Nhelo 21
21
1Nhumbula ya mndewa ndo kota mazi galinguchililika,
Mkulu Nguluwi, kanguilongozaga honeche hoyogana.
2Madito geng'ha ga munhu gangoneka ga goya kwa heye,
ila Mkulu Nguluwi kanguipimaga nhumbula.
3Kudita mbuli zitanganiche na za hachi,
kwangumnojeza Mkulu Nguluwi kusinda nhambiko.
4Meho ga ujuvi na nhumbula ya kidaya,
vyangulajila hazelu gehile ga wehile.
5Gala goyodita munhu kwa kwimilila gangigala lufufu kwa winji,
ila galinguditigwa himahima ganguwa hihi hela.
6Ng'hano ilinguya kwa uhadi,
ndo ivuche lilingukola na idiwa lya kubagama.
7Kilewa kwa wehile kokusigwa,
kwa vila wangulema kudita mbuli za hachi.
8Nzila ya munhu yawele na nongwa ndo ya kwajilila,
ila madito ga yanojile nagagoloka.
9Fola kikala hafungo mchanya mwa chinduwiko,
kusinda kikala kaye hamwe na mche yalingugana kilewa.
10Choyalingugana kudita mwihe ndo wihe,
kahela isungu mbaka kwa munhu yowalingikalasa habehi.
11Wone umgaze yalingubeza, mpoka kanguwaga na kuvizela,
wone umlanguse yawele na luhala, kwangumha uwanzi.
12Nguluwi kangugazela galingukoleka kuli ng'handa za wehile,
naye kowadumya walingudita gehile.
13Yalingulema kuhulichiza chililo cha wazunwa,
naye kahi hohulichizwa hoyolanda utanzi.
14Ng'halazi yanguditigwa isindamale kwa ndolendole ya uviso,
chinhu choyalingupegwa munhu kuno chivisigwa changulemeza kuzudila.
15Wone hachi iditigwe, wanhu watanganiche wosangalala,
ila wanhu wehile wokabuswa.
16Munhu yalingulubaluba kutali na nzila ya luhala,
kowasa kuli chilundo cha wabagame.
17Yalinguwinza maya ga heye kowa mzunwa,
yalingugana divai na mafuta ga mzeituni howa na lufufu.
18Mwihe kanguwika goya mbuli zihile kwa yatanganiche,
ila kangiyambuzila magazo honhu ha yagoloche.
19Fola kikala kugunuche,
kusinda kikala na mche yalingugana kilewa na yalingutunya.
20Kaye kwa yawele na luhala hana ng'hano ya sendi nyinji na mafuta,
ila lufufu lwa mpoka lwangumala himahima.
21Yalingupala kutanganika na isungu,
kochikala ng'hatu na mbuli za heye zolutilila goya na kutogoligwa.
22Yawele na luhala koweza kuboka muji wa yawele na mong'ho,
na kubomola ngome yowalingitumbila.
23Yalingwamila mlomo na umyango wa heye,
kangiwikaga kutali na magazo.
24Yalingidaya na mjuvi, itagwa lya heye ndo “Kubeza,”
madito ga heye nagamema kidaya kwa ujuvi wa heye.
25Mgata kangubagama kwa kulemwela kweneza maya ga heye,
kwa vila moko ga heye gangulema kukola mijito.
26Nemisi yeng'ha kanguganaga kuwa na chinhu,
ila yatanganiche kangulavyaga kwa isungu.
27Nhambiko ya mwihe ndo izudizo,
yanguzudiza ng'hatu wone yalavye kwa kunuwila kwihile.
28Mlolezi mdesi kodumigwa,
ila yalingulonga ulonzi wa kukomya howeza kulonjelwa yanyamalile.
29Mwihe kangulajilaga kota ka yazidahe,
ila yagoloche kangutawizaga kota nakadita goya.
30Haduhu luhala na uwanzi ne ulonzi unojile wa munhu,
uwele woweza kumsumya Mkulu Nguluwi.
31Falasi kanguwichigwa goya kwa kitowa ngondo,
ila kusumya kwangitumbila kwa Mkulu Nguluwi.
Currently Selected:
Nhelo 21: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
