Ñwaè' Mfaè' Ñgaâa Ntuu Jisoès 13

1Ŋgǎa ryɛ'nì ba ŋgǎa ncep ntuu Nyʉ̀ ce a m ba mbe cor à rla' Antìyòk, à m ba Bànabàs ba Simìyòn ce a m ce too enɛ Ŋwɛ̌ Nsii, ker ba Lushǒs à rla' Sàirên, ba Manɛ̀n ce e m kù' a Hɛròd ce e m be sa' njeptii ŋwɛ̌ ŋgòr, ba Sôl. 2Wowèe a ka' ce loo nè Tatâ, ce jì mdip ce gèe rloo, Yʉ' Rara yi laa enɛ̂, “Fʉr nè Bànabàs ba Sol efa wěe mʉ, tɛ a bo gèe rfà' ce mɛ̀ fʉr wowèe enɛ a gêe.” 3Wowèe a ka' jì mdip, ce gèe rloo wɛɛ, a lɛ map mmbo mbe wǎp ndù, a ma'shi wowèe, wowèe a dû.

4Yʉ' Rara yi ka' tuu wowèe, wowèe a natì a du à rla' Sɛ̀lushà, a lǒ àfo a niŋ mbe keŋ a du à to' Saipròs. 5Wowèe a ka' dù bà' à rla' Sàlamìs, a fe'shi blǎa Nyʉ̀ à mndap rloo Jûs. Jǒn à m ba a wowèe, tɛ e bo ce jà' wowèe. 6Wowèe a ka' jɛ̀r à to' ca wɛɛwɛ, bà' à rla' Pafòs, a yɛ ŋwɛ̀ fii mò' ce a m ce too enɛ Bǎajisòs. E m ba ŋwɛ̀ Jus ce e m ce bo' bèe enɛ e yu ŋwɛ̀ ncep ntuu Nyʉ̀. 7E m ce fà' nè govanò ce a m ce too enɛ Sàjòs Polòs. À m ba ŋwɛ̀ ce e m tʉr bfee sê. E m tuu bèe enɛ a du kɛ' Bànabàs ba Sôl, njobè' e m kòŋ à ryu' blǎa Nyʉ̀. 8Ŋwɛ̀ fii anà ce a m ce too à li Grěk enɛ Ɛlemàs, à jepsì wowèe, a koŋ enɛ govanò byemi blàa ce wowèe a m fè'shi àmbò Jisòs nà ka'. 9Sol ce a m ce too enɛ Pol foŋ nà, à ka' ruu nè Yʉ' Rara, a ke' ye a laa enɛ̂, 10“Wɛ̀ ce à yu muu nyʉ̀rkà', a baa buu wɛɛwɛ ce vi yu yɛɛnì, a ba ŋwɛ̀ ye kìŋgà, a ba ŋwɛ̀ mbo'ni a misî, ǎ kòŋ à rborni efa rjepsi mini Tata ce e yu kùyɛɛ na ka' njokɛ? 11Yɛ̂, Tata be fa wɛ̀ ŋgɛ'. À be fèp, kèr yɛ rlir nyʉ̀ ka' à mʉ nfè' mò'.” E ka' làa wa'a, mbà' à tar ye à mmìr njà' mò'sir, mmir mi sii ye, e kɛ' a ce ròo ŋwɛ̀ ce e be ghashi ye à rkoo dù àgho. 12Govanò à ka' yɛ yuu ce yi koni, a byemi yuu ce Sol à m làa. E m bɛ̀ɛ ryɛ'nì ce a m yɛ'ni du kuu Tata na sê.

13Pol ba bèe ce a wowèe a m ce jɛ̀r, a m nàtǐ à rla' Pafòs a niŋ mbe keŋ a du à rla' Pɛgà à ŋgǒŋ Pàmfilìyà. A ka' bà', Jǒn à ma'shì wowèe a kʉti à rla' Jɛ̀rusalɛ̀m. 14Wowèe a ka' nàtǐ à rla' Pɛgà a du a ba' à rla' Antìyòk à ŋgǒŋ Pìsidìyà. À ka' ba nyʉ̀ mmbomntaa Jûs, wowèe a niŋ mbe ndàp rloo a cu à nshè. 15Bèe embe ndàp rloo a ka' bè' embe ŋwǎ' mncir kèr bè' embe ŋwǎ' ŋgǎa ncep ntuu Nyʉ̀, bèe ce a m ba btu embe ndàp rloo a tuu ŋwɛ̀ enɛ e laa nè wowèe enɛ̂, “Bfʉr wêr, wèe à ka' tʉr ncep mò' à rfa nè bèe, wèe fa.” 16Pol à natì mbekì, a naa bo mbekì a laa enɛ̂,

