi njɛ̀ɛ rkwe ce Pità be kè kwe, kù'si Nyʉ̀ àgho. Cena yi ka' mì wɛɛ, e laa nè ye enɛ̂, “Vʉ̀ fa mɛ̌ mbùu.”
20Pità à ka' karsi nyor a yɛ ŋwɛ̀ yɛ'ni buu Jisòs mò' ce Jisòs à m kòŋ se nà àmbò e ce vʉ̀ a wǎp mbùu. A ye ce e m kɛ̀r nyor àgee Jisòs à nfè' wowèe a m ce ye byee, a bipshi nè ye enɛ̂, “Tatâ, ŋwɛ̀ ce e be fyèni wɛ̀ a nda?” nà. 21Pità à ka' yɛ ye, a laa nè Jisòs enɛ̂, “Tatâ, yi yu yi kɛ àmbò ŋwɛ̀ ca?” 22Jisòs à laa nè ye enɛ̂, “M ka' koŋ enɛ e ku cu ntèe caar tɛ m ke kʉti, yo enjo ba kɛ? Vʉ̀ yo ba fa mɛ̌ mbùu.” 23Jisòs à ka' làa wa'a, bfʉr a kɛ' a ce suŋ enɛ ŋwɛ̀ yɛ'ni yì buu ce Jisòs à m kòŋ ye gòr nà be kè lɛ kwe ka'. Jisòs à m banì laa ba enɛ e be kè kwe ka' ka'. E m banì laa ba enɛ̂, “M ka' koŋ enɛ e ku cu ntèe caar tɛ m ke kʉti, yo enjo ba kɛ? Vʉ̀ yo ba fa mɛ̌ mbùu.” 24Ŋwɛ̀ yɛ'ni buu Jisòs ca a ŋwɛ̀ ce e ce suŋ wèe buu ca. À m saŋ ye a saŋ buu ca. Wèr rìŋ wernɛ yuu ce e làa yi yu mini.
25Buu mò' ce Jisòs à m gèe vi yu gòr sê. A m ba saŋ buu ca wɛɛwɛ, m kwà' mɛnɛ ŋgòŋ ca yi m ba tʉr dì' à rlɛ̀ mŋwà' ce a saŋ buu anà mbo ka'.
Currently Selected:
Ñwaè' Joân 21: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.