1 Kolinita 7

Folo miKolinita yadi toliluvaluva nagi fa'ina

gikivetuvetunudi.

1Siule tobohiyakweyao, yami toliluvaluva yaku leta againe wa'etoladina-ma ganafatana. Ka'i kaliva keke ginanagi, au medema gilubodana. 2Hidedemi iya ganuwanuwa tu kaliva vevine moya'aidi hi'udo'udo fa'ina, gilubodana be kaliva sa'eyana sa'eyana tauna yana kwamayoku gidavaina be buye hidamiyami, kadu kwamayoku sa'eyana sa'eyana tauna yana kaliva gidavaina be buye hidamiyami. 3Kaliva kwamayoku hinagi againe, ka'i kwamayoku nuwanuwadi moganedi buye hinadauda amine, moganedi au keke ginadibutoyogedi. Meda anafaiweya ka'i kaliva nuwanuwana vavinena buye hinadauda amine, vavinena au keke hinadibutoyogeni. 4Fa'ina kwamayoku keke taudi wowodi hidavehimeyeni, au mema moganedi givehimeyena. Meda anafaiweya kaliva keke tauna wowona gidavehimeyeni, au mema vavinena hivehimeyena. 5Kaliva keke vavine unahawatadi, kadu kwamayoku keke moganemi wanahawatani be higa vaita keke buye wanadauda. Tu ka'i tova sa'eyana taumiyao buye wanavehimeyemi be dauva wanahawatana higa ve'o'ola-tafalolo againe wanahawahegemi fa'ina, medema gilubodana. Tu ka'i yami ve'o'ola ana aituha wanaluyabuna amine o wanavebutu-havagi buye wanadauda. Ka'i ami hawata dauva fa'ina lauva tunugina wananunauwena digo, matami ginaludigadigaga ada Setani gina'ela gina'aladibidibiyemi be mali vevine o mali kaliva buye wanadauda. Hidema fa'ina yami ve'o'ola ana aituha wanaluyabuna againe, kadu wanavebutu-havagi vavine o moganemi buye wanadauda.

6Mena yaku gahe nagi fa'ina, dewai-nadi fa'ina keke vaita vehimeya amine gadavehimeyemi. Gahawahegemi tu nagi ana dewai-nadi galukahihiyena amine wanahuluva. 7Yaubada yana veluga againe kilolokeku gamimiyami, ada nuwanuwaku kaliva vevine moya'aidi iya amine badi kilolokediyao hinamiyami. Tu Yaubada kaliva sa'eyana sa'eyana ginuwakabubuyedi tulina tulina. Tufoidi yana veluga againe kilolokediyao himimiyami be Yaubada fa'ina hifififaisewa. Kadu tufoidi Yaubada yana veluga againe naginagidiyao himimiyami be Yaubada yana faisewa hi'abi'abina.

8Tu kiloloke sikwasikwa sibauwe kadu agaimiya ganagahe. Ka'i iya keke naginagiku amine omi keke wananagi, au medema gilubodana. 9#1Ti 5:14Tu ka'i matami giludigadigaga be keke amifaiweya taumiyao wanahawatami au wananagi. Ka'i ai'ala'alata amine yami nuwanuwa nagi fa'ina ginatubuga-mo'a tu keke wananagi digo, medema keke gidalubodani. Tu matami giludigadigaga-mo'a fa'ina wananagi, medema gilubodana.

10Tu kadu naginagimiyao agaimiya ganagahe. Keke vaita tauku yaku vehimeya, au hida Kaiwabu yana vehimeya ganalukahihiyena. Omi vevine keke wanaviholili. 11Ka'i wanaviholili digo, kadu keke kaliva sa'eyana wananagini. Ka'i keke nuwanuwami amikaibe wanamiyami, au moganemi againe wanayewami be nuwanuwa sa'eyana againe wanamiyami. Kadu'e o kaliva vavine keke unakilowedi.

12Tu omi velugamiyao keke wadanagitafalolo-ma agaimiya ganagahe. Higa keke vaita hida Kaiwabu yana vehimeya sa'eyana amine ganalukahihi, au iya tauku yaku gahe ganalukahihiyena. Hai kaliva Keliso uvetumaganena tu badi vavine keke hidavetumaganeni, tu nuwanuwadi o moganedi aimo buye wanamiyami, medema keke unakilowedi. 13Meda anafaiweya hai kwamayoku Keliso wavetumaganena tu moganemi keke gidavetumaganeni, tu nuwanuwana omi vavinena aimo buye wanamiyami, medema keke wanaviholili. 14Hai kaliva keke Keliso gidavetumaganeni tu vavinena tovetumagana. Vavinena yadi vetumagana fa'ina Yaubada moganedi givega'aulena be vaita hidanagitafalolo. Meda anafaiweya hai kwamayoku keke Keliso hidavetumaganeni tu moganedi tovetumagana. Moganedi yana vetumagana fa'ina Yaubada vavinena givega'auledi be vaita hinanagitafalolo. Hidede amine Yaubada kaliva vavinena yadi vetumagana fa'ina o ka'i kwamayoku moganedi yana vetumagana fa'ina adi'iselu givega'auledi fa'ina, natudiyao buye givega'auledi be vaita Keliso yana kaliva natudiyao hinamiyami. Ka'i tamadi o hinadi keke gidavega'auledi digo, natudiyao vaita miya-kawokawowodiyao natudiyao amine hidamiyami.