“Yà bèe Isrɛ̀l ker ba wèe ce wèe ce wɛp Nyʉ̀, yu' nè yuu ce m be làa. 17Nyʉ̀ bèe Isrɛ̀l ca à m ce visèe btâ, a gee ŋgʉ̀ yìsèe bèe à ku' à nfè' ce wowèe a m ba bkìlò à to' Ijìp. Nyʉ̀ à m fʉr wowěe à to' anà à yi ŋger, 18a ku ba a wowèe à rìŋ à bfè' mŋkyèe a ce kur ntee nè wowèe àfo. 19E ka' yʉshi běe à bto' sàamba ce vi m ba à ŋgǒŋ Kɛnàn, a fa ŋgòŋ anà à bti' nè yì bèe, 20àmbò à bfè' mjèe kyèe ba nto'. À ka' ba embenjì ca, e fa wowèe ŋgǎa nsa' mnsa', wowèe a sa' caar a ba' mbe nfè' yì Sǎmwɛ̀l ce e m ba ŋwɛ̀ ncep ntuu Nyʉ̀. 21À m ba à nfè' yì Sǎmwɛ̀l, wowèe a laa enɛ Nyʉ̀ fa wowèe ŋkʉʉ, Nyʉ̀ à fa wowèe Sol ce e m ba muu Kîsh, ce e m ba ŋwɛ̀ embe ntɛ̀' yì Bɛnjamɛ̀n. E m sa' kʉʉ à bfè' mŋkyèe. 22Nyʉ̀ à ka' sùusi ye embe kʉʉ, a ce Dɛvìd à yàp ŋkʉʉ. E m làa yuu a kuu ye enɛ̂, ‘Mɛ̀ yɛ Dɛvìd muu Jɛsì e ba ŋwɛ̀ ce e ghɛɛte à ŋwɛ̀ ce e be gèe buu wɛɛwɛ ce m kòŋ.’ 23Yu ba embe ndʉ̀' ŋwɛ̀ ca ce Nyʉ̀ à fʉr ŋwɛ̀ ce e be gèe bèe a lûŋ, a fa nè bèe Isrɛ̀l àmbò e m kà' wowèe. Ŋwɛ̀ rlùŋ ca yu Jisòs. 24Tɛ e ka' kè vʉ̀, Jǒn à m fè'shi nè bèe Isrɛ̀l wɛɛwɛ enɛ wowèe a kupse, ma'shi yàp buu bbebep tɛ a baptir wowèe. 25Jǒn à ka' ce mìsi li rfà', a laa enɛ̂, ‘Wèe ce kwà'shi enɛ a mɛ̀ ŋwɛ̀ anà a? A mɛ̀ ye ka'. Ŋwɛ̀ mò' ce vʉ̀ embe mɛ̌ njì, à ba ŋwɛ̀ ce mɛ̀ ghɛɛte à rbà'shi vi blaba' ka'.’

26“Bfʉr wâ, bèe embe ndʉ̀' Abràham ker ba wèe ce wèe ce wɛp Nyʉ̀, a tuusi nsuŋ rlùŋ ca ba nè sèe. 27Běe à rla' Jɛ̀rusalɛ̀m ker ba bèe ce a ce sa' wowèe a rìŋ njɛ̀ɛ ŋwɛ̀ ce Jisòs yu ka'. A m bè' blǎa Nyʉ̀ ce ŋgǎa ncep ntuu Nyʉ̀ a m saŋ à mmbomntaa Nyʉ̀ wɛɛwɛ, wowèe a yu' a riŋ vi ka'. Àmbò yi yu wa' nà, yuu ce a m bè' anà yi m ku ghɛɛte mbe nfè' ce a m sa' vi mnsa' a teni enɛ a yʉ ye nà. 28Ka' wowèe a m tʉr yuu mo' ce àde' a m ba noŋ mbenjì mo, yʉ ye ka' wa'a, wowèe a m làa nè Pailɛ̀t enɛ a yʉ ye. 29Wowèe a ka' gèe buu wɛɛwɛ ce a m saŋ mbe Ŋwǎ' Nyʉ̀ enɛ a be kè gèe nè ye nà, a suusi ye embe ce, a lɛ njep rshè. 30Geewa'a, Nyʉ̀ à m fʉr ye efa rkwe, 31e yɛɛtì nè bèe ce a wowèe a m jɛ̌r à ŋgǒŋ Galèlê, a du a ba' à rla' Jɛ̀rusalɛ̀m nà, à mnòŋ àŋgoo. Wowèe a ce suŋ yìsèe bèe sè'ni àmbò ye. 32Wèr à vʉ̀ àfa à rsuŋ wèe Nsuŋ Mbòŋmboŋ enɛ Nyʉ̀ à fʉr Jisòs efa rkwe. Banɛ yuu ce Nyʉ̀ à m kà' enɛ e be gèe nè visèe bta nà, 33e gèe yuu anà ba nè sèe ce sèe yu boo wap. Yi ku ba àmbò a saŋ mbe bkʉ̀kʉ̌ bbaa embe Ŋwǎ' Byɛɛ. A saŋ mbo enɛ̂,

‘À yu muu wà,

kɛ̌' ntìni, m yu yo tâ.’

