Ñwaè' Mfaè' Ñgaâa Ntuu Jisoès 12

1À m ba à nfè' anà ŋkʉʉ Hɛròd à koo ŋgǎa cor mo' a ce fa wowèe ŋgɛ'. 2E m yʉ Jɛms ce e m ba nfʉr Jǒn nè kàafà'. 3E ka' yɛ enɛ e gèe wa' nyor à boŋ Jûs, e koo Pità foŋ. Ca yi m koni à nfè' ce a m ce ye Ŋkǎ' brɛ̌d ce a lɛ̀ yes njo ka'. 4E ka' koo ye, a fa ye mbe shaŋ. E m fa ye mbà mmbo bsoogɛ̀ ce a m ba bkʉr kyèe, bsoogɛ̀ a ba mbe kʉr e mo'sir bèe ŋkyèe, a ce kè'ni ye. E m ce kwà'shi enɛ a be ye Ŋkǎ' càasi-mndap tɛ e ka' fʉr ye, sa' à mʉ̀ bèe. 5E m ku lɛ Pità mbe shaŋ; yi ka' ba wa'a, ŋgǎa cor a ce loo nè ye nè mini-ŋwɛ̀. 6À m ba nètʉ' ce tʉ̀' be raa tɛ Hɛròd fʉr ye embe shaŋ sa' nà, Pità à noŋ mbetar bsoogɛ̀ a baa, a cʉʉ ye nè bkwǎŋ bbaa à mkoo. Bsoogɛ̀ ce a m ce kè'ni shaŋ a m tɛɛ à cǔu ŋka' shaŋ. 7Ka' cu ncìndap Tata Nyʉ̀ à nyɛ̂ɛ, rraa li raa mbe mʉ̀ shaŋ; e lipshì Pità nè bo à gee nyor, a yɛɛ ye efa mmirlò a laa enɛ̂, “Nàti mbekì cɛrcɛr.” Bkwàŋ cà vi m gwèŋger efa yě mkoo. 8Ncìndap Nyʉ̀ à laa nè ye enɛ̂, “Kupshi wo bcɛ̀', yar wo blaba'.” Pità à gee wa'a. E ker laa nè ye enɛ̂, “Yar wo mŋgàbʉlà, vʉ a mɛ̌ mbùu.” 9Pità à fʉʉ a du a yě mbùu a ke' riŋ enɛ yuu ce ncìndap Nyʉ̀ à m gèe anà yi m ba mini ka'. E m kwà'shi enɛ e ku yɛ yɛ. 10Wowèe a ka' càa bsoogɛ̀ ce a m tɛɛ entòmbì ker ba bèe embenjì mo, a ba' à cùu ŋka' bkwàŋ ce a càa mbo niŋ ba à mʉ̀ la', yi mʉ'tì nè yi bo, wowèe a fʉ̂ʉ, a ka' ce jɛ̀r njep nduunjì mo', ncìndap Nyʉ̀ à ma'shì ye kǎŋ mo'sir, a dû.

11Bfee Pità vi ka' kʉti mbo, e laa enɛ̂, “Mɛ̀ rìŋ sè'ni nè mini-ŋwɛ̀ enɛ Tata à tuusi yì ncìndap e fʉr mɛ̀ embà mmbo Hɛròd, a ker fʉr mɛ̀ efa ŋgɛ' ce Jus a m ce kè' enɛ e ba koni mɛ̀.” 12Pità à ka' rìŋ wa'a, a nati a du mbe ndàp mbe Mɛ̀ɛri, ma yì Jǒn. A m ce too rlii Jǒn mo' enɛ Mâk. Bèe magòr a m kaari mbo a ce gèe rloo. 13E ka' kùushi kèŋ enjep mbè, muunje ce e m ce fà' mbe ndàp anà ce a m ce too ye enɛ Rudà, a yu' a vʉ à ryu'shi enɛ ce kùu nda lɛ. 14E ka' yu' njèndoŋ Pità, rìŋ, a lu'shi sê, a mʉ' kèŋ ka', a caŋ a kʉti ba mbe ndàp, a laa enɛ̂, “Pità tɛɛ njep ncǔu ŋka'.” 15Wowèe a laa nè ye enɛ̂, “Tu yi kar wɛ̀ embo.” Muu anà à laa tatap se enɛ yi yu mini wa'a. Wowèe a laa enɛ̂, “Yu ncìndap Nyʉ̀ ce e ke kè'ni Pità.” 16Pità à ku ce kùushi kèŋ; wowèe a ka' mʉ̀', a yɛ ye, a bɛɛŋger sê. 17E ka' nàa bo mbekì enɛ wowèe a cu mʉnyaŋ, a suŋ wowèe àmbò Tata à fʉr ye embe shaŋ. E ka' mìsi, a laa enɛ̂, “Suŋ nè buu ca nè Jɛ̂ms, ba bfʉr mo' ce a yu ŋgǎa rbyemì.” E laa wa'a, a fʉʉ, a du à dǐ' mo'.

18Tʉ̀' à ka' raa, bjep vi ba à mʉ̀ bsoogɛ̀ se njobè' wowèe a m rìŋ yuu ce yi m koni Pità ka'. 19Hɛròd à ka' ròo ye yɛ ka', a bipshi nè bsoogɛ̀ ce a m ce kè'ni ye nà. E ka' bipshi riŋ dì' e yu ka', a laa enɛ a yʉshi wowèe. E ka' làa wa'a, a natǐ à ŋgǒŋ Jùdiyà a du à rla' Sisàriyà, a cu àfo.

20Ntee yi m yaŋ Hɛròd nè běe à rla' Tayà ba Sidòn wowèe a natì àbee a du à ryɛ ye. Wowèe a ka' dù bà', a loo Blǎstòs ce e m ba ncìndap embe nto', a du a yɛ ŋkʉʉ a laa nè ye enɛ a wowèe a nashi buu, cu nè cumʉnyaŋ-ŋwɛ̀. A m làa wa'a njobè' yap to' yi m ce koni byee ba ese to' yǐ ŋkʉʉ anà. 21Nòŋ ce wowèe a m lɛ̀ yi ka' ghɛɛ, Hɛròd à yar bcɛ̌' kʉʉ a cu mbe kàbàrà', a laa nè wowèe. 22Wowèe a m fuŋ enɛ̂, “Cena yu ba njèndoŋ Nyʉ̀, a yì ŋwɛ̀ ka'.” 23A ka' làa wa'a, ncìndap Tata Nyʉ̀ à tʉʉ ye nè yaŋ kǎŋ mò'sir njobè' e m kù'si Nyʉ̀ ka'; mghòghò mi ye ye, e kwê.

24Blǎa Nyʉ̀ vi m dù kùntombì, bèe magòr à yu' a byemi. 25Bànabàs ba Sol a ka' mìsi yuu ce wowèe a m dù à rgèe à rla' Jɛ̀rusalɛ̀m, a kʉti. A ka' ce kʉti, a lor Jòn Mâk.

Currently Selected:

Ñwaè' Mfaè' Ñgaâa Ntuu Jisoès 12: LNT

Highlight

Copy

Compare