15 # Lo 12:18 Tu ka'i kaliva keke Keliso gidavetumaganeni-ma nuwanuwana vavinena ginakilowena, o ka'i kwamayoku keke Keliso againe hidavetumagana-ma nuwanuwadi hinaviholili, au hinanuvehaila. Keke adi hawata gidadauda. Au adifaiweya hinanuvehaila. Fa'ina Yaubada gikovada be nuwayamumu tu keke nuwakoyo againe kanamiyami. 16#1Fi 3:1-2Omi kwamayoku Keliso againe wavetuvetumagana-ma wanogali! Ka'iwa, ka'i moganemi buye wanamiyami amine o, amifaiweya ase'asena wanakiviviyena be Keliso againe ginavetumagana. O ka'i o kaliva vavine buye wanamiyami amine o, ase'asedi afaiweya unakiviviyena be Keliso againe hinavetumagana.

Gava kaiwabu amine wamiyami tu Yaubada gikovami,

medede amine wanamiyami.

17 # 1Ko 7:24 Kadu ganagahe. Omi tovetumagana moya'aimi, Yaubada kaliva sa'eyana sa'eyana gava kaiwabu agaimiya givetalaiyeni tu Yaubada gikovami be yana yo'ogaga agaidiya waluku ana toveya, medede againe tova hidevama wanamiyami. Au hidede amine gavehavehawala tovetumagana adi yo'o fafali tulina tulina agaidiya. 18Wa'ita dewa sa'eyana ma, hai kwanamiYuda tuwaina Yaubada yana iya'iyaya wowone hitomogolohini tu Yaubada gikovana be yana yo'ogaga agaidiya giluku, medema keke ginagaluvaluva-yo ana bwaya ginasevauyeni. Hai yo'o tulidiyao kalivadi wowone keke iya'iyaya hidatomogolohini tu Yaubada gikovana be yana yo'ogaga agaidiya giluku, medema keke tova hidevama wowo ana tomogolota ginavaini. 19#Ga 5:6Fa'ina ka'i iya'iyaya wowomiya gidadauda o ka'i keke gidadauda, medema keke gaitoma lakahina. Ka'i Yaubada yana vehimeya moya'aina wadibudibumuhigena o ka'i keke wadadibudibumuhigeni, medema gaitoma lakahina.

20Kaliva sa'eyana sa'eyana gava kaiwabu ka'i lakahina o kabi'ona amine tuwaina wamiyami tu Yaubada gikovami be yana yo'ogaga agaidiya waluku, medede amine tova hidevama wanamiyami. 21Kadu sa'eyana, ka'i kaliva againe wave'agetoga tu Yaubada gikovami, agetoga yadi faisewa koyona wa'abina fa'ina keke nuwami ginavita. Tu ka'i yami tovehimeya ginahawahegemi amine o, wanana taumiyao fa'imiya wanafaisewa. 22Fa'ina omi agetoga yami tovehimeya yadi abavehimeya dibune wamimiyami amine, meda boi tuwaina dewa koyona yana abavehimeya dibune wamiyami. Tu Kaiwabu Yesu Keliso gikovami be yana yo'ogaga agaidiya waluku ana toveya, giyaumi be dewa koyona yana abavehimeya giyawelina. Ada au tova hidevama kaliva agaidiya wave'agetoga nonogana omi Kaiwabu Yesu Keliso yana kaliva yauyaugimiyao, fa'ina giyaumi be keke dewa koyona yana abavehimeya dibune wadamiyami. Meda anafaiweya omi kaliva keke tamo hakwadi againe wadave'agetoga amanadi, Kaiwabu Yesu Keliso omi gikovami be yana yo'ogaga agaidiya waluku ana toveya, Bana againe wave'agetoga. 23Yaubada fata lakahina againe gitutuvehobumi be yana kaliva ginavehimeyemi. Keke tomiyababi agaidiya wanave'agetoga be badi yami nuwanuwa hinavehimeyeni. 24Tobohiyakweyao, kaliva sa'eyana sa'eyana gava kaiwabu ka'i lakahina o kabi'ona amine tuwaina wamiyami tu Yaubada gikovami be yana yo'o agaidiya waluku, mededemi tova adamoya Yaubada buye wanamiyami.

Folo miKolinita yadi toliluvaluva kilolokediyao

kadu sikwasikwadiyao fa'idiya gifatana.

