Ñwaè' Táèsaèlonikaè Ce Entombïì 4

1Bfʉr wâ, wèr ker tʉr yuu mo' à rkyèse mbendù buu ce wèr à suŋ wèe wɛɛ na. Wèr ce bu' mmbo nè wèe à rlii Tata Jisòs enɛ wèe ce gee ba ŋgèe ce Nyʉ̀ à kòŋ, àmbò wèe ce gèe nà, ke' borni à nfè' mò' ka'. Njɛ̀ɛ ŋgèe ca a yì ce wèr à m yɛ'ni wèe. 2Wèe rìŋ ncep ce wèr à m fa nè wèe à rlii Tata Jisòs nà. 3Yuu ce Nyʉ̀ ce kòŋ ese wèe yi yu enɛ wèe cu ba njɛ̀ɛ rcu ce li ce dùŋshi enɛ wèe à fa wee mntee nè Nyʉ̀. Wèe fa ba ŋgǎa mkɛ'ni ka'. 4Ŋwɛ̀ wɛɛwɛ efa wěe mʉ cep yi tu tɛ e bo gèe ba yuu ce Nyʉ̀ kòŋ enɛ e gee nè yì nyor, à ba yuu ce bèe wɛɛwɛ a ce yu' rbòŋ àgho. 5Ŋwɛ̀ fa kù lòr njeŋwɛ̀ ba njo' rbòŋ ce a ye a be yu' mbe bkuu, àmbò bèe ce a rìŋ Nyʉ̀ ka' a ke gèe nà ka'. 6Ŋwɛ̀ fa gèe yuu bebep nè nfʉr yì à njɛ̀ɛ yuu ca ka'. Wèr à m cìisi nè wèe wɛɛ enɛ Tata Jisòs be kè kʉsi mcucu' nè bèe ce a ce gèe njɛ̀ɛ buu ca. 7Nyʉ̀ à m kɛ' sèe tɛ sèe bo ce gèe ba njɛ̀ɛ ŋgěe bebep ca ka'. E m kɛ' sèe tɛ sèe bo cu ba rcu rrara. 8Banɛ ŋwɛ̀ ce e ka' kani ncep ca, banɛ ŋgàŋ à kani ba ŋwɛ̀ ka', e kani ba Nyʉ̀ ce e fa wèe yi Yʉ' ce yi yu rara.

9À ka' ba àmbò rkòŋnì ce e nè nfʉr mò' ce e byemi nè Jisòs, mbùu mò' ker ba nè wèr à rsaŋ nè wèe àmbò li ka' njobè' Nyʉ̀ à yɛ'ni wèe njɛ̀ɛ rkòŋnì ca wɛɛ. 10Wèe à dùŋshi njɛ̀ɛ rkòŋnì ca nè bfʉr wee wɛɛwɛ ce a yu à ŋgǒŋ Mɛ̀sɛ̀donìyà. Bfʉr wâ, wèr ce tapsi wèe enɛ wèe gee tɛ njɛ̀ɛ rkòŋnì ca li du ba kùntombì. 11Ghèter nè cu ba rcu ce li yu yɛɛnì. Ŋwɛ̀ fa ce fʉ̀ʉshi cùu à buu bèe mò' ka'. Ŋwɛ̀ wɛɛwɛ ce fa' yuu ce yi be jà' ye. Wèr à m suŋ wèe wɛɛ enɛ wèe gee wa'a. 12Wèe ka' gee wa'a bèe ce a yu ŋgǎa rbyemì ka' nà, a vʉsè wèe, wee wèe ker ke' enɛ ŋwɛ̌ jɛɛ be fà' tɛ wèe ka' ye ka'.

13Bfʉr wêr, wèr ce kòŋ enɛ wèe riŋ yuu ce yi be lò koni bèe ce a kweŋger wɛɛ nà, fà dì' wèe bo ce koosimnse àmbò bèe ce a ke kè' rcu ce nfesè ka' nà ka'. 14Àmbò sèe à byemi enɛ Jisòs à m kwe a fʉʉ efa rkwe, sèe à byemi foŋ enɛ e ba à nfè' ce e vʉ̀, tɛ Nyʉ̀ fʉr bèe wɛɛwɛ ce a m byemi nè Jisòs nà efa rkwe, àmbò e fʉr Jisòs efa rkwe nà. 15Wèr ce suŋ wèe ba yuu ce Tata à làa. Yi yu enɛ be ba à nfè' ce Tata à vʉ̀, sèe ce sèe bii btèe sèe ke' du yɛ ye entombì nè bèe ce a kweŋger ka'. 16Tata be kè sùu embe bùu, tɛ bèe a yu' ma njèndoŋ àmbò e waa, tɛ ncìndap Nyʉ̌ ŋgòr waa foŋ, tɛ rsòŋ Nyʉ̀ li lâa. Be kè ba à nfè' anà tɛ bèe ce a m byemi nè Jisos Krǎis a ka' kweŋger, a fʉʉ efa rkwe wɛɛ, 17tɛ sèe ce sèe cu btèe a ba' à nfè' anà, ka' tarshi nyor sèe wowèe mbe mʉ̀ mmbà', dù koni Tata mbekì tɛ sèe wowèe cu nfesè. 18Banɛ wèe lor blàa ca, gee tɛ mntee bèe efa wěe mʉ vi fʉte.

Currently Selected:

Ñwaè' Táèsaèlonikaè Ce Entombïì 4: LNT

Highlight

Copy

Compare