Ñwaè' Táèsaèlonikaè Ce Embenjïì 2
2
1Bfʉr wêr, à ka' ba àmbò rvʉ̀ Tata Jisos Krâis, ker ba nfè' ce sèe Jisòs wèe be tarte, wèr ce làa nè wèe enɛ, 2ntee yi fa yàŋse bu' wèe, kɛ̀ wèe fa yàŋse tù'te njobè' bèe mò' a ce làa enɛ nòŋ Tata anà yi yu àtʉtʉ ka'. Seemò' kɛ̀ à làa ŋwɛ̀ ce e ce suŋ bèe buu ce Yʉ' Rara yi gèe e riŋ ɛ̀, kɛ̀ ŋwɛ̀ ce e ce fè'shi ba blǎa Nyʉ̀ ɛ̀, kɛ̀ bèe mo' a ce làa enɛ wèr à saŋ ŋwà' ɛ̀, 3wèe fa mà'shi tɛ ŋwɛ̀ mò' bo' wèe ka' à njɛ̌ɛ kɛ ka'. Tɛ nòŋ ca yi ka' ba, ntèetu ce àlʉ̀simbùu be ba, tɛ ŋwɛ̀ ce e bàa Krǎis vʉ̂. Ca yu ŋwɛ̀ ce e bʉ yi wɛɛ. 4E be nàa tu enɛ e càa buu wɛɛwɛ ce bèe a ce gʉ'shi àgho enɛ a Nyʉ̀. E gèe wa'a, du niŋ mbe Ndàp Nyʉ̀, cu mbo, lor yi tu enɛ a ye Nyʉ̀. 5Mbò wèe bii kuushi enɛ à m ba mbe nfè' ce sèe à m ba nà, mɛ̀ suŋ wèe buu ca a? 6Wèe à rìŋ yuu ce yi gèe enɛ ŋwɛ̀ anà fa vʉ̀ sè'ni ka', tɛ e bo lò vʉ̀ ba à nfè' yì. 7Bsàrbuu vi yu àgho wɛɛ, a ka' ba ba à bsʉ̀ti. Ŋwɛ̀ ce e gèe bsàrbuu anà vi ke' ce yɛɛti àwaŋ ka' yu àgho. Be ba à nfè' ce a fʉr ŋwɛ̀ anà, 8tɛ ŋwɛ̀ bsàrbuu ca yɛɛti àwaŋ. E yɛɛti àwaŋ tɛ Tata Jisos Krǎis lo vʉ̀ nè ŋger-ŋwɛ̀, fyɛp ye nè mbɛp, tɛ e kwe, mìsi bʉ à nòŋ anà. 9Ŋwɛ̀ bsàrbuu anà be vʉ̀ nè ŋger ce yi lò ese Satàn, gèe ku' mncòo ba buu bbɛ̀ɛ ce bo' bèe àgho enɛ a ku'si ye. 10E be gèe ku' buu gòr se tɛ e bo bo' bèe ce a ce bʉ àgho. Wowèe a ce bʉ njobè' a m kani à rkòŋ mini ce e m ba gèe tɛ wowèe a lûŋ. 11À ka' ba njobè' wowèe a m kòŋ mini ca ka', Nyʉ̀ ce gèe wowèe a ce jep, a ce koŋ ba mnde'. 12Nyʉ̀ ce gèe wa'a, tɛ mnsa' mi bo koo bèe ce a byemi yuu mini ka', a ce yu' yap rbòŋ ba nè bsàrbuu.
13À ka' ba yi àmbò wèe, bfʉr wêr, Tata Nyʉ̀ à kòŋ wèe. Yu yer dì' à ryòŋshi Nyʉ̀ à njɛ̀ɛ bèe ce wèe yu njobè' Nyʉ̀ à m ce wèe efa rkɛ̀' tɛ wèe bo koni ryòŋ. Wèe à m koni ryòŋ ca njì enjep yʉ' Nyʉ̀. Yi m gèe wèe à ba brara, ker byemi blǎa mini ce wèe à m byemi àgho. 14Nyʉ̀ à m kɛ' wèe, wèe à konì ryòŋ ca à nfè' ce wèr à m fè'shi Nsuŋ Mbòŋmboŋ nè wèe nà. E m kɛ' wèe tɛ wèe bo sa' fòo ce yu fòo Tata Jisòs. 15Yi ka' ba wa'a bfʉr wêr, tɛɛ nè tatap, ku lɛ ba ryɛ'nì ce wèr à m yɛ'ni wèe a ker saŋ nè wèe nà nje tù.
16-17Tata Jisos Krǎis ba Nyʉ̀ ce e yu yìsèe Tâ, fa wèe cumʉnyaŋ. Nyʉ̀ à m kòŋ sèe a fa sèe ŋger nfesè, a ker ka'ni sèe buu ce sèe à rìŋ enɛ vi be ba. E m gèe buu ca njo' yi ntee bòŋboŋ ce e m tʉr nè sèe. M ce loo mɛnɛ Nyʉ̀ ca fa wèe cumʉnyaŋ, gee tɛ wèe tɛɛ tatap, ce gèe ba buu bbòŋboŋ kèr ce làa ba buu bbòŋboŋ.
Currently Selected:
Ñwaè' Táèsaèlonikaè Ce Embenjïì 2: LNT
Highlight
Copy
Compare
Share
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.