25Tu yami toliluvaluva kilolokediyao fa'idiya ganafatana. Kaiwabu keke tamo vehimeya badi fa'idiya gidaveleku tu tauku yaku nuwanuwa ganalukahihiyena, ada Kaiwabu ginuwakabubuyeku be yana faiseweya givegideku fa'ina, amifaiweya yaku gahe wanavetumaganena. 26Tova vitana ide tovetumagana agaideya giyemuyemu fa'ina, iya ganuwanuwa vaita kaliva vevine kilolokediyao hinamiyami, medema gilubodana. 27Ka'i o'eni naginagi? Keke vavine unakilowedi. Ka'i keke udanagi? Au keke kwamayoku unanagini. 28Tu ka'i kwamayoku unanagina digo, medema keke dewa koyona. Ada kadu ka'i kwamayoku kilolokena ginanagi, medema keke dewa koyona. Ma badi naginagidiyao vita tulina tulina hinanuhagana fa'ina, keke nuwanuwaku omi kilolokemiyao vitai-dina wananuhagani.

29Tobohiyakweyao, mena yaku gahe ana kaivila hidede amine, higa hida tovai-nadi gikali'uho be babi ginayawowola. Fa'ina omi naginagimiyao Yaubada fa'ina wanafaisewa vaita omi kilolokediyao amine. 30Kadu omi to'alika fa'idiya watagitagi amanadi Yaubada fa'ina wanafaisewa vaita keke yami watagiya. Kadu omi tamo gavadi fa'ina wavemwavemwamwala-ma Yaubada yana faisewa wananuwenuwena vaita keke wadavemwamwala. Kadu omi lokoloko wakimokimonena-ma Yaubada fa'ina wanafaisewa vaita yami lokoloko keke. Yaubada ana vetumagana wai ginanagona nuwamiya. 31#1Yn 2:17Kadu omi hida babi ana gaitoma fa'ina wafififaisewa amanadi, medema gaitomai-dina agaidiya keke nuwami wanahawahege-'owoni. Fa'ina hida babi ana gaitoma giyawoyawowola.

32Siule tobohiyakweyao, keke nuwanuwaku babi ana gaitoma tulina tulina fa'idiya wanavenuwanauna. Kaliva keke naginagina Kaiwabu yana faisewa fa'ina anafaiweya tova moya'aina ginuwanuwa, fa'ina nuwanuwana Kaiwabu nuwana ginakiveyamumuna. 33Tu kaliva naginagina ma tova moya'aina hida babi ana gaitoma fa'ina givenuwanauna, ada gifififaisewa be vavinena nuwadi ginakiveyamumuna fa'ina. 34Ada au nuwanuwa luhei hive'asitainena, higa tova sa'eyana Yaubada fa'ine ginuwanuwa, tova sa'eyana vavinena fa'idiya ginuwanuwa. Meda anafaiweya kwamayoku kilolokena ada ulaulatanina tova moya'aina Kaiwabu yana faisewa fa'ina anafaiweya hinanuwanuwa, fa'ina nuwanuwadi wowodi kadu alu'aluwadi Kaiwabu againe hinahawahege-'owodi. Tu kwamayoku naginagidi hida babi ana gaitoma fa'ina hivenuwanauna, ada hifififaisewa be moganedi nuwana hinakiveyamumuna. 35Hidede amine gagahe be higa keke vaita hawata omi agaimiya ganaseni. Omi ami veluga fa'ina gagahe be dewa tunutunugina amine wanahuluhuluva, ada Kaiwabu ana nuwanuwa'eya wanamiyami.

36Tu ka'i kaliva sa'eyana gimimiyami ada nagona natuna kwamayoku gihawatana be higa keke ginanagi, tu ginuwanuwa gigayo, “Ka'i hima yaku hawata keke yamumuna fa'ina natuku nuwanuwana ginanagi tu a givevavine-lakata.” Ka'i hidede amine ginuwanuwa digo, aimo tauna. Ka'i nuwanuwana natuna kaliva againe ginahawahegena, au yamumuna. Keke vaita medema dewa koyona. 37Ma ka'i tamo hakwadi tauna ginuwanuwa tu keke gidanuwanuwaluga, ada keke mali gaitoma gidavehimeyeni, au tauna anakaibe givehimeyena be higa vaita natuna kwamayoku keke ginavenagini, au medema kadu huluva hagihagina. 38Fa'ina yaku nuwanuwa hidede amine, higa ka'i kaliva natuna kwamayoku ginavenagina, medema gilubodana. Ka'i kaliva natuna kwamayoku ginahawatana be keke ginanagi, medema giluboda-mo'ena.

39 # 2Ko 6:14 Tu kwamayoku naginagidi ma aimo moganedi wayawaina gimimiyami againe, nagi ana vehimeya hina'itave'avina be keke mali kaliva hinanagini. Tu ka'i moganedi gina'alika ada nuwanuwadi kaliva sa'eyana hinanagina amine o, aimo taudi. Au hinanagina. Tu tovetumaganagaga hinanagina. 40Ka'i kilolokena digo, iya tauku ganuwanuwa vaita yana wavemwamwala ginamiyami. Ada Yaubada Alu'aluwana Tauna nuwahinagekuya we'a gimimiyami fa'ina, iya ganuwanuwa vaita Yaubada yana nuwenuweya mena nagi ana nuwanuwa galukahihiyena.

Currently Selected:

1 Kolinita 7: viv

Highlight

Copy

Compare