HOSEA 4
4
Setšhaba se dira dibe ka boomo
1Hee lena Baisiraele! Kwang lentšu la Morena! Gobane Morena o ne kgang le beng ba naga ye, ka go re nageng ye go se therešo, go se botho, go tseba Modimo. 2Tše di lego gona ke maroga le maaka le polao le bohodu le go otswa. Ba thuba nywako, mme ba hlatlamanya melato ya madi. 3Molato ke wona woo ge naga e lla, ge baagi ba notlega, ge go fela diphoofolo tša nageng le nonyana sebakeng, le dihlapi tša lewatle.
4Go bjalo; go se be e a ganetšago, go se be le a kgopetšago; gobane setšhaba sa geno eke se ganetša baperisita. 5Bjale o tlo kgopša e le mosegare; le mmoni o tlo kgopša nago e le bošego; mme mmago ke tlo mo fediša. 6Tšhaba sa ka se feletše ka go hloka tsebo, ka gobane tsebo e nyaitšwe ke wena. Le nna ke tlo go nyatša, wa se hlwe o eba moperisita wa ka. Le bana bago ke tlo ba lebala, ka gobane o lebetše molao wa Modimo wa gago.
7Mola ba fela ba ata, ba be ba atiša le dibe tša go ntshenya; bjalo letago la bona ke le fetola kgobogo. 8Ba phela ka dibe tša setšhaba sa ka; ba rata ge batho ba oba molato. 9Setšhaba le moperisita ba tlo swana ge ke latiša tsela tša bona, ke ba otla ke eya ka tiro tša bona. 10Ba tlo ja mme ba se khore; ba tlo otswa ba se ate: gobane ba lahla Morena, ga ba mo re selo.
11Dipelo di senywa ke bootswa le mabjalwa le sedila. 12Tšhaba sa ka se rapela kwata ya sona; se laiwa ke diphatana tša sona; ke moya wa bootswa o se timetšago, ba hlanoga ba lahla Modimo wa bona. 13Ba iša didimo dintlheng tša dithaba, ba tupiša diorelo godimo ga meboto, ba dira tšeo meruleng le merekureng le mo metholong, ka ge meriti ya gona e le e mebotse.
Ke tšona tše di otswišago barwedi ba lena le betši ba lena, ya ba dinonyana. 14Barwedi bao ba lena le betši ba lena, nka se sole bona; ka gobane ke bolena le ngwegago le diotswa, le iša didimo le na le basadi ba dinonyana; mme setšhaba se hlokago mogopolo se wa ka tšona.
15Ge wena Isiraele o šetše o le seotswa, a Juda a se tsene molatong! Le se ke la ya Giligala! Le se ke la rotogela Bethe-Abene! Le se ke la ena le re: Ka bophelo bja Morena! 16Ge Isiraele a etša sethole se sešo sa thapa, a Morena o tlo ba fudiša boka dikwanyana molaleng? 17Efuraimi o šetše a gwerane le medimo ya diswantšho; mo leseng. 18Bohori bja bona bo šetše bo befile; ba ile le bootswa; thwadi mo go bona ke ba ratago tša dihlong. 19Ledimo le tlo ba tšea ka diphego tša lona; mme didimo tša bona di tlo ba leša dihlong.
Currently Selected:
HOSEA 4: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.