Nhelo 11
11
1Mizani ja uhadi ndo izudizo kwa Mkulu Nguluwi,
ila chipimilo cha hachi ndo usangalalo kwa heye.
2Walingidaya wanguwa hamwe na kudeula,
ila kwa wanhu walingunyenyetela wana luhala.
3Kugoloka kwa wanhu wanojile kwanguwalongozaga,
kwajilila kwa wawele na nhumbula zihile kwanguwadumyaga.
4Kuwa na lufufu hambe kutanze chinhu kuli zuwa lya kuzudila kwa Nguluwi,
ila kutanganika kwanguloholaga kulawa kuli kubagama.
5Kutanganika kwa walihela nongwa kwangugololaga nzila ya hewo,
ila wehile wangugwa kwa gehile ga hewo wawo.
6Kutanganika kwa wanhu wagoloche nhumbula kwanguwaloholaga,
ila wawele na nhumbula zihile wangugwilizwaga kwa maya ga hewo wawo.
7Wone mwihe yabagame na kitumbila kwa heye nako kwangwajililaga,
geng'ha goyajesile kupata kwa mong'ho wa heye ganguwaga hihi hela.
8Yatanganiche kanguloholigwaga kuli magazo,
na mwihe kangwinjila amo honhu ha heye.
9Yohambe yamdumbe Nguluwi kanguwadumyaga wanji kwa mlomo wa heye,
ila yatanganiche kanguloholigwa kwa uwanzi wa heye.
10Wone watanganiche wopegwa utambichizo, muji wotowa luchenze,
na wone wehile wodumigwa, wanhu wosangalala.
11Muji wanguwaga unojile kwa utambichizo wa watanganiche,
ila wangudumigwa kwa milomo ja wehile.
12Yalingumbeza munhu yalingikalasa habehi na heye kahela nyhala,
munhu yawele na luhala kanginyamalilaga.
13Yalingukolakola yoheha kangulavyaga uviso,
ila yalingukundigwa kuli muhe kanguwikaga uviso.
14Hali hela ulongozi isi yangugwa,
hawele na wanhu wenji wa kulonga ganojile hanguwa na kikala goya.
15Yalingiwika lehani kwa chiwalo cha mjenzi, kokuya kung'ung'uta,
ila yalinguzudila kudita mbuli azo ka honhu ha kikala goya.
16Mdala yawele na nhumbula ya isungu kangutogoligwa,
mlume yalingugana kilewa kanguwa na lufufu hela.
17Munhu yawele na nhumbula inojile kanguwaga na vinhu vinojile,
ila mjuvi kangilumizaga yuye.
18Chinhu cha mzidi choyalingupata mwihe ndo cha udesi,
ila yalingunyala kutanganika kopata chonolo cha kukomya.
19Munhu yalingulutilila kuli kutanganika kochikala,
ila yalinguhagula kudita gehile kobagama.
20Wawele na nhumbula zajilile ndo izudizo kwa Mkulu Nguluwi,
ila walihela nongwa ndo usangalalo wa heye.
21Ndangukomya, mwihe hosulupuka kuli magazo kwa madito ga heye,
ila watanganiche woloholigwa.
22Mdala yanojile yalihela luhala,
ndo kota pete ya zahabu mmhenyhelo mwa igubi.
23Kitumbila kwa watanganiche kwangigalaga ganojile,
maya ga wehile gangumalilaga kuli kuzudila kwa Nguluwi.
24Yalingulavya sendi kwa isungu kangonjezelwaga lufufu,
ila yohaganile kulavya kangubatigwa kuli uzunwa.
25Munhu yawele na nhumbula ya kulavya utanzi, mbuli za heye zolutilila goya,
yalingumnweza myage mazi naye konwezwa.
26Wanhu wangumpanjilaga yalinguvisa nyhule,
ila wangumganilaga utambichizo yalinguguza.
27Yalingupala kudita ganojile kangupegwa kunoga,
ila yalingupala kudita wihe kofichigwa na wihe.
28Yalingitumbila lufufu lwa heye kogwa,
ila yatanganiche kodedemka kota ihamba idodi.
29Yalinguibena ng'handa ya heye kopata mbeho,
mpoka kowa mpogozi wa wawele na luhala.
30Madito ga yatanganiche gangigalaga ukomu,
naye yawele na luhala kangukwegaga nhumbula za wanhu.
31Wone yatanganiche kangupegwa chonolo aha muisi,
ndangukomya, mwihe ama yawele na gehile kopegwa chihile ng'hatu.
Currently Selected:
Nhelo 11: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
