Nhelo 6
6
Makanyo ganji
1Msongolo wa heni, wone nakulagana kota koweza kiwika lehani kwa chiwalo cha youlingikalasa habehi,
wone nakulagana kwa chiwalo cha yunji,
2wone nakidinya kwa ulonzi wa gwegwe baho,
nakigwiliza kwa kulagana kwa hegwe,
3uvizele kota hegwe, kwa kuli ludali lwa munhu yula.
Ila msongolo wa heni, wone kwangugana kilohola, lelo udite ahi,
umlutile munhu ayo mala imwe, umdedeze yakupe kilejeha kwa hegwe.
4Wikangaze uleche kuleka meho ga hegwe gawe na usinjizi,
uleche kukunda gasinzile.
5Wilohole kwa kilavya kuli idiwa alyo,
kota chifuno ama chideje chilingisukula kwa yalingupelemba.
6Hegwe mgata! Ulute ukalilole isisina,
wijese vyolilinguganigwa kikala leka uwe na luhala.
7Isisina lyahela chilongozi ne mkulu ne yalingulongoza,
8ila lyangiwichila chilyo mhela wa chipalangule,
lyangukungajizaga na kuwika kuli ng'hano, mhela wa kubeta.
9Hegwe mgata, kowasa aho mbaka nili?
Kolilimka nili kuli usinjizi wa hegwe?
10Kwangilonjela, “Uwase hado hela,
usinzile hado.
Uswinize moko ga hegwe wesele hado.”
11Mhela awo uzunwa wokuvaba kota yalinguboka,
kupunguchilwa kokuwinza kota muhizi.
12Mwihe ama mjuvi,
kangulubaluba yolonga ulonzi wihile,
13kuno yokonyeza kuwajiliza wanji,
kangupananga kwa uzayo,
na kuwalajila wanhu kwa vidole.
14Yawele yamemile uhadi mnhumbula kangulonga wihe,
kangwambuzaga kilewa chila honhu.
15Kwa chiwalo acho kubagama komfika himahima,
baho du kogazika vibi ne kuwa na kitumbila.
16Hana vinhu sita, viwele Mkulu Nguluwi kanguvizudila,
ena, vinhu saba viwele ndo izudizo kwa heye.
17Meho ga ujuvi,
umyango wa uhadi,
moko galingukopola walihela nongwa,
18nhumbula ilingijesa mbuli zihile,
magulu galingubilimila kudita wihe,
19mlolezi yalingulavya udesi,
na munhu yalingwambuza wihe hali wenyelukolo.
Makanyo galinguwala ung'hondwa
20Msongolo wa heni, wibatilile malajizo ga mhaza wa hegwe,
uleche kusemwa malanguso ga mayako.
21Ugawiche mnhumbula mwa hegwe mhela weng'ha,
ugabatilile mmoko mwa hegwe.
22Gokulongoza kuli nzila ya hegwe,
gokwamila mhela houwasa,
gokulangusa ganojile mhela wa nemisi.
23Kwa vila mzilo awo ndo chenje,
na ilajizo alyo ndo lumuli.
Makanyo ago na kuhulichiza gokuwika kuli nzila ya ukomu.
24Gokwamila leka uwe kutali na mdala yehile,
gokuwika kutali na ulonzi wa uhadi wa mdala mng'hondwa.
25Uleche kumgana mdala ayo kwa kunoga kwa heye,
uleche kukunda kugwilizwa na meho ga heye.
26Kuwasa na mdala mng'hondwa komdita mlume yawe mzunwa,
ila kuwasa na mche wa munhu yunji kowajiliza ukomu weng'ha.
27Ndaze, koweza kuwika chiluli mmhambaga
na nguwo za hegwe zileche kulakala?
28Ndaze, koweza kubiga makala ga chiluli,
na uzayo wa hegwe uleche kulakala?
29Ndo vyoyawele mlume yalinguwasa na mche wa myage,
yoneche yalingumdoliza mdala ayo holeka kugazigwa.
30Wanhu hawalingumbeza ng'hatu munhu,
wone yohiza kwa chiwalo cha nzala,
31ila wone yebatigwe yomlapa yalipe mala saba,
kolavya kahi lufufu lweng'ha lwoyawele nalo.
32Mlume yalinguwasa na mche wa munhu yunji kahela nyhala ng'hatu,
ayo kangidumya heye yuye.
33Kopata vilonda na kubezigwa,
soni hoyopata haikuka kwa heye.
34Kwa vila fihi ya mlume yomdita yawe yang'hang'hale ng'hatu,
mhela hoyohilula chibida kahela cha kuchonela isungu.
35Hokunda kupegwa sendi,
ne kuhembulizwa na ndolendole nyinji.
Currently Selected:
Nhelo 6: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
