Ñwaè' Mfaè' Ñgaâa Ntuu Jisoès 1
1
1Màsà Tìyofilòs, mbe ya ŋwà' entombì ce mɛ̀ m saŋ nè wɛ̀ nà, mɛ̀ m saŋ buu wɛɛwɛ ce Jisòs à m gèe ker ba vì ce e m yɛ'ni, kɛ̌' à nfè' ce e m kɛ̀' li rfà', 2du ba' à nfè' ce Nyʉ̀ à m lòr ye a du àgho mbe bùu. Tɛ e ka' kè dù mbe bùu e m fa ncep nè ŋgǎa ntuu ce e m ce nà à ŋger Yʉ' Rara. 3Jisòs à ka' kwe, fʉʉ efa rkwe a cu à mnòŋ mkyèe a yɛɛti fa wǎp mʉ nfè' àŋgoo, a duŋshi yì nyor nè wowèe à njɛ̀ɛ njì ce rtarnì li m ba njo ka', enɛ e yu ntèe. E m ce suŋ wowèe àmbò rsa' Nyʉ̀ ce e ce sa' àmbò ŋkʉʉ. 4Jisòs à ka' ba a wowèe à nfè' anà, a laa nè wowèe enɛ wowèe a fa lǒ à rlà' Jɛ̀rusalɛ̀m ka'. E m làa enɛ̂, “Cu nè ce ke' yuu ce Nyʉ̀ Tàr à m kà' nè wèe à ba yuu ce mɛ̀ m suŋ wèe foŋ nà. 5Jǒn à m bàptir wèe nè mdip, geewa'a, ku bɛti mnòŋ mʉcàr tɛ a baptir wèe ba nè Yʉ' Rara.”
6Ŋgǎa ntuu Jisòs a ka' ba a Jisòs wèe, a bipshi nè ye enɛ̂, “Tatâ, wà' à be kʉsi ŋger nè bèe Isrɛ̀l sè'ni na a?” 7Jisòs à beesì nè wowèe enɛ̂, “Yu ye dì' à rrìŋ nfè' kɛ̀ mnòŋ ce Tàr à lɛ̀ à yi ŋger ka'. 8Ka' yi yu wa'a, wèe be tʉr ŋger à nfè' ce Yʉ' Rara yi sùu mbe wěe ndù, tɛ wèe bo suŋ bèe àmbò mɛ̀ à rla' Jɛ̀rusalɛ̀m, ba à ŋgǒŋ Judà wɛɛwɛ, ba Sàmarìyà, ker ba à mŋgòŋ wɛɛwɛ.” 9E ka' làa wa' mìsi, Nyʉ̀ à lor ye a du àgho mbe bùu, wowèe a tɛɛ a ce fyɛ', mmbà' vi vʉ a cete ye, wowèe a ke' ker yɛ ye ka'. 10Wowèe a m ku bii kè' mbe bùu a ce fyɛ' àmbò e ce dù, a ka' lò a ku yɛ mmbaŋrù a baa àmbò a tɛɛ a wǎp geŋ, a yar bcɛ̌' bbʉʉ. 11Mmbaŋrù a baa ca a laa nè wowèe enɛ̂, “Běe à ŋgǒŋ Galèlê, wèe à tɛɛ a ce kè' ba kɛ mbe bùu? Jisòs ce Nyʉ̀ à lòr ye a du àgho mbe bùu na, e be kè kʉti à njɛ̀ɛ njì wèe à yɛ ye e ce dù na.”
