Nhelo 22
22
1Fola kuzeleka goya kusinda lufufu lwinji,
fola kuganililwa kusinda sendi ama zahabu.
2Wawele na lufufu na wazunwa wangiwhana hela.
Mkulu Nguluwi ndo yawalumbile hewo weng'ha.
3Yawele na luhala kanguzonaga mbuli zihile na kivisa,
ila mpoka kangiwikaga kumwando na kulumizwa.
4Kunyenyetela na kumdumba Mkulu Nguluwi,
kwangigalaga lufufu na lutogo na ukomu.
5Nzila ya mwihe naimema miwa na midiwa,
yalingugana kuwamila ukomu wa heye kochiwika kutali na nzila ayo.
6Umlanguse mwana ndaze vyoilinguganigwa kikala goya,
naye hosemwa mbaka kuli usekulu.
7Yawele na lufufu kangumlongozaga mzunwa,
yalingulanda ndo mpogozi wa yalingulavya.
8Yalingunyala kubunza kobeta lihile,
ludali lwa ng'halazi ya heye lobenigwa.
9Yawele na isungu kotambichizwa,
kwa vila chilyo cha heye kangumgawilaga mzunwa.
10Muwinje yalingubeza, ivuche lyokwajilila,
kilewa na maligo vyomala.
11Yalingugana nhumbula inojile na yalingugana ulonzi wa isungu,
kowa goloko wa mndewa.
12Mkulu Nguluwi kangwamilaga malanguso ga kukomya,
ila kanguuwifyaga ulonzi wa yalingubelenhuka.
13Mgata kangulongaga, “Siweza kuluta kunze,
kuna isimba ako, lyong'hopola kuli nzila ng'hulu.”
14Mlomo wa mng'hondwa ndo ikulubila liwele ng'wemang'wema,
yalinguzudilwa na Mkulu Nguluwi kogwila amo.
15Mwana kanguganaga mbuli za chipoka mnhumbula,
ila ng'hobwa ya magazo yangumusilaga ago.
16Yalingumbunza mzunwa leka kiyonjezela lufufu,
na yalingumha ndolendole yawele na lufufu,
weng'ha wowa wazunwa.
Ulonzi wa wawele na luhala
17Uwiche goya ikutu leka uhulichize ulonzi wa wawele na luhala,
wijese ng'hatu kuwala uwanzi wa heni.
18Hegwe kosangalala wone kogawika mnhumbula,
na kugakumbuchila chila mhela.
19Ila kitumbila kwa hegwe kuwe kwa Mkulu Nguluwi,
ndangukulangusa lehano.
20Nandikwandichila nhelo makumi gadatu,
nhelo za makanyo na uwanzi,
21leka kukulangusa gawele ga hachi na ga kukomya,
na wone munhu yakuuze, umwidichile goya.
22Uleche kumbunza mzunwa kwa vila ka mzunwa,
umhe hachi ya heye kuli chitala,
23kwa vila Mkulu Nguluwi komlewela,
kowasukula ukomu wa hewo walinguwabunza wayawo.
24Uleche kuwa habehi na yalinguzudila himahima,
ne kuwa hamwe na yawele na ng'halazi ya himahima,
25leka uleche kilangusa madito ga heye,
na kigwiliza ng'hatu kuli idiwa.
26Uleche kuwa yumwe wa wala walinguwika kulagana kumlipila yunji,
wanhu wawele wangiwikaga lehani kwa chiwalo cha kudaigwa kwa wanhu wanji.
27Wone uwe ulihela chinhu cha kulipa,
chinhanda choulinguwasila choholigwa.
28Uleche kusa ulajilo wa mbaka ja katali,
jiwele najiwichigwa na wasekulu wa hegwe.
29Ndaze, hana munhu yawele na uwanzi kuli mijito ja heye?
Ayo kowakolela mijito wandewa,
howakolela mijito wanhu wa hihi hela.
Currently Selected:
Nhelo 22: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
