Zabuli 118
118
Kulonga malumbo kwa Nguluwi
1Mlonje malumbo kwa Mkulu Nguluwi, kwa vila ka yanojile,
igano lya kwimilila lya heye lyangikala mazuwa gose.
2Wanhu wa Isilaeli walonje,
“Igano lya kwimilila lya heye lyangikala mazuwa gose.”
3Walelwa wa Aluni, watambika, walonje,
“Igano lya kwimilila lya heye lyangikala mazuwa gose.”
4Weng'ha walingumdumba Mkulu Nguluwi walonje,
“Igano lya kwimilila lya heye lyangikala mazuwa gose.”
5Kuli magazo ga heni nandimlanda Mkulu Nguluwi,
naye nakanyhulika na kumbika ndilejehe.
6Mkulu Nguluwi ka hamwe na heni, silingudumba chinhu,
munhu kondita choni?
7Mkulu Nguluwi ka hamwe na heni, kunhanza,
nani ndowona wang'honyo walingunzudila nawalemwela.
8Fola kubilimila kikala goya kwa Mkulu Nguluwi,
kusinda kuchitumbila kwa munhu.
9Fola kubilimila kikala goya kwa Mkulu Nguluwi,
kusinda kuchitumbila kuli vilongozi wa isi.
10Wanhu wa isi zeng'ha nawanzunguluta,
ila kwa itagwa lya Mkulu Nguluwi nandiwadumya.
11Nawanzunguluta chila ubanzi,
ila kwa itagwa lya Mkulu Nguluwi, nandiwadumya.
12Nawanzunguluta, wenji kota nzuchi,
ila nawalakazwa himahima kota chisosolo kuli chiluli,
kwa itagwa lya Mkulu Nguluwi nandiwadumya.
13Nang'hundujizwa kumbele habehi kugwa,
ila Mkulu Nguluwi nakanhanza.
14Mkulu Nguluwi ka mong'ho wa heni ukulu,
heye ndo ulohozi wa heni.
15Lizi lya usangalalo wa kusumya lyanguhulikwa kuli ihema lya hewo watanganiche,
“Moko wa kudilo wa Mkulu Nguluwi naudita mbuli ng'hulu.
16Moko wa kudilo wa Mkulu Nguluwi nawinuligwa kuli kusumya.
Moko wa kudilo wa Mkulu Nguluwi naudita mbuli ng'hulu.”
17Sibagama hebu, ila ndochikala,
na kusimila madito ga Mkulu Nguluwi.
18Mkulu Nguluwi nakanzapa ng'hatu,
ila handechile mbagame.
19Nyhumulile lwizi lwa hachi,
nyinjile na kumlonjela Mkulu Nguluwi malumbo.
20Alu ndo lwizi lwa Mkulu Nguluwi,
wanhu wawele watanganiche wokwinjila amo.
21Ndolonga malumbo, gwa Mkulu Nguluwi kwa kunyhidichila,
kwa vila hegwe ndo ulohozi wa heni.
22Iganga lyowalilemile walinguzenga,
naliwa iganga likulu lya msisi,
23ajo ndo mijito ja Mkulu Nguluwi
najo ndo ja kububuwaza ng'hatu kwa hetwe.
24Ali ndo zuwa lyoyaliditile Mkulu Nguluwi,
ahyo tusangalale na kutowa luchenze.
25Gwa Mkulu Nguluwi, dedede utulohole.
Dedede uzidite mbuli za hetwe zilutilile goya, gwa Mkulu Nguluwi.
26Yatambichizwe ayo yalinguya kwa itagwa lya Mkulu Nguluwi.
Twanguwatambichiza kulawa haluga ha Mkulu Nguluwi.
27Mkulu Nguluwi ndo Nguluwi,
naye ndo yatupele lumuli lwa heye.
Mibate nhagala mmoko kwa chiwalo cha mnvina,
kuno mjenda hamwe mbaka honhu ha kulavila nhambiko.
28Hegwe ndo Nguluwi wa heni, nani ndangulonga malumbo,
ndangukutogola, gwa Mkulu Nguluwi, Nguluwi wa heni.
29Mlonje malumbo kwa Mkulu Nguluwi kwa vila ka yanojile,
igano lya kwimilila lya heye lyangikala mazuwa gose.
Currently Selected:
Zabuli 118: Chividunda
Highlight
Copy
Compare
Share
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
