Nhelo 7
7
Mdala mng'hondwa
1Msongolo wa heni, wibatilile ulonzi wa heni,
ujiwiche mizilo ja heni mgati mwako kota lufufu.
2Ujiwinze mizilo ja heni nagwe kochikala,
ugamile malanguso ga heni kota iziho lya hegwe.
3Ugawohe kuli vidole vya hegwe,
ugandiche mnhumbula mwa hegwe.
4Ululonjele luhala, “Hegwe ndo lumbu wa heni,
hegwe ndo goloko wa heni.”
5Lwokwamila na mdala yehile,
lwokuwika kutali na ulonzi unonile wa mdala mng'hondwa.
6Zuwa limwe kuli itubuli lya ng'handa ya heni,
nasunjilila kwa kukolela itubuli,
7nandiwona wasongolo wenji wapoka,
na yumwe yawele yasowile nyhala.
8Ayo nayali yojenda kuli nzila yila,
habehi na nzingo koyekale mdala yumwenga.
Lelo nakawinza nzila ilinguluta haluga ha mdala yula.
9Nawali mhela wa matinazo,
jiza na nechilo navyali vyaluche kwinjila.
10Lelo, msongolo nakating'hana na mdala ayo,
yavalile kota mng'hondwa, yawele kuli usugu wa heye.
11Nayali mdala yalingulonga ne kupwepwa na mjuvi,
magulu ga heye hambe gasindamale haluga,
12mhela umwenga ganguwa mnzila, mhela wunji kuli soko,
kuli chila nzingo ya nzila kanguwa baho yopelemba.
13Nakamkumbatila msongolo ayo na kumnonela,
ne soni, nakamlonjela,
14“Ndanajo miwunde ja nhambiko kaye kwa heni,
lehano nanyeneza chilaho cha heni.
15Ndo mina nandawa leka ndikubochele,
nandikupala ng'hatu, lelo nandikupata.
16Nambika goya chinhanda cha heni,
kwa igolole lya lanji za kitani kulawa Misili.
17Nambika unhunyhililo wa manemane na udi na mdalasini.
18Uye tuwase hamwe mbaka mitondo,
uye tikofye kwa kigana.
19Mlume wa heni ka haduhuli kaye,
nakaluta kuli majendo ga kutali.
20Nakahola sendi nyinji,
hohiluka kaye himahima.”
21Nakamhada kwa ulonzi wa kuhembuliza,
msongolo nakakunda kwa ulonzi wa heye unonile.
22Baho du, msongolo nakamuwinza mdala ayo,
kota isenga lilinguluta kuli honhu ha kudumulila singo,
kota chifuno chilingunomochela midiwa.
23Nayali havizelele kota kowajiliza ukomu wa heye,
mbaka hoyonile nakawa kota nakahomigwa msale mnhumbula,
nakawa kota chideje chigwilile kuli utandawala.
24Lelo wasongolo wa heni, mnyhulichize,
muuwichile goya makutu ulonzi wa heni.
25Mleche kukunda kulongozwa na mdala kota ayo,
ne kukola kuli nzila za heye.
26Kwa vila nakawagwisa walume wenji,
ndo wenji lukami awo yawadumule singo.
27Ng'handa ya heye ndo nzila ya kuluta kuli isi ya wabagame,
ndo honhu ha kudulichila kuli kubagama.
Currently Selected:
Nhelo 7: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
