Zabuli 119
119
Ilajizo lya Mkulu Nguluwi
1Nawatambichizwa walingikala ne nongwa,
walingibatilila ilajizo lya Mkulu Nguluwi.
2Nawatambichizwa walinguhulichiza kwamula kwa heye,
walingumpala kwa nhumbula yeng'ha.
3Wanhu wohawaditile wihe,
mazuwa gose wanguwinzaga nzila za heye.
4Gwa Nguluwi, nakutupa malajizo ga hegwe,
leka tugebatilile kwa kukundigwa.
5Ndahaganile ng'hatu kwima nzinzili,
kwa kuwinza mizilo ja hegwe.
6Ahyo nasalikona soni,
kwa kijesa kuwala mizilo ja hegwe jeng'ha.
7Ndokutogola kwa nhumbula igoloche,
kuno ndichilangusa malajizo ga hegwe gatanganiche.
8Ndojiwinza mizilo ja hegwe,
uleche kundeka ne hado.
Kuhulichiza malajizo ga Mkulu Nguluwi
9Msongolo koulolela ndaze ukomu wa heye leka uwe welile?
Kwa kuwinza ulonzi wa hegwe.
10Ndangikangaza kukuhulichiza kwa nhumbula ya heni yeng'ha,
uleche kundeka ndijibelenhuche mizilo ja hegwe.
11Ndibatilila ulonzi wa hegwe mnhumbula ya heni,
leka ndeche kukuditila gehile.
12Gwa Mkulu Nguluwi, utogoligwe.
Undanguse malajizo ga hegwe.
13Ndogahiluchila kwa lizi
malajizo ga hegwe geng'ha gougalavile.
14Ndangusangalala kuwinza kwamula kwa hegwe,
kusinda kuwa na lufufu lwinji.
15Ndangijesa malajizo ga hegwe,
na kijesa ng'hatu kuwala nzila za hegwe.
16Ndangusangalala kwa chiwalo cha mizilo ja hegwe,
siweza kusemwa hebu ulonzi wa hegwe.
Maya ga malajizo ga Mkulu Nguluwi
17Unditile igano heni chitumagwa wa hegwe,
leka ndikale na kibata ulonzi wa hegwe.
18Ugagubule meho ga heni,
ndigone malanguso ga kububuwaza kuli malajizo ga hegwe.
19Heni nda mjenzi hela hano muisi,
uleche kuvisa heni mizilo ja hegwe.
20Nhumbula ya heni yangugazika kwa maya,
ga kugana kuzizela ng'hatu nhaguso za hegwe mhela weng'ha.
21Hegwe kwanguwang'hanuchila walingidaya na wawele wapanjilwe,
walingujibelenhuka mizilo ja hegwe.
22Umbiche kutali na maligo na kubeza kwa hewo,
kwa vila ndibatilila kwamula kwa hegwe.
23Wakulu wanguting'hana na kugana kunditila vibi,
heni chitumagwa wa hegwe ndochijesa kwa chiwalo cha mizilo ja hegwe.
24Kwamula kwa hegwe ndo usangalalo wa heni,
azo ndo zilingundongoza kota goloko yanojile.
Kulanda kwa kwimilila
25Ndangugalawata hanyi mnhimbwisi,
umhe heni kahi ukomu kota vyoulagane.
26Nandonga kwa mlomo wa heni gala gonditile, nagwe nakunyidichila.
Undanguse malajizo ga hegwe.
27Undanguse vyoilinguganigwa kibatilila malajizo ga hegwe,
nani ndogajesa madito ga hegwe ga kububuwaza.
28Nhoka kwa masinzo,
unyhilulile mong'ho kota vyoulagane.
29Umbiche kutali na nzila za uhadi,
undanguse kwa isungu malajizo ga hegwe.
30Nanyhagula nzila ya kukundigwa,
ndibatilila nhaguso za hegwe.
31Ndangibatilila kwamula kwa hegwe, gwa Mkulu Nguluwi,
uleche kukunda mbasigwe soni.
