MMOLEDI 2
2
Go thabela lefase, le tše o itirelago tšona, ke lefela
1Mme nna pelong ya ka ka re: Eriye, ke leke go phela ka menate, o bone tše botse! Ka hwetša le tšona e le lefela. 2Lesego ka re ke go gafa; lethabo ka re le holang? 3Ka eleletša ka re ke babalele mmele wa ka ka sebela; ka re pelo ya ka yona e tlo ntlhahla ka bohlale; ka re ke late botlatla ke bone se se thabišago bana ba batho, se ba se dirago fa tlase ga legodimo, ge ba sa bala matšatši a phelo bja bona.
4Ka dira mediro e megolo, ka ikagela nywako, ka itemela le dirapa, 5ka itirela le mašemo, le a dihlare, ka šema meremelewa ya mehutahuta, 6ka itirela matsha a meetse a go nošetša sekgwasehlogadihlare. 7Ka reka balata ba banna le ba basadi, ka ba le bahlanka ba ba tswaletšwego motseng wa ka, ka rua mehlape ya kgomo le ya dihuswa tše ntši, ka phala bohle ba ba kilego ba ba gona pele ga ka fa Jerusalema. 8Le gona ka ba le mahumo a tshipitshehla le khwibedu, le matlotlo a dikgoši le dinaga, ka inyakela direti le baopi, le lona lethabo la barwa ba batho, basadi ba bantši.
9Ka ba yo mogolo, ke fela ke gola, ka phala bohle ba kilego ba ba gona pele ga ka fa Jerusalema. 10Mahlo a ka ga nka ka a kuna le setee sa tše a bego a se duma, ga go lethabo le nkilego ka le tima pelo ya ka; gobane pelo ya ka e be e thabela tšohle tše ke bego ke di dira; ya ba wona moputso wa mediro ya ka yohle. 11Bjale ge ke galalela mediro ye e dirilwego ke diatla tša ka, le tapišo tša mola ke e dira, ke hwetša e le lefela, e le go phuthela phefo ka kobo, ka bona go se matšomatšo fa tlase ga letšatši.
12Ka phakgamela go lemoga se e lego bohlale, le se e lego bošilo le botlatla; gobane motho e a hlatlamago kgoši a ka reng, ge e se go dira tše ba di dirilego kgale? 13Ka bona matšo a bohlale a phala a bošilo, bokaseetša se phala leswiswi. 14Yo bohlale o ne mahlo mo hlogong ya gagwe; ge e le setlatla se sepela leswiswing. Le gona ka bona gobane bobedi bja bona bo tlelwa ke tše di swanago. 15Pelong ya ka ka ba ka re: Matlelasetlatla le nna a ka ntlela. Ke reng ke kgantšha bohlale? Ka botša pelo ya ka ka re: Le tšona tšeo ke lefela! 16Gobane yo bohlale gotee le setlatla ga ba gopolwe go ya go ile; mehla e tlago e tla hwetša go lebetšwe bohle. Joo! Mohlale le lešilo, go hweng ba a swana! 17Bophelo ka ba ka bo nyatša ka re, ke lefela, ke tiro tše di dirwago fa tlase ga letšatši; gobane ke lefela tšohle, ke go phuthela phefo ka kobo.
18Ka nyatša le tapišo tšohle tše nkilego ka itapiša ka tšona fa tlase ga letšatši, tše ke tlogo di tlogelela motho e a tlogo ntlhatlama. 19Mme go tseba mang ge e tlo ba mohlale goba lešilo? O tlo buša tšohle tše ke di dirilego ka bohlale bja ka fa tlase ga letšatši. Le tšona tšeo ke lefela. 20Ke moka ka hloboga, ka ngala tšohle tše ke di dirilego fa tlase ga letšatši. 21Gobane motho e a dirilego ka bohlale le ka tsebo le ka kgono, o di tlogelela motho e a sa kago a itapiša ka tšôna, ya ba bohwa bja gagwe. Tše le tšona ke lefela, ke bošula bjo bogolo. 22Gobane motho o tšwa le eng ka tiro tšagwe tšohle, le ka pelaelo tša pelo ya gagwe, tše a itapišago ka tšona fa tlase ga letšatši? 23Hleng mehla yohle yagwe e le ya go hlaka! Hleng boitapišo e le go itshwenya! Le bošego pelo yagwe ga e khutše. Tšeo le tšona ke lefela.
24Motho ga a na se se kaone; a a je, a a nwe; pelo ya gagwe e thabele botse mo tirong tša gagwe. Fela, le tšôna tšeo ke bone di etšwa atleng sa Modimo. 25Gobane ke mang a kago ja, a kago thaba, ge e se ka yena? 26Gobane motho e a mo kgahlago, o mo fa bohlale le tsebo le thabo. Ge e le modiradibe o mo nea tapišego ya go hloša le ya go kgobela tša go tlo fiwa yo Modimo a mmonago bolo. Le tšona tšeo ke lefela, ke go phuthela phefo ka kobo.
Currently Selected:
MMOLEDI 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.