1 Kolinita 8

Folo miKolinita yadi toliluvaluva kevakeva kilumina

agaidiya kaliva hihawadavadavayena-ma fa'ina gifatana.

1Siule tobohiyakweyao, yami toliluvaluva sa'eyana ganogalina-ma kadu ganafatana, higa kevakeva kilumina agaidiya hihawadavadavayena-ma fa'ina ganalukahihi. Mena kevakeva ana hawadavedaveya fa'ina omi wagahe wagayo, “Hida gaitoma ana nuwanuwa fa'ina ide halamanideyao.” Wagahe velemona tu wa'ita. Hai kaliva halamanina, medema nuwanuwana yana halamana fa'ina ginaselakalaka. Hai kaliva nuwana hawahawahegana, medema nuwanuwana tobohiyaneyao yadi vetumagana ginakivetubugina. 2Kadu hai kaliva nuwahinagene gigahe gigayo, “Iya kaliva halamaniku,” gavaimi gilubodana be ginahalamanena-ma aimo keke gidahalamaneni. 3#Yo 14:23Tu hai kaliva nuwanuwana velemo'ena Yaubada, medema fa'ine Yaubada gigayo, “Wada kalivai-nadi gahalamanena, higa bana yaku kaliva.”

4E, kevakeva kilumina agaidiya hihawadavadavayena-ma fa'ina. Omi watoliluvaluva higa vaita ka'i kevakevai-nadi amifaiweya wana'ana o ka'i keke. Ahe kahalamanena Bana Yaubada anakaibe'u-mo'a. Keke tamo Yaubada velugana. Kadu badi kilumina ma ve'alololodiyao, keke velemo'ena yaubada ma ahe kahalamanena. 5Gaitoma moya'aina lobameya kadu babiya hidadauda, ada medema gaitomai-dina fa'ina badi Yaubada keke hidahalamaneni-ma higahe higayo, “Hida gaitoma yadi wafaiwala adi egana viviluwa kadu kaiwabu.” 6#Ef 4:6; Yo 1:3Hidede amine badi hinuwanuwa tu ide kahalamanena keke viviluwa moya'aidi hidamiyami, au Yaubada sa'eyanaga gimimiyami, higa Tamada. Ada Bana Tamada gaitoma moya'aina gibubuna, kadu ide tovetumagana gibubuda be ana egana kanakilakahina fa'ina. Meda anafaiweya Kaiwabu sa'eyanaga gimimiyami, higa Kaiwabu Yesu Keliso. Ada Yaubada yana nuwanuwa Yesu Keliso givelena be gaitoma moya'aidi gibubudi, kadu yawaida ivaguna inubana Bana againe kavaina.

7Tu keke tovetumagana moya'aidi hida vehawala Yaubada sa'eyanaga fa'ina hidahalamaneni. Tufoidi boi tuwaina malamala a gavaiyehi agaidiya hinuwanuwa vaita kilumina yaubada velemo'ediyao. Hidema fa'ina aimo tova hidevama yadi nuwanuwa hinunauwena, higa vaita kevakeva mali kaliva kilumina agaidiya hihawadavadavayena-ma hida'au'ana ana toveya, mena kevakevai-nadi againe kilumina yadi faiwala gidadauda. Ada kevakevai-nadi hi'au'a tu ase'asedi gi'a'akolukoluna. Hivaitana kilumina yadi gaitoma hi'au'ana fa'ina, adi wavita hinamiyami. 8Atu gava kevakeva ka'au'ana-ma Yaubada keke gidanuwenuweni higa vaita yada'a againe Bana buye kanavetobohiyana. Ka'i keke kana'ani digo, Yaubada keke ginanuwenuweda vaita ide koyodeyao. Ka'i kana'ana digo, keke medema fa'ina kanayamumu Bana matane.

9 # Lo 14:13-15 Kevakeva kilumina agaidiya hihawadavadavayena-ma adi'a fa'ina keke ami hawata gidadauda, tu wana'itave'avimi be keke yami'a againe badi tovetumagana yadi vetumagana kowakowana ma koyona againe wanavebe'udi. 10Omi mena kevakevai-nadi ana'a fa'ina halamanimiyao higa keke hawahawatana. Ka'i omi kilumina yadi manuwa-tabu againe wanaluku be wana'enolukekela wana'a, ada bana tovetumagana sa'eyana kilumina yadi kevakeva ana a'a fa'ina ase'asena gi'a'akolukoluna-ma gina'itami amine o, ginanuwanuwaluga ginagayo, “Gavaitana mena kevakeva ana'a hawahawatana tu badi tobohiyakweyao hi'au'ana fa'ina, ka'i iya akufaiweya gana'ana.” Ka'i omi mene wanuwanuwa vaita yami'a againe tobohiyami yana vetumagana wadakivetubugini? Keke, keke-mo'a! 11Wanogali! Kevakeva kilumina agaidiya hihawadavadavayena-ma kevakeva-kawowo ma wahalamanena. Tu tobohiyami tovetumagana kowakowana ma omi tovetumagana halamanimiyao yami'a give'u'ulena be ana ayauna vaita kevakevai-nadi ana'a dewa koyona tu au ai'adi gi'ana, ada au omi agaimiya agolaufofola ana eda ginuhagana, bana kalivai-nadi ana kibababala fa'ina Keliso gi'alika amanadi. 12Ka'i hidede amine tobohiyamiyao agaidiya wakoyo, ada ase'asedi matamatauhina wakivekoyodi amine, keke badi'iyaogaga agaidiya wadakoyo, au Keliso againe wakoyo, fa'ina badi Keliso yana kaliva. 13#Lo 14:21Keke nuwanuwaku Keliso againe ganakoyo fa'ina, ganahawataku. Ka'i mena kevakevai-nadi gana'au'ana againe tobohiyakweyao koyona againe ganavebe'udi digo, keke tamo tova kevakeva gana'u'ani-yo tobohiyakweyao koyona againe ganavebe'udi.

Currently Selected:

1 Kolinita 8: viv

Highlight

Copy

Compare