32Ndikomya, ndojiwinza mizilo ja hegwe,
kwa vila kwangumha heni uwanzi wa kugazela ng'hatu.
Kulanda uwanzi wa kuvizela
33Gwa Mkulu Nguluwi, undanguse kibatilila mizilo ja hegwe,
nani ndojibatilila mbaka kuduma.
34Unzelese leka ndibatilile malajizo ga hegwe,
ndigawinze kwa nhumbula ya heni yeng'ha.
35Undongoze kuli nzila ya mizilo ja hegwe,
kwa vila amo ndanguwa na usangalalo.
36Umhe heni maya ga kibatilila kwamula kwa hegwe,
haiwele kuli lufufu.
37Umbiche kutali, ndeche kuwinza mbuli zohambe zitanze chinhu,
undajile nzila ya hegwe, umhe heni ukomu.
38Unyenezele kulagana kwa hegwe, heni chitumagwa wa hegwe,
kulagana koulinguwapa wala walingukuhulichiza.
39Undavile soni yondilinguidumba,
kwa vila nhaguso za hegwe ndo zinoga.
40Ndangona maya ng'hatu kibatilila malajizo ga hegwe,
umhe heni ukomu, ndikomya hegwe kwa utanganiche.
Kugana malajizo ga Mkulu Nguluwi
41Igano lya kwimilila lya hegwe lyuye kwa heni, gwa Mkulu Nguluwi,
undohole kota vyoulagane.
42Aho ndoweza kuwedichila awo walingundiga,
kwa vila ndina makundo ng'hatu na ulonzi wa hegwe.
43Uleche kusa hebu ulonzi wa kukomya kuli mlomo wa heni,
kwa vila kitumbila kwa heni kwa kuli nhaguso za hegwe.
44Ndogabatilila malajizo ga hegwe mazuwa gose,
ena, mazuwa gose na mazuwa gose.
45Ndochikala kuli kilejeha kuwele kwenele,
kwa vila ndangibatilila malajizo ga hegwe.
46Ndowalonjela wandewa kwamula kwa hegwe,
ne kona soni.
47Maya ga heni ndo kibatilila mizilo ja hegwe,
jondilingujigana.
48Ndangugahulichiza na kugagana malajizo ga hegwe,
mizilo ja hegwe ndojijesa.
Kuhembulizwa na malajizo ga Mkulu Nguluwi
49Ukumbuchile kota vyoulagane na heni, chitumagwa wa hegwe,
kulagana kuwele nakumha heni kitumbila.
50Mbaka hondiwa mmagazo ndanguwa sindamale,
kwa vila kulagana kwa hegwe kwangumha heni ukomu.
51Walingidaya wangundanila mazuwa gose,
ila hambe mbelenhuche malajizo ga hegwe.
52Gwa Mkulu Nguluwi, ndanguzikumbuchila nhaguso za hegwe za katali,
nazo zangunyhembuliza.
53Ndanguwa na ng'halazi ing'ang'ale,
hondiwona wehile wangubena malajizo ga hegwe.
54Mizilo ja hegwe najiwa lwimbo lwa heni,
londilingikala kwa mhela uchefu.
55Nechilo ndangukukumbuchila, gwa Mkulu Nguluwi,
na kibatilila malajizo ga hegwe.
56Awu ndo utambichizo ukulu kwa heni,
kwa vila ndangibatilila malajizo ga hegwe.
Maya ga kuwinza malajizo ga Mkulu Nguluwi
57Gwa Mkulu Nguluwi, hegwe uliyeka ndo ndilingukugana,
ndangilagana kibatilila ulonzi wa hegwe.
58Ndangulanda kwa nhumbula ya heni yeng'ha,
umbonele isungu kota vyoulagane.
59Nandigajesa madito ga heni,
nanyhiluka leka mbinze kwamula kwa hegwe.
60Ne kukawila ndangudita himahima,
kujibatilila mizilo ja hegwe.
