Ñwaè' Beâe Koreèn Ce Entombïì 2

1Bfʉr wâ, à m ba mbe nfè' ce mɛ̀ m vʉ̀ yɛ wèe tɛ m bo fè'shi buu ce Nyʉ̀ à m gèe wèr à riŋ kuu Jisos Krǎis nà, mɛ̀ vʉ a ke' ce laa ba blàa ce bèe bo vʉse ka' kɛ̀ fè'shi ba nè bfee ŋwɛ̀ tɛ wèe ka' byemi ka'. 2Mɛ̀ m làa enjep mɛ̌ ntee enɛ m be kù fè'shi ba àmbò Jisos Krǎis cà'cà', suŋ wèe àmbò a m taa ye mbe kìntaa. 3Mɛ̀ m ba a wěe mʉ, a go'sî, a ce wɛp buu, ntee yi ce kàŋ mɛ̀. 4Mɛ̀ m ce fè'shi blàa ca nè wèe, a ke' ce fè'shi ba nè bfee enjep ŋgòŋ na ka'. Mɛ̀ m ce fè'shi ba nè ŋger Yʉ' Nyʉ̀ ce yi m gèe wèe à ka' riŋ weenɛ blàa ca vi yu mini. 5Mɛ̀ m gèe wa'a njobè' mɛ̀ m kòŋ mɛnɛ wèe byemi ba njo' ŋger Nyʉ̀, ke' ba ba njo' bfee ŋwɛ̀ ka'.

6Ka' mɛ̀ m ce fè'shi ba nè bfee ŋwɛ̀ ka' wa'a, wèr ce fè'shi blàa bfee nè bèe ce a bi njep mʉ̀ lap rbyemì. Blàa ca vi lò enjep ŋgòŋ na kɛ̀ ese bèe ce a ce sa' ŋgòŋ ca ka'. Yap ŋger yi be mì. 7Bfee Nyʉ̀ ce wèr ce làa na yu ba vi bfee ce vi m ba à bsʉ̀ti, bèe a m rìŋ ka'. Tɛ Nyʉ̀ ka' kè gèe ŋgòŋ ca, e m kwà'shi wɛɛ, a lɛ enɛ e be gèe buu ca tɛ sèe bo tʉr ŋgʉ̀' mò' efa yi fòo. 8Bèe ce a ke sa' ŋgòŋ ca a m rìŋ wa' ka'. Wowèe a m ba riŋ a m ba taa Tata ce e yu ŋwɛ̀ fòo mbe kìntaa ka'. 9A saŋ mbe Ŋwǎ' Nyʉ̀ enɛ̂,

“Buu ce ŋwɛ̀ à m be yɛ kɛ̀ yu' ka',

ker ba buu ce ŋwɛ̀ à m be kwa'shi ka',

Nyʉ̀ à kupshi vi, a lɛ nè bèe ce a kòŋ ye.”

10Nyʉ̀ à gèe sèe à riŋ buu ca njì enjep yi Yʉ'. Yʉ' Nyʉ̀ yi rìŋ buu wɛɛwɛ, a riŋ ka' buu Nyʉ̀ ce vi yu à bsʉ̀ti. 11Ŋwɛ̀ mò' e ke rìŋ yuu ce ŋwɛ̀ mò' ce kwà'shi ka'. E ke kǔ rìŋ ŋwɛ̀ yuu ce yi yu njep yě ntee. Yi ku ba foŋ enɛ àde' ŋwɛ̀ mò' riŋ yuu ce Nyʉ̀ ce kwà'shi ka'. Ku ba ba Yʉ' Nyʉ̀ ce yi rìŋ yuu ce Nyʉ̀ ce kwà'shi. 12Yʉ' ce sèe à koni yu yʉ' enjep ŋgòŋ na ka'. Yʉ' ce sèe à koni yu yʉ' ce yi lò ese Nyʉ̀. Yʉ' ca yi ke gèe sèe riŋ buu ce Nyʉ̀ à fa nè sèe.

13Yi ka' ba wa'a, àmbò wèr ce suŋ bèe buu ca, wèr ce suŋ ba buu ce bèe a yɛ'ni wèr nè wap bfee ka'. Wèr ce suŋ ba buu ce Yʉ' Nyʉ̀ yi gèe wèr à rîŋ. Wèr ce yɛ'ni buu ce à yʉ' nè bèe ce a tʉr Yʉ' Nyʉ̀ njep wǎp mntee. 14Ŋwɛ̀ ce Yʉ' Nyʉ̀ yi yu njep yě ntee ka' e ke byemi buu ce vi lò ese Yʉ' Nyʉ̀ ka' njobè' buu ca yu nè ye àmbò blʉr wa'a, àde' e riŋ buu ca ka' njobè' ku ba ba ŋwɛ̀ ce Yʉ' Nyʉ̀ yi yu njep yǐ ntee ce àde' e riŋ vi. 15Ŋwɛ̀ ce Yʉ' Nyʉ̀ yi yu njep yě ntee, e ke fyɛ' buu wɛɛwɛ, riŋ mbùu efa gho, ka' bèe a fyɛ' ye, riŋ njɛ̀ɛ ŋwɛ̀ ce e yu ka' wa'a. 16A saŋ mbe Ŋwǎ' Nyʉ̀ enɛ̂,

“Ŋwɛ̀ mò' rìŋ ntee Nyʉ̀ ka'.

Ŋwɛ̀ mò' yu ce àde' e cep Tata Nyʉ̀ ka'.”

À ka' ba àmbò sèe, sèe tʉr ntee Jisos Krâis.

Currently Selected:

Ñwaè' Beâe Koreèn Ce Entombïì 2: LNT

Highlight

Copy

Compare