12Ŋgǎa ntuu Jisòs a m lò embe rtùu Olèf a du à rla' Jɛ̀rusalɛ̀m. À rlò embe rtùu Olèf dù Jɛ̀rusalɛ̀m e ku ba àmbò mar mò'sir. 13Wowèe a ka' bà' a ko' mbe rum ndap yǐ mbekì, mbe dì' ce wowèe a m ce cu. Bèe ce a m ba mbo à m ba Pità ba Jǒn ba Jɛ̂ms, ker ba Andrù ba Felêp, ker ba Tomas ba Bàtòlomì ba Matìyò ba Jɛms muu Alfìyòs ba Saimʉ̀n ce e m ba mò' efa mʉ̀ bèe Silòt ba Judàs muu Jɛ̂ms. 14Wowèe wɛɛwɛ a m ba cǔu mo'sir, a ce loo àbee. Bbyèŋge mo' ba Mɛ̀ɛri ma yì Jisòs, ker ba bfʉr Jisòs, a m ba a wowèe.
15À m ba à mnòŋ anà Pità à natì mbekì a tɛɛ à mʉ̀ yì bèe ce a m ba àmbò bèe rjèe nè bèe mmbaa, a laa enɛ̂, 16“Yà bèe, blǎa Nyʉ̀ vi be kù ghɛɛte àmbò Yʉ' Rara yi m làa njì enjep Dɛvìd, kuu Judàs ce e m dùŋshi njì nè bèe ce a m koo Jisòs. 17E m ba mò' efa sèe ce a m fa ye rfà' ce sèe ce gèe na foŋ.” 18Judàs ca à m lòr yi mbàa blɛɛ ce e m koni nà a yuu ŋkʉ̀ àgho. E m gwè à yě ŋkʉ̀ anà njep nshe nè bsii, rbʉ̀ li watì, bto vi fʉʉ à mŋkʉ̀. 19Bèe wɛɛwɛ à rla' Jɛ̀rusalɛ̀m a m yu' yuu ce yi m koni Judàs. Wowèe a ka' yu', a too ŋkʉ̀ anà à yàp li enɛ Àkɛdɛmà. Mbùu efa gho à ba enɛ, “Ŋkʉ̀ Blɛɛ.”
20“A saŋ mbe Ŋwà' Byɛɛ enɛ̂,
‘Tɛ yì ndap ba mbòmmbo,
tɛ ŋwɛ̀ ke' cu mbo ka'.’
A ker saŋ mbo foŋ enɛ̂,
‘Tɛ ŋwɛ̀ mò' lor yi nta' rfà'.’
21-22Banɛ sèe be ce ŋwɛ̀ mò' tɛ e lor yi nta' rfà' tɛ wèr wowèe bo suŋ bèe enɛ wèr à m yɛ Jisòs à nfè' ce e m fʉʉ efa rkwe. Sèe ce ŋwɛ̀ ce sèe wowèe à m ba à nfè' ce Jisòs à m ce kar sèe wowèe, kɛ' embe nfè' ce Jǒn à m ce bàptir bèe, du ba' mbe nfè' ce Tata Nyʉ̀ à m lòr ye a du àgho mbe bùu.” 23Pità à ka' làa mìsi, wowèe a ce bèe a mmbaa. A m ce Josɛ̀f ce li rlii mo' li m ba enɛ Bàsabàs, rmo' li ba enɛ Jostòs, a ker ce Màtiyàs foŋ. 24Wowèe a m loo, a laa enɛ̂, “Tatâ, wɛ̀ ce wɛ̀ rìŋ mntee bèe wɛɛwɛ. Dùŋshi là wèr ŋwɛ̀ ce wɛ̀ ce efa mʉ̀ bèe a mmbaa ca, 25enɛ e gee rfà' ŋgǎa ntuu Jisòs ce Judàs à m ce fà', a ka' ma'shi a du fàdì' ce e ba dù.” 26A m saŋ mlii bèe a mmbaa ca enɛ a bo co' ŋwɛ̀ ce e be lòr dì' Judàs. A ka' gèe wa'a, rlii ce li fʉʉ entòmbì à ba li Màtiyàs. Li ka' fʉʉ, a lor ye a fa mbe mʉ̀ ŋgǎa ntuu Jisòs ce a m ba bèe ncòp-mò'sir-à-rrʉ̀ʉ nà.
Currently Selected:
Ñwaè' Mfaè' Ñgaâa Ntuu Jisoès 1: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.