61Wehile nawawika midiwa leka wangwilize,
ila heni sisemwa malajizo ga hegwe.
62Nechilo ng'hatu ndangulilimka kukutogola,
kwa chiwalo cha nhaguso za hegwe zitanganiche.
63Heni nda goloko wa weng'ha walingukudumba,
goloko wa hewo walingibatilila malajizo ga hegwe.
64Isi naimema igano lya kwimilila lya hegwe, gwa Mkulu Nguluwi,
undanguse mizilo ja hegwe.
Mkulu Nguluwi kangunditila ganojile
65Nakunditila goya heni chitumagwa wa hegwe,
kota vyoulagane, gwa Mkulu Nguluwi.
66Undanguse kuvizela goya na kuwa na luhala,
kwa vila ndina makundo ng'hatu na mizilo ja hegwe.
67Louwele ung'hali kunzapa nanyajilila nzila,
ila lelo ndangibatilila ulonzi wa hegwe.
68Hegwe ndo unojile na kwangudita ganojile,
undanguse mizilo ja hegwe.
69Walingidaya wangulonga udesi kuwala heni,
ila heni ndangibatilila malajizo ga hegwe kwa nhumbula ya heni yeng'ha.
70Nhumbula za hewo nazigagadala,
ila ndangusangalala kwa chiwalo cha malajizo ga hegwe.
71Nayali goya kwa heni kugazigwa,
kwa vila nakundita ndilanguse malajizo ga hegwe.
72Malajizo gougawichile ndo ganoga kwa heni,
kusinda lufufu lweng'ha lwa muisi.
Kulanda kuhembulizwa na Mkulu Nguluwi
73Moko ga hegwe nagandita na kunyimiza nzinzili,
umhe heni uwanzi wa kuvizela leka ndilanguse mizilo ja hegwe.
74Walingukudumba wombona na kusangalala,
kwa vila kitumbila kwa heni kwa kuli ulonzi wa hegwe.
75Gwa Mkulu Nguluwi, ndivizela nhaguso za hegwe ndo za kutanganika,
na kota nakunzapa kwa vila hegwe kwa wa kukundigwa.
76Igano lya kwimilila lya hegwe linyhembulize,
kota vyoulagane kwa heni, chitumagwa wa hegwe.
77Umbonele isungu leka ndikale,
kwa vila malajizo ga hegwe ndo usangalalo wa heni.
78Walingidaya wabasigwe soni kwa vila nawalonga udesi kuwala heni,
ila ndochijesa kuwala malajizo ga hegwe.
79Weng'ha walingukudumba woye kwa heni,
leka wakuzele kwamula kwa hegwe.
80Nhumbula ya heni yeng'ha ibatilile mizilo ja hegwe,
leka ndeche kubasigwa soni.
Kulanda mhela wa kubunzwa
81Nhoka kwa chiwalo cha kubeteza ulohozi wa heni,
ndanguwika kitumbila kwa heni kuli ulonzi wa hegwe.
82Meho ga heni gangubilabila kwa kubeteza choulagane.
Ndanguuza, “Kokuya nili kunyhembuliza?”
83Hanga silingutanza chinhu kota chihako cha igozi chiwifigwe na iyosi,
sisemwile malajizo ga hegwe.
84Heni chitumagwa wa hegwe ndobeteza mbaka nili?
Kowatagusa nili wala walingumbunza?
85Walingidaya wambawila misimo,
wanhu wawele hambe wawinze malajizo ga hegwe.
86Mizilo ja hegwe jeng'ha ndo ja kukundigwa,
wanhu wangungaza ne hachi, unhanze.
87Wahabehi kundumya,
ila sibenile malajizo ga hegwe.
88Uwamile ukomu wa heni kwa kiwhana na igano lya kwimilila lya hegwe,
leka ndibatilile kwamula koulonjile.
Malajizo ga Mkulu Nguluwi gangumha munhu ukomu
89Gwa Mkulu Nguluwi, ulonzi wa hegwe wangikala mazuwa gose,
nautawizwa kuchanya kilanga.