34Ca yu yuu ce Nyʉ̀ à m laa àmbò rfʉʉ ce yi m ba enɛ e be kè fʉʉ efa kwe kèr dù mbà yir bʉ̀te ka' nà. E m làa enɛ̂,

‘M be fa wɛ̀ buu brara ce mɛ̀ m kà' nè Dɛvìd,

rtarnì li ba njo ka' nà.’

35E ker laa mbe dì' mo' foŋ enɛ̂,

‘Àde' à ma'shì yò ŋwɛ̀ rfǎ' nrara,

e kwe bʉ̀te ka'.’

36Dɛvìd à m gèe buu ce Nyʉ̀ à m kòŋ enɛ e gee mbe nfè' yì. A ka' gèe, a kwe. A m tuŋ ye àgee vi btarkʉ, e bʉtè. 37Ŋwɛ̀ ce Nyʉ̀ à m fʉr efa rkwe nà, à m bʉ̀te yi ka'. 38Banɛ àmbò yi yu wa' na, bfʉr wâ, wèe à ba rìŋ enɛ yu ba njo' ŋwɛ̀ anà ce a ce fè'shi nè wèe enɛ àde' Nyʉ̀ foosì buu bbebep ŋwɛ̀. 39Wèe à ba rìŋ enɛ ŋwɛ̀ wɛɛwɛ ce e ka' byemi nè ye banɛ ŋgàŋ be lùŋ efa buu wɛɛwɛ ce àde' ncir Musìs yi m ba gee ŋwɛ̀ e luŋ efa gho ka'. 40Lòr nè nfè' fà dì' yuu ce ŋgǎa ncep ntuu Nyʉ̀ a m làa, yi lo koni wèe ka'. 41Wowèe a m làa enɛ̂,

‘Yɛ̂, wèe ce wèe ce jàasi buu Nyʉ̀,

bɛ̀ɛŋger nè, kweŋger,

njobè' m be gèe rfǎ' mo' à nfè' yè,

tɛ ba rfà' ce ŋwɛ̀ mò' à m ka' suŋ wèe, wèe byemì ka'.’ ”

42Pol ba Bànabàs a ka' ce fʉʉ embe ndàp rloo, bèe anà a bu' mmbo nè wowèe enɛ wowèe a ker vʉ à mmbomntaa Nyʉ̀ ekǒ ker suŋ wowèe buu anà. 43Wowèe a ka' fʉʉse ce dùse, Jus magòr se ker ba bèe mo' enje jɛɛ ce a m byemi nè Nyʉ̀ Jûs, a du àmbùu Pol ba Bànabàs. Pol ba Bànabàs a de' a wowèe, a fa wowèe ŋger enɛ wowèe a ku ce yu' ba ese Nyʉ̀ tɛ e be tʉr ntee bòŋboŋ nè wowèe. 44À ka' ba à mmbomntaa Nyʉ̀ ekǒ, to' bìi yi ku ròo fʉʉ wɛɛwɛ à ryu' blǎa Nyʉ̀. 45Jus a ka' yɛ ku' bèe ca, a ko'ndoŋ, a sɛr yuu ce Pol à m làa, a cɛp ye. 46Pol ba Bànabàs a ker laa nè ŋger-ŋwɛ̀ enɛ̂, “Yi m ba yɛɛnì enɛ wèr fe'shi blǎa Nyʉ̀ nè wèe entombì. Àmbò wèe à kani a lor enɛ wèe à ghɛɛte à rkoni ryòŋ ce nfesè ka' na, banɛ wèr be mà'shi wèe, fè'shi ba nè bèe enje jɛɛ. 47Ca yu ba yuu ce Tata Nyʉ̀ à làa nè wèr enɛ̂,

‘Mɛ̀ gèe wɛ̀, wɛ̀ ba rraa nè bèe enje jɛɛ,

tɛ à bo ba nduunjǐ rlùŋ nè ŋgòŋ wɛɛwɛ.’ ”

48Bèe enje jɛɛ a ka' yu' ca, a lu'shi sê, a ku'si Tata à vi blàa. Bèe ce Nyʉ̀ à m ce enɛ a bo koni ryòŋ ce nfesè a m byemi. 49Blǎa Tata vi m dù à ŋgòŋ anà wɛɛwɛ. 50Ka' yi m ba wa'a, Jus a m barsi bbyèŋge ŋgǎa mlii ce a m ce loo nè Nyʉ̀ ker ba mmbaŋrù ce a m ba běe bgòrgǒr à rla' anà, wowèe a fa ŋgɛ' nè Pol ba Bànabàs, a juu wowèe efa yap ŋgòŋ. 51Pol wèe a ka' ce dù, a kashi nfʉ̀nfʉ efa map mkùu nè wowèe, a du à rla' Ìkonìyòm. 52Bèe ce a m byemi nè Jisòs à rla' Antìyòk a m ku lu'shi sê, a ruu nè Yʉ' Rara.

Currently Selected:

Ñwaè' Mfaè' Ñgaâa Ntuu Jisoès 13: LNT

Highlight

Copy

Compare