Ñwaè' Beâe Koreèn Ce Entombïì 1

1Ŋwà' ca ce saŋ mɛ̌ Pôl, ce Nyʉ̀ à ce mɛ̀ enɛ m ba ŋwɛ̀ ntuu nè Jisos Krâis. Wèr Sòstɛnì ce e yu nfʉr yìsèe ce cà'ni wèe. 2Wèr ce saŋ ŋwà' ca nè ŋgǎa cor ce a yu à rla' Korèn ce a Jisòs wèe a yu à ŋwɛ̀ mò'sir. Nyʉ̀ à ce wèe efa mʉ̀ bèe enjep ŋgòŋ na tɛ wèe ba yì bèe. Wèe yu àbee wèe bèe Nyʉ̀ ce a yu à bdì' wɛɛwɛ a ce loo nè yìsèe Tata Jisos Krâis. E yu Tata nè wowèe àmbò e yu nè sèe nà. 3Nyʉ̀ ce e yu yìsèe Tâ, ker ba Jisos Krǎis ce e yu Tata nè wèr foŋ, tʉr wèe à ntee bòŋboŋ, ker fa wèe cumʉnyaŋ.

4Mɛ ke yòŋshi Nyʉ̀ a wěe btu à nfè' wɛɛwɛ njobè' e ghòni wèe embenjì Jisos Krâis. 5E ghòni wèe à mnduunjì jɛɛ jɛ̀ɛ jɛɛ, a gee wèe à tʉr bfee bbòŋboŋ, a ker fa wèe ŋger à rfè'shi vi blàa. 6Nsuŋ àmbò Jisos krǎis à taa mŋgàŋ a wěe mʉ. 7Yi ka' ba wa'a, wèe à buu mo' efa buu wɛɛwɛ ce Yʉ' Tata Nyʉ̀ yi ke fa nè bèe ka', àmbò wèe cu sè'ni ce kè' nfè' ce wèe be kè yɛ Jisos Krǎis na. 8Tata Nyʉ̀ be fa wèe ŋger tɛ wèe tɛɛ tatap bà' àlʉ̀simbùu fà dì' wèe bo kè gwè mnsa' à nòŋ ce Jisos Krǎis à vʉ̀ ka'. 9Nyʉ̀ yu mini. Yu ye ce e kɛ' wèe enɛ wèe bo ba àbee wèe muu yì ce Jisos Krǎis ce e yu Tata nè sèe.

10Bfʉr wâ, mɛ̀ loo wèe à rlii yìsèe Tata Jisos Krâis, enɛ wèe ba cǔu mo'sir. Wèe fa tʉr ŋgàpni a wěe mʉ ka'. Wèe ba àbee à yuu wèe ce kwà'shi ker ba à yuu wèe ce gèe. 11Bfʉr wâ, mɛ̀ làa wa'a njobè' bèe mo' embe ndàp Klǒo a suŋ mɛ̀ enɛ wèe yu cǔu mo'sir ka'. 12Mɛ̀ yu' mɛnɛ bèe mo' efa wěe mʉ a ce làa enɛ̂, “M yu ya wèr Pôl”, mò' enɛ̂, “M yu ya wèr Àpolòs”, mò' enɛ̂, “M yu ya wèr Sɛfàs”, mò' enɛ̂, “M yu ya wèr Jisos Krâis.” 13Wà' wèe à gàp Jisòs a? Wà' ŋwɛ̀ ce a m taa mbe kìntaa njo' wèe à m ba Pol a? Wà' a m bàptir wèe à rlii Pol a? 14Mɛ̀ yòŋshi Nyʉ̀ njobè' mɛ̀ m bàptir ŋwɛ̀ mò' efa wěe mʉ caa efa Krǐspòs ba Gayòs ka', 15fà dì' ŋwɛ̀ mò' bo làa enɛ mɛ̀ m bàptir ye a mɛ̌ rlii ka'. 16Mɛ̀ kuushi enɛ mɛ̀ m bàptir bèe embe ndàp Stɛfɛnàs foŋ. Mɛ̀ kwà'shi mɛnɛ mɛ̀ m ker baptir ŋwɛ̀ mò' caa efa bèe ca ka'. 17Jisos Krǎis à m tuu mɛ̀ enɛ m du baptir bèe ka', e m tuu mɛ̀ ba enɛ m du fe'shi Nsuŋ Mbòŋmboŋ. Mɛ̀ m ce fè'shi nsuŋ ca ba nè bfee wa ka'. Mɛ̀ m gèe wa'a tɛ ŋger efa rkwe ce Jisos Krǎis à m kwe mbe kìntaa yi bo buu efa ryɛɛtì ka'.