90Kukundigwa kwa hegwe kwangikala kuli lulelo lweng'ha,
nakuiwika isi honhu hake na yangikala mazuwa gose.
91Vinhu vyeng'ha vyangikala kwa nhaguso za hegwe,
kwa vila vyangukukolela mijito.
92Wone malajizo ga hegwe hagawele usangalalo wa heni,
ndahawele ndumigwe kwa magazo ga heni.
93Siweza kusemwa malajizo ga hegwe,
kwa vila kwa ago nakumha heni ukomu.
94Heni nda wa hegwe, undohole,
kwa vila nandikangaza kibatilila malajizo ga hegwe.
95Wehile wangumbeteza leka wang'hopole,
ila ndangijesa kwamula kwa hegwe.
96Ndivizela chila chinhu changuwa na kuduma,
ila mizilo ja hegwe jahela kuduma.
Malajizo ga Mkulu Nguluwi gangumha munhu luhala
97Ndangugagana ng'hatu malajizo ga hegwe.
Ndangugajesa nemisi yeng'ha.
98Mizilo ja hegwe ja hamwe na heni mazuwa gose,
jangumha heni luhala kusinda wang'honyo wa heni.
99Ndivizela kusinda walangusa wa heni weng'ha,
kwa vila ndangijesa kwamula kwa hegwe.
100Ndanguvizela kusinda wasekulu wa heni,
kwa vila ndangibatilila malajizo ga hegwe.
101Ndangilemeza kuwinza nzila yihile,
leka ndibatilile ulonzi wa hegwe.
102Sibelenhuche nhaguso za hegwe,
kwa vila hegwe nakundangusa.
103Ulonzi wa hegwe ndo unona ng'hatu kwa heni,
ena, ndo unona ng'hatu kusinda hanombwa.
104Kwa malajizo ga hegwe ndanguwa na luhala,
ahyo ndanguzudila chila chilingulutilila vibi.
Malajizo ga Mkulu Nguluwi ndo lumuli
105Ulonzi wa hegwe ndo chenje cha kundongoza,
na lumuli kuli nzila ya heni.
106Nandilaha na kutawiza chilaho cha heni,
kota ndobatilila nhaguso za hegwe za kukomya.
107Gwa Mkulu Nguluwi, ndangugazika ng'hatu,
uwamile ukomu wa heni kota vyoulagane.
108Gwa Mkulu Nguluwi, ubochele lutogo lwa heni lwa kunuwila,
na kundangusa nhaguso za hegwe.
109Mazuwa gose kikala kwa heni kwa habehi kwajilila,
ila hambe ndigasemwe malajizo ga hegwe.
110Wehile nawambichila midiwa,
ila hambe mbelenhuche malajizo ga hegwe.
111Kwamula kwa hegwe ndo uhalizi wa heni mazuwa gose,
ako ndo usangalalo wa nhumbula ya heni.
112Nangana kwa nhumbula ya heni yeng'ha,
kuwinza malajizo ga hegwe mazuwa gose.
Kikala goya kuli malajizo ga Mkulu Nguluwi
113Ndanguwazudila wanhu wadesi,
ila ndangugagana malajizo ga hegwe.
114Hegwe ndo honhu ha heni ha kikala goya na ngawo ya heni,
ndanguwika kitumbila kwa heni kuli ulonzi wa hegwe.
115Muche kwa heni, hemwe mwihile,
leka ndijibatilile mizilo ja Nguluwi wa heni.
116Undite ndiwe nzinzili kota vyoulagane, nani ndochikala,
uleche kukunda mbasigwe soni kuli kitumbila kwa heni.
117Unyimize nzinzili nani ndoloholigwa,
mazuwa gose ndiwe ndilinguhulichiza mizilo ja hegwe.
118Kwanguwalema weng'ha walingubelenhuka malajizo ga hegwe,
kwa vila majesa ga hewo ga uhadi hagalingutanza chinhu.
