MMOLEDI 3
3
Tšohle di na le mabaka a tšona. Go tiile tša Modimo
1Tšohle di na le mohla wa tšona, le tirwa tša ka tlase ga letšatši di na le mabaka a tšona. 2Go tswalwa go na le mohla wa gona, le go hwa go na le mohla wa gona. Go bjala go na le mohla wa gona, le go tomola go na le mohla wa gona. 3Go bolaya go na le mohla wa gona, le go alafa go na le mohla wa gona. Go phušola go na le mohla wa gona, le go aga go na le mohla wa gona. 4Go lla go na le mohla wa gona, le go sega go na le mohla wa gona. Go golola go na le mohla wa gona, le go bina go na le mohla wa gona. 5Go šwalalanya maswika go na le mohla wa gona, le go kgobela maswika go na le mohla wa gona. Go atlana go na le mohla wa gona, le go gerulana go na le mohla wa gona. 6Go nyaka go na le mohla wa gona, le go tšitlanya go na le mohla wa gona. Go boloka go na le mohla wa gona, le go lahla go na le mohla wa gona. 7Go kgaola go na le mohla wa gona, le go hlomeletša go na le mohla wa gona. Go homola go na le mohla wa gona, le go bolela go na le mohla wa gona. 8Go rata go na le mohla wa gona, le go hloya go na le mohla wa gona. Go lwa go na le mohla wa gona, le go boelana go na le mohla wa gona.
9Modiri o holegang ka go itapiša? 10Ke bone mediro ye Modimo a e neetšego bana ba batho, gore ba itapiše ka yona. 11Tšohle o di dirile gore di kgahle ka mohla wa tšona; le tša neng le neng o di beile dipelong tša bona. Fela, tiro ye yena Modimo a e dirago, mathomo le mafelo a yona, motho ga a e lemoge. 12Se ke se tsebago ke gore ga go se se botse mo go bona, ge e se go thaba le go dira tše botse ge ba sa phela. 13Le gona, ke neo ya Modimo, ge motho a eja, a enwa, mme a bona tše dibotse ka tapišo tšagwe tšohle.
14Ke tseba gore tšohle tše Modimo a di dirilego, e tla ba tša neng le neng; ga go na se se eketšwago le se se fokotšwago. Modimo o dirile fao gore ba boife yena. 15Tše di lego gona ke tša kgale; le tše di tlogo ba gona ke tša kgale. Modimo o fela a tsoša tše di bego di lebetšwe.
16Le gona ke bone ge fa tlase ga letšatši bakeng sa molao go le bokgopo, bokgopo bo tšere baka sa toko. 17Mo pelong ya ka ka re: Modimo o tlo ba a ahlola moloki le yo kgopo. Gobane o beetše taba tšohle le ditiro tšohle lebaka la tšona. 18Nna pelong ya ka ka re: Go bjalo, gore bana ba batho Modimo a ba leke, ba tle ba ipone gore ba etša diphoofolo. 19Gobane tše di tlelago bana ba batho, di tlela le diphoofolo; go hwa go a swana, go buša moya go a swana; ga go na se motho a fetago phoofolo ka sona, gobane tšohle ke lefela. 20Tšohle di leba felo gotee; tšohle di tšwa leroleng; mme tšohle di boela leroleng. 21Ke mang a tsebago ge moya wa bana ba batho o rotogela kua godimo, ge moya wa phoofolo o fologela tlase lefaseng? 22Ke mo ke bonego go se se kaone, ge e se ge motho a thabela tiro tša gagwe; gobane ke yona kabelo ya gagwe; gobane ke mang a tlogo mo iša mo a tlogo bona tše di tlogo hlaga ge a fulere?
Currently Selected:
MMOLEDI 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.