18Yi yu enɛ nsuŋ kuu rkwe Jisos Krǎis embe kìntaa yu blʉr nè bèe ce a ce bʉ njep mʉ̀ buu bbebep. À ka' ba yi àmbò sèe ce sèe ce lùŋ, nsuŋ ca yu ŋger Nyʉ̀. 19A saŋ mbe Ŋwǎ' Nyʉ̀ enɛ̂,

“M be gèe tɛ bfee ŋgǎa bfee vi bʉ à cicì.

M be gèe tɛ bèe ce a feese, a jep.”

20Banɛ ŋgǎa bfee enjep ŋgòŋ na a yu ba fɛ sè'ni? Ŋgǎa ŋwà' enjep ŋgòŋ na a yu ba fɛ? Ŋgǎa mnsɛr enjep ŋgòŋ na a yu ba fɛ? Mbò Nyʉ̀ à gèe bfee enjep ŋgòŋ à kʉtì ba blʉr a? 21Bfee vi Nyʉ̀ vi yu jɛɛ. E m gèe enɛ bèe a riŋ ye ba nè bfee wap ka'. E m kòŋ enɛ e gee bèe ce a byemi nè ye a luŋ njì enjep rfè'shì ce bèe a lòr à yuu cicì nà. 22Jus a ròo à ryɛ ncòo ka' byemi yuu ce bèe a làa, Grěk a ce ròo yap ba bfee. 23Wèr ce fè'shi ba àmbò Jisos Krǎis ce a m taa mbe kìntaa. Rfè'shì ca li ce jepsi Jus efa rbyemi nè ye, à ba blʉr nè bèe enje jɛɛ. 24À ka' ba yi nè bèe ce Nyʉ̀ à kɛ', kɛ̀ yu Jus ɛ̀, kɛ̀ yu Grěk ɛ̀, wowèe a rìŋ enɛ ŋger Nyʉ̀ yi yɛɛti, bfee Nyʉ̀ vi yɛɛtì foŋ embenjì Jisòs Krâis. 25Yuu ce bèe a ce kwà'shi enɛ yi yu blʉr à ŋgʉ̀' yì Nyʉ̀ nà, bfee vi yu njo a caa bfee ce bèe a tʉr, yuu ce a kwà'shi enɛ a bgò'sì à ŋgʉ̀' yì Nyʉ̀ nà, ŋger yi yu njo a caa ŋger ce bèe a tʉr.

26Bfʉr wâ, fyɛ' ka nè njɛ̀ɛ bèe ce wèe à m ba à nfè' ce Nyʉ̀ à m kɛ' wèe enɛ wèe ba yì bèe. Wèe ka' fyɛ' a wěe mʉ wèe yɛ enɛ bèe ce ŋgòŋ ca yi m lòr enɛ a tʉr bfee a yu gòr ka'. Bèe ce ŋgòŋ ca yi m kwà'shi foŋ enɛ a yu běe bgòrgòr a ker tʉr mnta' bgòrgòr a yu gòr ka'. 27Nyʉ̀ à ce ba bèe ce bèe enjep ŋgòŋ na a ce kwà'shi enɛ a yu blʉr tɛ rìtu yi bo koo bèe ce a ce kwà'shi enɛ a yu ŋgǎa bfee. E m ce bèe ce bèe enjep ŋgòŋ a kwà'shi enɛ a yu bgò'sì tɛ rìtu yi bo koo bèe ce a tʉr ŋger. 28E m ce buu ce bèe enjep ŋgòŋ na a jàasi a lor à yuu cicì, tɛ e bo sùusi mkwà'shì ce bèe a tʉr à buu wɛɛwɛ ce a kwà'shi enɛ vi yu btatap se nà njep nshè. 29Yi yu wa'a, fà dì' ŋwɛ̀ mò' bo nàa nyor à bsii Nyʉ̀ ka'. 30Nyʉ̀ a ŋwɛ̀ ce e gèe wèe Jisos Krǎis wèe à ka' ba àbee. E m gèe enɛ Jisos Krǎis fa sèe bfee bbòŋboŋ. E ce yɛ sèe àmbò bèe ce a cu rcu yɛɛnì, a ba brara ba njì enjep Jisos Krâis. Ku ba njì enjep Jisòs ce e tee sèe efa ŋgɛ' buu bbebep. 31A mbùu ce a saŋ mbe Ŋwǎ' Nyʉ̀ enɛ ŋwɛ̀ ka' ce kòŋ enɛ e naa nyor, banɛ e naa ba à yuu ce Tata Nyʉ̀ à gèe nè ye.

Currently Selected:

Ñwaè' Beâe Koreèn Ce Entombïì 1: LNT

Highlight

Copy

Compare