119Wehile weng'ha kwanguwosa kota wavu,
ahyo heni ndangugana kwamula kwa hegwe.
120Ndangukakama kwa kukudumba,
ndangudumba kwa chiwalo cha nhaguso za hegwe.
Kulanda utanzi kwa Mkulu Nguluwi
121Nandita mbuli zinojile na za hachi,
uleche kundeka kuli ndole za walingumbunza.
122Ulagane kota konhanza, heni chitumagwa wa hegwe,
uleche kukunda walingidaya wambunze.
123Meho ga heni gangubilabila ndibeteza undohole,
ndibeteza weneze vyoulagane ilagano lya kutanganika.
124Unditile, heni chitumagwa wa hegwe kwa igano lya kwimilila lya hegwe,
undanguse mizilo ja hegwe.
125Heni ndo chitumagwa wa hegwe, umhe heni uwanzi wa kuvizela,
leka ndikuzele kwamula kwa hegwe.
126Sambi ndo mhela wa Mkulu Nguluwi kudita chinhu,
kwa vila wanhu wangubena malajizo ga hegwe.
127Ndangujigana mizilo ja hegwe,
kusinda zahabu inojile ng'hatu.
128Ahyo, ndangugawinza malajizo ga hegwe geng'ha,
chila nzila yihile ndanguizudila.
Maya ga kuhulichiza malajizo ga Mkulu Nguluwi
129Kwamula kwa hegwe ndo kwa kububuwaza,
ahyo ndangukubatilila kwa nhumbula ya heni yeng'ha.
130Ulonzi wa malanguso ga hegwe gangigalaga lumuli,
ganguwapaga luhala wanhu wohawavizelele chinhu.
131Nhumbula ya heni ina maya ng'hatu,
kwa vila ndangujigana ng'hatu mizilo ja hegwe.
132Ungalamchile na kumbonela isungu,
kota vyoulinguwaditila walingukugana.
133Umbiche ndiwe nzinzili hondijenda kota vyoulagane,
uleche kukunda ndongozwe na wihe.
134Ungombole kulawa kwa walingumbunza,
leka ndibatilile malajizo ga hegwe.
135Unhambichize, heni chitumagwa wa hegwe,
undanguse mizilo ja hegwe.
136Meho ga heni gangulavya mahozi kota lwanda,
kwa vila wanhu hawalingubatilila malajizo ga hegwe.
Hachi ya malajizo ga Mkulu Nguluwi
137Gwa Mkulu Nguluwi, hegwe kwa utanganiche,
na nhaguso za hegwe ndo za hachi.
138Nakulavya kwamula kwa hegwe,
kwa kukundigwa na kutanganika.
139Igano lya heni kwa hegwe lyangundita nzudile ng'hatu,
kwa vila wang'honyo wa heni nawausemwa ulonzi wa hegwe.
140Kulagana kwa hegwe ndo kwa kukomya ng'hatu,
nani chitumagwa wa hegwe ndangukugana kulagana ako.
141Heni nda mdodo na ndangubezigwa,
ila sisemwa malajizo ga hegwe.
142Kutanganika kwa hegwe kwangikala mazuwa gose,
malajizo ga hegwe ndo ga kukomya.
143Magazo na masinzo navifika heni,
ila mizilo ja hegwe ndo usangalalo wa heni.
144Kwamula kwa hegwe ndo kwa hachi mazuwa gose,
umhe heni uwanzi wa kuvizela leka ndikale.
Kulanda kuloholigwa
145Ndangukulilila kwa nhumbula ya heni yeng'ha,
gwa Mkulu Nguluwi, unyhidichile leka mbinze mizilo ja hegwe.
146Ndangukulilila undohole,
leka ndibatilile kwamula kwa hegwe.
147Ndangulilimka kung'hali kubwemwenzuka na kukulanda utanzi,
ndanguwika kitumbila kwa heni kuli ulonzi wa hegwe.
148Siwasile nechilo yeng'ha,
kwa chiwalo cha kijesa ulonzi wa hegwe.
149Gwa Mkulu Nguluwi, kwa igano lya kwimilila lya hegwe, unyhuliche,
uwamile ukomu wa heni kwa hachi ya hegwe.
150Wanhu wang'ang'ale walingumbunza wangunyejelela,
awo wa kutali ng'hatu na malajizo ga hegwe,
151ila, gwa Mkulu Nguluwi, hegwe kwa habehi na heni,
na mizilo ja hegwe jeng'ha ndo ja kukundigwa.
152Kulawa katali nandilangusa kwamula kwa hegwe,
kuwele ukuwichile kukale mazuwa gose.
Kulanda kwamilwa
153Ulole magazo ga heni, undohole,
kwa vila sigasemwile malajizo ga hegwe.
154Undewele heni na kungombola,
uwamile ukomu wa heni kota vyoulagane.
155Wehile hawoloholigwa,
kwa vila hambe wajiwinze mizilo ja hegwe.
156Gwa Mkulu Nguluwi, isungu lya hegwe ndo likulu,
uwamile ukomu wa heni kwa kiwhana na nhaguso za hegwe.
157Wang'honyo na walingumbunza ndo wenji,
ila sikuleka kwamula kwa hegwe.
158Hondiwona walingudita wihe, ndanguzudizwa ng'hatu,
kwa vila hambe webatilile ulonzi wa hegwe.
159Gwa Mkulu Nguluwi, ulole vyondilingugagana malajizo ga hegwe.
Uwamile ukomu wa heni kwa kiwhana na igano lya kwimilila lya hegwe.
160Ulonzi wa hegwe weng'ha ndo wa kukomya,
nhaguso za hegwe zeng'ha ndo za kutanganika, zangikala mazuwa gose.
Kusangalala kuli malajizo ga Mkulu Nguluwi
161Wang'hangala wangumbunza ne chiwalo,
ila nhumbula ya heni yangukakama kwa chiwalo cha ulonzi wa hegwe.
162Ndangusangalala kwa chiwalo cha ulonzi wa hegwe,
kota munhu yalufichile lufufu lwinji ng'hatu.
163Ndanguuzudila ng'hatu udesi,
ila ndangugagana malajizo ga hegwe.
164Ndangukutogola mala saba chila zuwa,
kwa chiwalo cha nhaguso za hegwe zitanganiche.
165Walingugagana malajizo ga hegwe wana kikala goya kukulu,
haduhu choweza kuwagwisa.
166Gwa Mkulu Nguluwi, ndangukubeteza undohole,
ndangweneza mizilo ja hegwe.
167Ndangibatilila kwamula kwa hegwe,
ndangukugana ng'hatu kwamula ako.
168Ndangibatilila malajizo na kwamula kwa hegwe,
kwa vila kwangugona madito ga heni.
Kulanda utanzi
169Gwa Mkulu Nguluwi, chililo cha heni chikufichile.
Umhe heni uwanzi wa kuvizela kota vyoulagane.
170Kulanda kwa heni kukufichile,
undohole kota vyoulagane.
171Ndolutilila kulonga lutogo lwa hegwe,
kwa vila kwangundangusa mizilo ja hegwe.
172Ndokwimba kwa chiwalo cha ulonzi wa hegwe,
kwa vila mizilo ja hegwe jeng'ha ndo ja hachi.
173Unhanze kwa mong'ho wa hegwe,
kwa vila nanyamula kuwinza malajizo ga hegwe.
174Gwa Mkulu Nguluwi, ndangubeteza lukami undohole,
malajizo ga hegwe ndo kusangalala kwa heni.
175Unhambichize kikala leka ndikutogole,
na malajizo ga hegwe ganhanze.
176Ndangulubaluba kota ing'holo lyajilile,
uye umhale heni chitumagwa wa hegwe,
kwa vila sisemwile mizilo ja hegwe.
Currently Selected:
Zabuli 119: Chividunda
Highlight
Copy
Compare
Share
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
